കേരളത്തില്‍ പരക്കെ കാലവര്‍ഷം എത്തി, തമിഴ്‌നാട്ടിലും കര്‍ണാടകയിലും കാലവര്‍ഷമെത്തി

2026 ലെ തെക്കു പടിഞ്ഞാറന്‍ മണ്‍സൂണ്‍ (കാലവര്‍ഷം) കേരളത്തിലും മാഹിയിലും എത്തിയതായി കേന്ദ്ര കാലാവസ്ഥാ വകുപ്പ് പ്രഖ്യാപിച്ചു. കേരളത്തില്‍ പൂര്‍ണമായും കാലവര്‍ഷം വ്യാപിച്ചതായി കാലാവസ്ഥാ വകുപ്പ് ഇന്ന് ഉച്ചയ്ക്കു ശേഷമാണ് പ്രഖ്യാപിച്ചത്. കര്‍ണാടകയിലെ മംഗലാപുരം വരെ കാലവര്‍ഷം വടക്കോട്ട് പുരോഗമിച്ചിട്ടുണ്ട്. സാധാരണ രണ്ടോ മൂന്നോ ദിവസം കൊണ്ടാണ് കാലര്‍ഷം കേരളത്തില്‍ പൂര്‍ണമായി വ്യാപിക്കാറുള്ളത്. കേരളം മുഴുക്കെ ഒരു ദിവസം തന്നെ കാലവര്‍ഷം വ്യാപിച്ച വര്‍ഷങ്ങള്‍ മുന്‍പുമുണ്ടായിട്ടുണ്ട്.

ഇത്തവണ കേരളത്തിനൊപ്പം തമിഴ്‌നാട്, കര്‍ണാടക, കന്യാകുമാരി കടലിന്റെ കൂടുതല്‍ ഭാഗങ്ങള്‍, തെക്കുകിഴക്കന്‍ ബംഗാള്‍ ഉള്‍ക്കടല്‍ കൂടുതല്‍ മേഖലകള്‍ എന്നിവിടങ്ങളില്‍ കാലവര്‍ഷം എത്തിയിട്ടുണ്ട്. കര്‍ണാടകയുടെ കൂടുതല്‍ മേഖലകളിലേക്കും കാലവര്‍ഷം വ്യാപിക്കാന്‍ അനുകൂലമായ അന്തരീക്ഷസ്ഥിതിയാണുള്ളത്.

തമിഴ്‌നാടിന്റെ തെക്കന്‍, പടിഞ്ഞാറന്‍ മേഖലയിലും കാലവര്‍ഷമെത്തി. സാധാരണ കേരളത്തില്‍ കാലവര്‍ഷം എത്തേണ്ട തിയതി ജൂണ്‍ 1 ആണ്. ഇത്തവണ നാലു ദിവസം വൈകിയാണ് കാലവര്‍ഷം മാനദണ്ഡങ്ങള്‍ പൂര്‍ത്തിയാക്കി എത്തിയത്.

കാലവര്‍ഷത്തിന്റെ ഭാഗമായി കേരളത്തിലും കര്‍ണാടകയിലും ശക്തവും അതിശക്തവുമായ മഴ അടുത്ത ഒരാഴ്ചത്തേക്ക് കാലാവസ്ഥാ വകുപ്പ് പ്രഖ്യാപിച്ചിട്ടുണ്ട്. 24 മണിക്കൂറില്‍ 7 - 20 സെ.മി മഴയാണ് അതിശക്തമായ മഴ എന്നതു കൊണ്ട് അര്‍ഥമാക്കുന്നത്.

English Summary :The India Meteorological Department (IMD) has officially announced the arrival of the 2026 Southwest Monsoon across Kerala and Mahe, covering the entire state of Kerala in a single day.