കാലവർഷം ദുർബലമാകുന്നു, നാളെ മുതൽ ഇടിയോട് മഴ സാധ്യത

കേരളത്തിൽ നാളെ ( ബുധൻ) മുതൽ ഇടിയോടുകൂടെ മഴ സാധ്യത. തമിഴ്നാട്ടിലും ഇടിയോടെ മഴ ലഭിക്കും. ഇന്ന് ചൊവ്വാഴ്ച പൊതുവേ കേരളത്തിൽ വരണ്ട കാലാവസ്ഥ അനുഭവപ്പെടാനാണ് സാധ്യത. ബുധനാഴ്ച വൈകിട്ട് മുതൽ വടക്കൻ കേരളത്തിലും തെക്കൻ ജില്ലകളിലും കിഴക്കൻ മേഖലകൾ കേന്ദ്രീകരിച്ച് വൈകിട്ട് മുതൽ മഴക്ക് സാധ്യതയെന്ന് Metbeat Weather പറയുന്നു.

ശക്തി ശക്തി കുറഞ്ഞു, ഒമാനിൽ ഒറ്റപ്പെട്ട മഴ

ഒമാനിലെ മാസിറ ദ്വീപിന് 180 കിലോമീറ്റർ അടുത്തുവരെയെത്തിയ അറബിക്കടലിലെ ശക്തി ചുഴലിക്കാറ്റ് ( Cyclonic Storm) ഇന്ന് ദുർബലമായി തീവ്ര ന്യൂനമർദ്ദമായി (Deep Depression ) തുടരും. ഈ സിസ്റ്റം നേരത്തെ പടിഞ്ഞാറ്, വടക്കു പടിഞ്ഞാറ് ലക്ഷ്യം വെച്ച് നീങ്ങിയിരുന്നെങ്കിൽ ഇനി കിഴക്കോട്ട് തിരികെ മടങ്ങും. ഇതിനിടയിൽ കടലിൽ ദുർബലമാകും. ഈ സിസ്റ്റം ഇന്ന് ഒമാനിലെ തീരദേശങ്ങളിൽ ഒറ്റപ്പെട്ട മഴക്ക് കാരണമാകും.

കാലവർഷം വിടവാങ്ങൽ പുരോഗമിക്കുന്നു

ഇന്ത്യയിൽ കാലവർഷം വിടവാങ്ങുന്നത് (withdrawal of south west monsoon) പുരോഗമിക്കുകയാണ്. ഉത്തരേന്ത്യയിലെ കൂടുതൽ പ്രദേശങ്ങളിൽ നിന്ന് കാലവർഷം ഇതിനകം വിടവാങ്ങിയിട്ടുണ്ട്. അടുത്ത ദിവസങ്ങളിൽ മഹാരാഷ്ട്ര ഉൾപ്പെടെയുള്ള സംസ്ഥാനങ്ങളിലേക്ക് കാലവർഷത്തിന്റെ വിടവാങ്ങാൻ എത്തും.

കേരളത്തിലും കാലവർഷക്കാറ്റ് ദുർബലം

കേരളത്തിൽ ഉൾപ്പെടെ കാലവർഷക്കാറ്റിന്റെ ശക്തി ഗണ്യമായി കുറഞ്ഞു. ഇനി പടിഞ്ഞാറൻ കാറ്റ് മഴ നൽകാനുള്ള സാധ്യത കുറവാണ്. അത്തരത്തിലുള്ള അന്തരീക്ഷ ഘടകങ്ങളും നിലവിലില്ല. ബംഗാൾ ഉൾക്കടലിൽ ഏതാനും ദിവസങ്ങൾ ന്യൂനമർദ്ദം പ്രതീക്ഷിക്കുന്നില്ല.

പസഫിക് സമുദ്രത്തിലെ ന്യൂനമർദ്ദങ്ങളും ഇപ്പോഴത്തെ സാഹചര്യത്തിൽ കേരളത്തെ ബാധിക്കുന്നില്ല. അതിനാൽ കിഴക്കൻ കാറ്റിന്റെ സ്വാധീനം തമിഴ്നാട് മുതൽ കേരളം വരെയുള്ള ഭാഗങ്ങളിൽ ദൃശ്യമായി തുടങ്ങുന്നുണ്ട്.

തുലാവർഷം എത്തുന്നതിന് മുന്നോടിയായുള്ള അന്തരീക്ഷ മാറ്റം

തുലാവർഷം (north east monsoon) എത്തുന്നതിനു മുന്നോടിയായി ഉള്ള അന്തരീക്ഷ മാറ്റമാണ് ഇപ്പോൾ നടക്കുന്നത്. ഇത് ഇടിയോടു കൂടെയുള്ള മഴ നൽകാൻ കാരണമാകും. എന്നാൽ ഇത് തുലാവർഷമായി കണക്കാക്കാൻ കഴിയില്ല. കാലവർഷം പൂർണമായി വിടവാങ്ങിയ ശേഷമേ തുലാവർഷം എത്തുകയുള്ളൂ.

ഇടിമിന്നൽ ജാഗ്രത വേണം

ഇടിമിന്നൽ സാധ്യത പ്രവചിക്കപ്പെടുമ്പോൾ ജാഗ്രത പാലിക്കണം. ഇടിമിന്നൽ ദുരന്തങ്ങൾ രാജ്യത്ത് വർദ്ധിച്ചു വരികയാണ്. ഒരു പ്രദേശത്തെ ഇടിമിന്നൽ സാധ്യത ഏതാനും മിനിറ്റുകൾക്ക് മുമ്പ് മുൻകൂട്ടി പ്രവചിക്കാൻ കഴിയും.

നിങ്ങളുടെ പ്രദേശത്ത് ഇടിമിന്നൽ ഉണ്ടോ എന്ന് അറിയാൻ metbeatnews.com വെബ്സൈറ്റിലെ താഴെ കൊടുത്ത ലിങ്ക് പരിശോധിക്കാം.
ഇടിമിന്നൽ ലക്ഷണങ്ങൾ കണ്ടാൽ ഈ ലിങ്ക് വഴി എവിടെയാണ് മിന്നൽ ഉള്ളതെന്നും എത്ര അകലെയാണ് എന്നും മനസ്സിലാക്കാൻ കഴിയും. നിങ്ങളുടെ പ്രദേശത്ത് അപകടകരമായ മിന്നൽ ആണെങ്കിൽ ചുവന്ന സന്ദേശം ലഭിക്കും. ഇത്തരം സാഹചര്യങ്ങളിൽ കെട്ടിടങ്ങൾക്ക് ഉള്ളിൽ സുരക്ഷിതമായി കഴിയണം.

lightning-strike-map
See lightning strikes in realtime nearby your area. Get free online access. This helps you to track the direction of thunderstorms.
https://metbeatnews.com/page/lightning-strike-map

തുറസായ പ്രദേശങ്ങളിൽ നിൽക്കരുത്. ഉയരം കൂടിയ കെട്ടിടങ്ങൾക്ക് മുകളിലും നിൽക്കരുത്. വരുന്ന തുലാവർഷക്കാലത്തും ഇടിമിന്നൽ ശക്തിപ്പെടാൻ ഉള്ള സാധ്യത കൂടുതലാണ്. കാലാവസ്ഥ മുൻകൂട്ടി മനസ്സിലാക്കുക. സുരക്ഷിതരായിരിക്കുക.

English Summary: Monsoon is weakening, thunderstorms likely from tomorrow