5 മാസത്തിനു ശേഷം കേരളത്തിൽ വരണ്ട ദിനാന്തരീക്ഷം പ്രവചിച്ച് കാലാവസ്ഥ വകുപ്പ്

അഞ്ചുമാസത്തിനുശേഷം കേരളത്തിൽ വരണ്ട ദിനാന്തരീക്ഷം (weather) പ്രവചിച്ച് കേന്ദ്ര കാലാവസ്ഥ വകുപ്പ്. ഇന്ന് ഉച്ചയ്ക്കുള്ള അപ്ഡേഷനിലാണ് നാളെയും മറ്റന്നാളും കേരളത്തിൽ വരണ്ട കാലാവസ്ഥ പ്രവചിച്ചിരിക്കുന്നത്. വടക്കൻ ജില്ലകളിൽ ഒറ്റപ്പെട്ട നേരിയ മഴയും മധ്യ തെക്കൻ ജില്ലകളിൽ വരണ്ട ദിനാന്തരീക്ഷം കാലാവസ്ഥാ വകുപ്പിന്റെ മുന്നറിയിപ്പിലുണ്ട്.

ഇന്ന് രാവിലെ Metbeat Weather ൻ്റെ അവലോകനത്തിലും വടക്കൻ ജില്ലകളിൽ നേരിയ ചാറ്റൽ മഴയ്ക്കും മറ്റു ജില്ലകളിൽ വരണ്ട ദിനാന്തരീക്ഷത്തിന്
സാധ്യതയുണ്ടെന്ന് റിപ്പോർട്ട് ചെയ്തിരുന്നു. കാലാവസ്ഥ വകുപ്പിന്റെ പ്രവചനം അനുസരിച്ച് ഇന്ന് (31/10/25) തൃശ്ശൂർ മുതൽ വടക്കോട്ടുള്ള ജില്ലകളിലാണ് പച്ച അലർട്ട് നൽകിയത്.

തിരുവനന്തപുരം,കൊല്ലം, പത്തനംതിട്ട, കോട്ടയം, ഇടുക്കി, ആലപ്പുഴ, എറണാകുളം ജില്ലകളിൽ ഇന്ന് വരണ്ട ദിനാന്തരീക്ഷമാണ് പ്രവചിക്കുന്നത്. കേരളപ്പിറവി ദിനമായ നാളെ എല്ലാ ജില്ലകളിലും വരണ്ട ദിനാന്തരീക്ഷമാണ് പ്രവചനം.

നവംബർ മൂന്നിന് ഒറ്റപ്പെട്ട ചാറ്റൽ മഴ കേരളത്തിൻ്റെ വിവിധ ജില്ലകളിൽ കാലാവസ്ഥ വകുപ്പിന്റെ പ്രവചനത്തിൽ ഉണ്ട്. മേഘങ്ങൾ ഇല്ലാത്ത അവസ്ഥ കേരളത്തിൽ ചൂട് വർധിപ്പിക്കുന്നുണ്ട്. കർഷകർക്ക് കാർഷികവിളകളും മറ്റും ഉണക്കാനും പറമ്പുകളിലെ ജോലികൾ ചെയ്യാനും അനുകൂലമായ അന്തരീക്ഷ സ്ഥിതിയാണ് ഉള്ളത്.

മൻ ത ചുഴലിക്കാറ്റ് ദുർബലമായി നീങ്ങിയതോടെ തുലാവർഷക്കാറ്റിലും ഗതിമാറ്റം ഉണ്ടായി. ഇത് വീണ്ടും പഴയ രൂപത്തിൽ ആയതിനുശേഷം മാത്രമേ കേരളത്തിൽ തുലാവർഷത്തിന്റെ ഭാഗമായുള്ള ഇടിയോടു കൂടെയുള്ള മഴ ലഭിക്കുകയുള്ളൂ. അതുവരെ വരണ്ട ദിനാന്തരീക്ഷമോ, ഒറ്റപ്പെട്ട ചാറ്റൽ മഴയോ ലഭിക്കും.

കേരളത്തിൽ മഴ നൽകാൻ അനുകൂലമായ അന്തരീക്ഷ സ്ഥിതി ഒന്നും ഇപ്പോൾ നിലവിലില്ല.

English Summary: Meteorological Department predicts dry weather in Kerala after 5 months