Weather Keralam 24/08/26: മഴ തുടരുന്നു, ചക്രവാത ചുഴി ഇന്ന് ദർബലമാകും

ബംഗാൾ ഉൾക്കടലിലെ ന്യൂനമർദ്ദത്തിനൊപ്പം വടക്കൻ കേരളത്തിന്റെ മുകളിലായി രൂപപ്പെട്ട ചക്രവാത ചുഴി കാരണം വടക്കൻ ജില്ലകളിൽ ശക്തമായ മഴ. ഇന്നലെ രാത്രിയാണ് ചക്രവാത ചുഴി രൂപപ്പെട്ടത്. പുലർച്ചെ മുതൽ കോഴിക്കോട്, മലപ്പുറം, വയനാട്, കണ്ണൂർ, കാസർകോട്, പാലക്കാട് ഉൾപ്പെടെയുള്ള ജില്ലകളിൽ മഴ തുടരുന്നുണ്ട്.

മലപ്പുറം ജില്ലയിലാണ് കൂടുതൽ മഴ ലഭിക്കുന്നത്. മഴ തുടരാനാണ് സാധ്യത. ഇന്ന് 8 ജില്ലകളിൽ കേന്ദ്ര കാലാവസ്ഥ വകുപ്പ് മഞ്ഞ അലർട്ട് പ്രഖ്യാപിച്ചിട്ടുണ്ട്. വടക്കൻ കേരളത്തിന്റെ മുകളിലെ ചക്രവാത ചുഴി ഇന്നത്തോടെ ദുർബലമാകും. എന്നിരുന്നാലും നാളെയും മറ്റന്നാളും മഴ തുടരാനാണ് സാധ്യത. ഇടവേളകളോടെ ആയിരിക്കും മഴ.

വടക്കൻ ഒഡീഷും ബംഗാളിനും മുകളിലാണ് ന്യൂനമർദ്ദം ഉള്ളത്. ഗംഗാസമതല പ്രദേശത്തിന് മുകളിലായി വടക്ക് വടക്കു പടിഞ്ഞാറ് ദിശയിലാണ് ന്യൂനമർദ്ദം നീങ്ങുക. ഇത് കേരളത്തിലെ കാലാവസ്ഥയെ എങ്ങനെ ബാധിക്കും എന്ന് തുടർന്ന് ദിവസങ്ങളിൽ നമുക്ക് നിരീക്ഷിക്കാം.

കേരള, ലക്ഷദ്വീപ് , കർണാടക തീരങ്ങളിൽ മത്സ്യത്തൊഴിലാളികൾ കടലിൽ പോകുന്നതിന് വിലക്കുണ്ട്. മണിക്കൂറിൽ 65 കിലോമീറ്റർ വേഗതയിൽ വരെ കടലിൽ കാറ്റ് ഉണ്ടാകാം.

ഇന്നും നാളെയും മലപ്പുറം മുതൽ കോട്ടയം വരെയുള്ള ജില്ലകളിലാണ് ഏറ്റവും കൂടുതൽ മഴ പ്രതീക്ഷിക്കുന്നത്. പത്തനംതിട്ടയിലും മഴ ലഭിക്കും. തിരുവനന്തപുരം കൊല്ലം ജില്ലകളിൽ കിഴക്കൻ മേഖലകളിൽ ശക്തമായ മഴ സാധ്യത. ഇടുക്കിയിലും മഴയുണ്ടാകും. തൃശ്ശൂർ പാലക്കാട് ജില്ലകളിൽ മിതമായ രീതിയിൽ മഴയുണ്ടാകും.

English Summary: Kerala Weather Update (24/08/26): Rain Persists Across the State; Cyclonic Circulation to Weaken Today. Heavy rainfall continues across northern Kerala districts including Kozhikode, Malappuram, Wayanad, Kannur, Kasaragod, and Palakkad due to a cyclonic circulation that formed last night, alongside a low-pressure system in the Bay of Bengal. Malappuram has recorded the highest rainfall.