മീശപ്പുലിമലയിൽ നീലക്കുറിഞ്ഞി കാണാൻ പോകുന്നവർ ഇക്കാര്യങ്ങൾ ശ്രദ്ധിക്കൂ; ഇല്ലെങ്കിൽ കർശന നടപടി

മീശപ്പുലിമലയിൽ നീലക്കുറിഞ്ഞി വസന്തം ആസ്വദിക്കാനെത്തുന്ന സഞ്ചാരികൾക്ക് വനംവകുപ്പിന്റെ കർശന നിർദേശങ്ങൾ. നീലക്കുറിഞ്ഞി കാണാനെത്തുന്നവർ വനംവകുപ്പ് നിർദേശിക്കുന്ന പാതയിലൂടെ മാത്രമേ യാത്ര ചെയ്യാവൂ. നിർദേശങ്ങൾ ലംഘിക്കുന്നവർക്കെതിരെ കർശന നടപടി സ്വീകരിക്കുമെന്ന് വനംവകുപ്പ് മുന്നറിയിപ്പ് നൽകി.

നീലക്കുറിഞ്ഞിപ്പൂക്കൾ പറിക്കുന്നതും ചെടികൾ നശിപ്പിക്കുന്നതും ശിക്ഷാർഹമാണ്. പരിസ്ഥിതി സംരക്ഷണത്തിന്റെ ഭാഗമായി പ്ലാസ്റ്റിക് വസ്തുക്കളുടെ ഉപയോഗം നിയന്ത്രിക്കണം. മദ്യം ഉൾപ്പെടെയുള്ള ലഹരിവസ്തുക്കൾക്കും നിരോധനമുണ്ട്. വരയാടുകൾ ഉൾപ്പെടെയുള്ള വന്യമൃഗങ്ങളെയും അപൂർവയിനം തവളകളെയും മറ്റു ജീവികളെയും തൊടാനോ തീറ്റ നൽകാനോ പാടില്ലെന്നും വനംവകുപ്പ് നിർദേശിച്ചു.

നിർബന്ധമാക്കി മുൻകൂർ അനുമതി

മീശപ്പുലിമലയിലെ നീലക്കുറിഞ്ഞി വസന്തം കാണാൻ സഞ്ചാരികൾ മുൻകൂട്ടി ബുക്കിങ് നടത്തണം. ‘കുറിഞ്ഞി’ ആപ്പ് വഴിയോ www.kfdcecotourism.com⁠ വെബ്‌സൈറ്റ് വഴിയോ ബുക്ക് ചെയ്തെത്തുന്നവർക്കു മാത്രമേ പ്രവേശനം അനുവദിക്കൂ. പ്രതിദിനം പരമാവധി 750 പേർക്കാണ് പ്രവേശനം. രാവിലെ ആറുമുതൽ സഞ്ചാരികൾക്ക് പ്രവേശനം ലഭിക്കും.

മൂന്നാർ സൈലന്റ് വാലി റോഡിലെ കോർപ്പറേഷൻ ഓഫീസിൽനിന്ന് 28 കിലോമീറ്റർ അകലെയാണ് മീശപ്പുലിമല. ഇവിടേക്ക് വനംവകുപ്പിന്റെ വാഹനസൗകര്യവും ഒരുക്കിയിട്ടുണ്ട്. ജിഎസ്ടി ഉൾപ്പെടെ ഒരാൾക്ക് 1,475 രൂപയാണ് പ്രവേശനത്തിനും യാത്രയ്ക്കുമുള്ള നിരക്ക്.

സമുദ്രനിരപ്പിൽനിന്ന് 2,640 മീറ്റർ ഉയരത്തിൽ സ്ഥിതിചെയ്യുന്ന മീശപ്പുലിമല ദക്ഷിണേന്ത്യയിലെ രണ്ടാമത്തെ ഉയരം കൂടിയ കൊടുമുടിയാണ്. അപൂർവ സസ്യജാലങ്ങളും വന്യജീവികളും പ്രകൃതിഭംഗിയും നിറഞ്ഞ പ്രദേശത്ത് നീലക്കുറിഞ്ഞി പൂക്കാലം കാണാൻ നിരവധി സഞ്ചാരികളാണ് എത്തുന്നത്.

ടെന്റ് സ്റ്റേയും ഒരുക്കിയിട്ടുണ്ട്

മീശപ്പുലിമലയിൽ രാത്രി താമസിക്കാൻ വനംവകുപ്പ് ടെന്റ് സ്റ്റേ സൗകര്യവും ഒരുക്കിയിട്ടുണ്ട്. 60 പേർക്ക് താമസിക്കാവുന്ന ടെന്റുകളിൽ സ്ലീപ്പിങ് ബാഗുകൾ ഉൾപ്പെടെയുള്ള സൗകര്യങ്ങളുണ്ട്. മൂന്നുനേരത്തെ ഭക്ഷണം ഉൾപ്പെടുന്ന ഇക്കോ ടൂറിസം പാക്കേജിന് ഒരാൾക്ക് 4,500 രൂപയാണ് നിരക്ക്.

ഇതിനുപുറമെ റോഡോ മാൻഷനിൽ 18 പേർക്ക് പ്രത്യേക താമസസൗകര്യവും ലഭ്യമാണ്. പ്രകൃതിസൗന്ദര്യം ആസ്വദിക്കാനെത്തുന്നവർ പരിസ്ഥിതിക്ക് കോട്ടം തട്ടാത്ത രീതിയിൽ പെരുമാറണമെന്നും വന്യജീവികളുടെ സ്വാഭാവിക ആവാസവ്യവസ്ഥ സംരക്ഷിക്കണമെന്നും വനംവകുപ്പ് നിർദേശിക്കുന്നു.

English Summary : The Kerala Forest Department has issued strict safety and environmental guidelines for tourists visiting Meesapulimala to experience the rare Neelakurinji bloom. To protect the delicate ecosystem and wildlife in the region, authorities have made prior online booking mandatory and imposed key rules for all visitors.