Weather Keralam 14/10/26 : ന്യൂനമർദം രൂപപ്പെട്ടില്ല, മൺസൂൺ വിടവാങ്ങൽ പുരോഗമിച്ചില്ല, ചൂട് കൂടുന്നു

തെക്കു കിഴക്കൻ ബംഗാൾ ഉൾക്കടലിൽ ഇന്നലെ രൂപപ്പെടുമെന്ന് കരുതിയ ന്യൂനമർദ്ദം രൂപപ്പെട്ടില്ല. കഴിഞ്ഞദിവസം മലാക്ക കടലിടുക്കിന് മുകളിൽ സ്ഥിതി ചെയ്തിരുന്ന ചക്രവാത ചുഴിയാണ് തെക്കുകിഴക്കൻ ബംഗാൾ ഉൾക്കടലിൽ ന്യൂനമർദ്ദമായി മാറുമെന്ന് കരുതിയിരുന്നത്.

ഈ ന്യൂനമർദ്ദം മൂലം കേരളത്തിൽ
ഇന്ന് മഴ ലഭിക്കുമെന്നും നേരത്തെ പ്രവചനം ഉണ്ടായിരുന്നു. എന്നാൽ ഇന്ന് മഴ സാധ്യത കേരളത്തിൽ കുറഞ്ഞു. ഇന്നലെ കേരളത്തിൽ മിക്കയിടങ്ങളിലും സാധാരണയേക്കാൾ കൂടിയ ചൂട് രേഖപ്പെടുത്തി. വടക്കൻ കേരളത്തിലും തീരദേശ കർണാടകയിലും ഇന്നും ചൂട് കൂടാൻ സാധ്യത. നാളെ മുതൽ കേരളത്തിൽ ഇടിയോടു കൂടെ മഴ കാലാവസ്ഥാ വകുപ്പ് പ്രവചിക്കുന്നുണ്ട്.

കഴിഞ്ഞ ദിവസം വടക്കൻ കർണാടക വരെ എത്തിനിൽക്കുന്ന കാലവർഷത്തിന്റെ വിടവാങ്ങൽ പിന്നീട് പുരോഗമിച്ചില്ല. തെക്കൻ കർണാടക ഉൾപ്പെടെ ദക്ഷിണേന്ത്യൻ സംസ്ഥാനങ്ങളിൽ നിന്ന് കാലവർഷം വിട വാങ്ങേണ്ട സാധാരണ സമയം ഒക്ടോബർ 15 ആണ്.

മറ്റു തടസ്സങ്ങൾ ഇല്ലാത്തതിനാൽ കാലവർഷം വിടവാങ്ങാൻ വേഗത്തിലാകും എന്നുതന്നെയാണ് പ്രതീക്ഷിക്കുന്നത്. ഒക്ടോബർ 16 കാലവർഷം പൂർണമായി വിടവാങ്ങിയതായി പ്രഖ്യാപിക്കാൻ കഴിയുന്ന സാഹചര്യം ഉണ്ടാകും. അതോടൊപ്പം തുലാവർഷം എത്തുകയും ചെയ്യും.

English Summary: The low-pressure area expected over the southeast Bay of Bengal (originating from a cyclonic circulation over the Malacca Strait) has not formed as anticipated. Consequently, the predicted rainfall for Kerala today has reduced.