ആരവല്ലി മേഖലയിൽ 77 ശതമാനം ഖനനം നടന്നു, പ്രകൃതിയെ അത്രയധികം നശിപ്പിച്ചു

രാജസ്ഥാനിൽ അനധികൃത ഖനനവുമായി ബന്ധപ്പെട്ട് രജിസ്റ്റർ ചെയ്യപ്പെടുന്ന എഫ്‌.ഐ.ആറുകളിൽ 77 ശതമാനത്തിലധികവും ആരവല്ലി മലനിരകളുമായി ബന്ധപ്പെട്ട ജില്ലകളിൽനിന്നും. ആരവല്ലി മലനിരകളിലെ കടന്നുകയറ്റങ്ങളും, വനനശീകരണവും, അനധികൃത ഖനനങ്ങളും പരിസ്ഥിതിക്ക് കനത്ത പ്രത്യാഘാതം വരുത്തിയിട്ടുണ്ടെന്ന് കണ്ടെത്തിയ പഠനം ഇയ്യിടെയാണ് പുറത്തുവന്നത്. ഇതിനു പിന്നാലെയാണ് സംസ്ഥാനത്തെ അനധികൃത ഖനനത്തിൽ ഭൂരിഭാഗവും ഈ മേഖലയിലാണെന്ന ഡാറ്റ പുറത്തുവരുന്നത്.

രാജസ്ഥാൻ നേരിടുന്ന ഖനന ദുരിതം കൂടുതൽ സങ്കീർണമാകും

ആരവല്ലി മലനിരകളുടെ 70 ശതമാനത്തോളം കടന്നുപോകുന്ന രാജസ്ഥാനിലെ ജില്ലകൾ ആനുപാതികമല്ലാത്ത, വൻതോതിലുള്ള അനധികൃത ഖനനത്തിന്‍റെ കെടുതികൾ നേരിടുകയാണ്. ആരവല്ലി മലകളുടെ നിർവചനത്തിൽ ഇയ്യിടെ നിർദേശിച്ച മാറ്റങ്ങൾ പ്രാബല്യത്തിൽ വന്നാൽ രാജസ്ഥാൻ നേരിടുന്ന ഖനന ദുരിതം കൂടുതൽ സങ്കീർണമാകും. നിർവചനത്തിൽ വരുത്താനുദ്ദേശിച്ച മാറ്റങ്ങളാണ് സമീപകാലത്ത് അരാവലിയെ നയപരവും നിയമപരവുമായ തർക്കങ്ങളുടെയും വാദപ്രതിവാദങ്ങളുടെയും കേന്ദ്രബിന്ദുവാക്കിയത്.

ആരവല്ലി മലനിരകളെ സംബന്ധിച്ച് വ്യക്തമായ നിർവചനം ഇല്ലാത്തതാണ് അനധികൃത ഖനനം വ്യാപകമാകാൻ ഇടയാക്കുന്നതെന്ന് 2024 മേയ് മാസത്തിൽ സുപ്രീംകോടതി നിരീക്ഷിച്ചിരുന്നു. തുടർന്ന് നിർവചനത്തിൽ നിർദേശിച്ച മാറ്റങ്ങളാകട്ടെ പ്രശ്നവും പ്രതിസന്ധിയും കൂടുതൽ സങ്കീർണമാക്കുകയാണ് ചെയ്തത്.

രാജ്യം ഒന്നാകെ ആരവല്ലിയുടെ സംരക്ഷണത്തിന് വേണ്ടി മുറവിളി കൂട്ടുന്നു

ഒരു രാജ്യത്തിന്റെ കാവലാളാണ് ആരവല്ലി മലനിരകൾ. താർ മരുഭുമി ഇന്ത്യയുടെ കിഴക്കൻ മേഖലകളിലേക്ക് വ്യാപിക്കാതെ തടഞ്ഞുനിർത്താനും പൊടിക്കാറ്റുകളിൽ നിന്ന് നൂറുകണക്കിന് കിലോമീറ്ററോളം വ്യാപിച്ചുകിടക്കുന്ന പ്രദേശങ്ങളെ സംരക്ഷിക്കാനും ലക്ഷക്കണക്കിന് ജൈവവൈവിധ്യത്തിന് വീടൊരുക്കാനും ഭൂഗർഭജലം സംരക്ഷിക്കാനുമൊക്കെ ആരവല്ലി കൂടിയേ തീരൂ. രാജ്യം ഒന്നാകെ ആരവല്ലിയുടെ സംരക്ഷണത്തിന് വേണ്ടി മുറവിളി കൂട്ടുന്നതിനു പിന്നിലെ കാരണവും മറ്റൊന്നല്ല. ആരവല്ലിയെക്കുറിച്ചുള്ള പുതുക്കിയ നിർവചനം വലിയ തോതിലുള്ള ഖനനത്തിന് വഴിയൊരുക്കുമെന്ന ആശങ്കകൾ ഭരണകൂടം തള്ളിക്കളയുമ്പോഴും ഇത്തരത്തിൽ മനുഷ്യൻ്റെ കനിവ് കാത്ത് കഴിയേണ്ട ഒന്നാണോ ആരവല്ലി എന്ന ചോദ്യം നിലനിൽക്കുകയാണ്.

English Summary : In May 2024, the Supreme Court observed that the lack of a clear definition of the Aravalli Range was leading to widespread illegal mining. Subsequent changes in the definition further complicated the problem and crisis.