മലപ്പുറത്ത് മലവെള്ളപ്പാച്ചിൽ; മരണം അഞ്ചായി, ആറ് ജില്ലകളിൽ ഓറഞ്ച് അലർട്ട് പ്രഖ്യാപിച്ചു

മലപ്പുറം ചോക്കാട് പൂക്കോട്ടുപാടം ടി.കെ നഗറിലുണ്ടായ മലവെള്ളപ്പാച്ചിലിൽ മരിച്ചവരുടെ എണ്ണം അഞ്ചായി. കാണാതായവരിൽ മൂന്നുപേരുടെ മൃതദേഹങ്ങൾ കൂടി ഇന്ന് കണ്ടെത്തുകയായിരുന്നു. വണ്ടൂർ കോട്ടക്കുന്ന് സ്വദേശി സജാദ്, കരുവാരക്കുണ്ട് സ്വദേശി റഹീം, വണ്ടൂർ സ്വദേശി റഫീഖ്, ചെട്ടിയാറമ്മൽ സ്വദേശി കുറുപ്പത്ത് റഫീഖ് എന്നിവരാണ് മരിച്ചത്. അപകടത്തിൽപ്പെട്ട പ്രദേശവാസിയായ ആദിവാസി സ്ത്രീക്കായി തിരച്ചിൽ ഇപ്പോഴും തുടരുകയാണ്. ടി.കെ കോളനി സ്വദേശി സജിതക്കായാണ് തിരച്ചിൽ തുടരുന്നത്. മന്ത്രി എ.പി. അനിൽകുമാർ ഉൾപ്പെടെയുള്ളവർ സ്ഥലത്തെത്തി.

മഴ; 9 മരണം, മലപ്പുറം മലവെള്ളപ്പാച്ചിൽ തെരച്ചിൽ തുടരുന്നു, ഇന്നും ശക്തമായ മഴ സാധ്യത
Heavy Rains Lash Kerala: 9 Dead, Flash Floods in Malappuram, High Alert Issued
https://metbeatnews.com/heavy-rains-lash-kerala-9-dead-flash-floods-in-malappuram-high-alert-issued

മണ്ണിടിച്ചിൽ ഭീഷണി തുടരുന്നു

ഇന്നലെ ശക്തമായ മഴ ലഭിച്ച കോട്ടയത്ത് ഇന്ന് മഴയ്ക്ക് നേരിയ ശമനമുണ്ട്. എന്നാൽ, മലയോര ജില്ലകളിൽ മഴയും മണ്ണിടിച്ചിൽ ഭീഷണിയും തുടരുകയാണ്.
കനത്ത മഴയും മണ്ണിടിച്ചിൽ ഭീഷണിയും കണക്കിലെടുത്ത് ഇടുക്കിയിലെ മലയോര മേഖലകളിൽ രാത്രിയാത്രയ്ക്ക് ജില്ലാ ഭരണകൂടം നിയന്ത്രണം ഏർപ്പെടുത്തി. വൈകിട്ട് ഏഴ് മുതൽ രാവിലെ ആറുവരെയാണ് നിയന്ത്രണം. അലർട്ടുകൾ പിൻവലിക്കുന്നതുവരെ സാഹസിക വിനോദസഞ്ചാര കേന്ദ്രങ്ങൾ അടച്ചിടാനും നിർദേശം നൽകി.

ഗതാഗതനിയന്ത്രണം ശക്തമാക്കി

മൂന്നാറിൽ ഗതാഗത നിയന്ത്രണം ശക്തമാക്കിയിട്ടുണ്ട്. മണ്ണിടിച്ചിൽ സാധ്യത കണക്കിലെടുത്ത് പഴയ മൂന്നാറിൽനിന്നുള്ള വാഹനങ്ങൾ വഴിതിരിച്ചുവിടുകയാണ്. വാഹനങ്ങൾ സി.എസ്.ഐ പള്ളിക്ക് സമീപത്തുനിന്ന് ഗ്യാപ് റോഡിൽ പ്രവേശിച്ച് പൊലീസ് സ്റ്റേഷന് സമീപത്തെ പാലം കടന്നാണ് മൂന്നാർ ടൗണിൽ എത്തേണ്ടത്.

അഞ്ച് കുടുംബങ്ങളെ മാറ്റിപ്പാർപ്പിച്ചു

ഇടുക്കി ജില്ലയിലെ വിവിധ മേഖലകളിൽ മഴ തുടരുകയാണ്. അടിമാലി പഴമ്പള്ളിച്ചാലിൽ ഉരുൾപൊട്ടൽ സാധ്യത കണക്കിലെടുത്ത് അഞ്ച് കുടുംബങ്ങളെ സുരക്ഷിത സ്ഥാനത്തേക്ക് മാറ്റിപ്പാർപ്പിച്ചു. പ്രദേശത്ത് മഴയുടെ ശക്തി കുറഞ്ഞിട്ടുണ്ട്. നേര്യമംഗലം–വാളറ റോഡിലൂടെ യാത്ര ചെയ്യുന്നവർ ജാഗ്രത പാലിക്കണമെന്ന് അധികൃതർ നിർദേശിച്ചു. അതേസമയം കൊച്ചി–ധനുഷ്കോടി ദേശീയപാതയിലും പലയിടങ്ങളിലും മരം വീണതിനെ തുടർന്ന് യാത്രക്കാർ ജാഗ്രത പാലിക്കണം.

ഓറഞ്ച് അലർട്ട് പ്രഖ്യാപിച്ചു

സംസ്ഥാനത്ത് ഇന്ന് ആറ് ജില്ലകളിലാണ് ഓറഞ്ച് അലർട്ട് പ്രഖ്യാപിച്ചു. കോട്ടയം, ഇടുക്കി, എറണാകുളം, തൃശൂർ, മലപ്പുറം, പാലക്കാട് ജില്ലകളിലാണ് ഓറഞ്ച് അലർട്ട് പ്രഖ്യാപിച്ചിരിക്കുന്നത്. ശക്തമായ കാറ്റിനും സാധ്യതയുണ്ട്. മലയോര മേഖലകളിലും അപകടസാധ്യതയുള്ള പ്രദേശങ്ങളിലും പ്രത്യേക ജാഗ്രത വേണമെന്ന് അധികൃതർ മുന്നറിയിപ്പ് നൽകി.

English Summary : Tragedy struck Malappuram, Kerala, following a sudden flash flood in Chokkad Pookottupadam, where the death toll has risen to five after rescue teams recovered three more bodies. Authorities have issued an Orange Alert across six districts—Kottayam, Idukki, Ernakulam, Thrissur, Malappuram, and Palakkad—due to persistent heavy rainfall and ongoing landslide threats.