Metbeat News Desk

കേരളത്തിന്റെ ആകാശത്ത് അപൂർവവും മനോഹരവുമായ കാഴ്ചയൊരുക്കി 'സൺ ഹാലോ' (22° Sun Halo) പ്രകാശവലയം ദൃശ്യമായി. മലപ്പുറം ജില്ലയിലെ കോഡൂർ ഉൾപ്പെടെയുള്ള വിവിധ പ്രദേശങ്ങളിലും സംസ്ഥാനത്തിന്റെ മറ്റു ചില ഭാഗങ്ങളിലുമാണ് ഇന്ന് ഉച്ചയോടെ സൂര്യനുചുറ്റും മഴവില്ലിന് സമാനമായ വർണ്ണവലയം രൂപപ്പെട്ടത്.

ആകാശത്ത് ഉയർന്ന തലത്തിലുള്ള സിറസ് (Cirrus) മേഘങ്ങളിലെ മഞ്ഞുതുള്ളികളിലൂടെയും ഐസ് ക്രിസ്റ്റലുകളിലൂടെയും സൂര്യപ്രകാശം കടന്നുപോകുമ്പോഴാണ് ഈ പ്രതിഭാസം ഉണ്ടാകുന്നത്. അന്തരീക്ഷത്തിലെ ഉയർന്ന ആർദ്രതയും (Humidity) വെയിലിന്റെ പ്രത്യേക കോണളവിലുള്ള സാന്നിധ്യവുമാണ് ഇതിന് കാരണമാകുന്നത്.

മലപ്പുറം കോഡൂരിൽ ഇന്ന് ദൃശ്യമായ ഹാലോ 📷 : Minnu Dani Sonu

എന്താണ് 22° സൺ ഹാലോ?

അന്തരീക്ഷത്തിൽ ഏകദേശം 20,000 അടിയിലധികം ഉയരത്തിൽ കാണപ്പെടുന്ന ഷഡ്ഭുജാകൃതിയിലുള്ള (Hexagonal) ഐസ് സ്ഫടികങ്ങളിലൂടെ പ്രകാശം പ്രതിഫലിക്കുകയും അപവർത്തനത്തിന് (Refraction) വിധേയമാവുകയും ചെയ്യുമ്പോൾ സൂര്യനു ചുറ്റും കൃത്യം 22 ഡിഗ്രി കോണളവിൽ വട്ടത്തിൽ ഒരു പ്രകാശവലയം രൂപപ്പെടുന്നു. ഇതിനെയാണ് ശാസ്ത്രീയമായി 22 ഡിഗ്രി സൺ ഹാലോ എന്ന് വിളിക്കുന്നത്.

മഴവില്ലിലെ പോലെ ചുവപ്പ്, നീല നിറങ്ങളുടെ മിശ്രിതം ഈ പ്രകാശവലയത്തിന്റെ അതിരുകളിൽ വ്യക്തമായി കാണാൻ സാധിക്കും. സാധാരണയായി അന്തരീക്ഷ മാറ്റങ്ങളുടെയും മഴ മുന്നറിയിപ്പുകളുടെയും ഭാഗമായി ഇത്തരം പ്രതിഭാസങ്ങൾ ഉണ്ടാകാറുണ്ട്.

ആകാശത്തെ ഈ വിസ്മയക്കാഴ്ച നിരവധി പേർ മൊബൈൽ ക്യാമറകളിൽ പകർത്തി സോഷ്യൽ മീഡിയയിൽ പങ്കുവെച്ചു. അപൂർവ്വവും മനോഹരവുമായ ഈ കാഴ്ച കാണാൻ ജനങ്ങൾ ഏറെ കൗതുകത്തോടെയാണ് ആകാശത്തേക്ക് കണ്ണുനട്ടത്.

English Summary : Spectacle in the Sky: 'Sun Halo' Observed in Kodur, Malappuram, and Other Parts of Kerala. A rare and stunning natural optical phenomenon known as a 22° Sun Halo was observed over Kodur in Malappuram district and several other parts of Kerala around noon today