അംബാനിയുടെ ‘ വൻതാര ' കണ്ട് അമ്പരന്ന് മെസ്സി, മോദിയെ പ്രശംസിച്ച് താരം

ലോക ഫുട്‌ബോള്‍ ഇതിഹാസം ലയണല്‍ മെസ്സി, ഗുജറാത്തിലെ ജാംനഗറിലുള്ള അനന്ത് അംബാനിയുടെ വന്യജീവി സംരക്ഷണ കേന്ദ്രമായ വൻതാര സന്ദർശിച്ചു. ഗോട്ട് ടൂറിന്റെ ഭാഗമായി ഇന്ത്യയിലെത്തിയ മെസ്സി തിങ്കളാഴ്ച ഡൽഹിയിൽ വെച്ച് നടന്ന പരിപാടിക്ക് ശേഷമാണ് ഗുജറാത്തിലേക്ക് പോയത്. ഇവിടെ വമ്പൻ വരവേൽപ്പാണ് മെസ്സിക്ക് ലഭിച്ചത്. എല്ലാ സംരക്ഷണ പ്രവര്‍ത്തനങ്ങളും പ്രകൃതിയോടുള്ള ആത്മീയമായ ആദരവില്‍ നിന്നാണ് ഉത്ഭവിക്കുന്നതെന്ന സന്ദേശം നല്‍കുന്ന ചടങ്ങായിരുന്നു മെസ്സിക്കായി വന്‍താരയില്‍ ഒരുക്കിയത്. സനാതന ധര്‍മ്മത്തിന്റെ കാതലായ ഈ ആശയം, മെസ്സിയുടെ സന്ദര്‍ശനത്തിന് സവിശേഷമായ ഒരു തലം നല്‍കുകയും, ഒരു സാധാരണ സെലിബ്രിറ്റി പര്യടനത്തില്‍ നിന്ന് പ്രകൃതിയോടുള്ള ആദരവില്‍ അധിഷ്ഠിതമായ ഒരു തീര്‍ത്ഥാടനമാക്കി മാറ്റുകയും ചെയ്തു.

വിസ്മയങ്ങളുടെ ലോകം

സഹതാരങ്ങളായ ലൂയിസ് സുവാരസ്, റോഡ്രിഗോ ഡി പോള്‍ എന്നിവരോടൊപ്പം വന്‍താരയിലെത്തിയ മെസ്സിയെ കാത്തിരുന്നത് കാഴ്ചയുടെയും ശബ്ദത്തിന്റെയും വമ്പൻ വിസ്‌മയങ്ങളുടേയും ലോകമായിരുന്നു. ക്ഷേത്രത്തില്‍ നടന്ന മഹാ ആരതിയിലും മെസ്സി പങ്കാളിയായി.

ഹരിതോര്‍ജ്ജ സമുച്ചയവും ലോകത്തിലെ ഏറ്റവും വലിയ റിഫൈനറി കോംപ്ലക്‌സും മെസ്സി സന്ദർശിച്ചു. ഓരോ കേന്ദ്രത്തിലും, വിദഗ്ദ്ധ വെറ്ററിനറി പരിചരണം, ഓരോ മൃഗത്തിനും അനുയോജ്യമായ പോഷകാഹാരം, സ്വഭാവ പരിശീലനം, ശാസ്ത്രീയമായ പരിപാലന രീതികള്‍ എന്നിവ അദ്ദേഹം നിരീക്ഷിച്ചു.

പ്രധാനമന്ത്രിയെ പ്രശംസിച്ചു

വന്യജീവി സംരക്ഷണത്തിനും പരിചരണത്തിനും മുന്‍ഗണന നല്‍കുന്ന പ്രധാനമന്ത്രിയുടെ പ്രതിബദ്ധതയെ മെസ്സി പ്രത്യേകം പ്രശംസിച്ചു. മാത്രമല്ല വൻതാരയെ കുറിച്ചും അവരുടെ പ്രവർത്തനമികവിനെ കുറിച്ചും മെസ്സി പ്രശംസിച്ചു. മെസ്സിയുടെ വാക്കുകൾ ഇങ്ങനെ. വന്‍താര ചെയ്യുന്നത് യഥാര്‍ത്ഥത്തില്‍ മനോഹരമായ ഒരു കാര്യമാണ്. മൃഗങ്ങള്‍ക്കുവേണ്ടിയുള്ള പ്രവര്‍ത്തനം, അവയ്ക്ക് ലഭിക്കുന്ന പരിചരണം, അവയെ രക്ഷിക്കുകയും പരിപാലിക്കുകയും ചെയ്യുന്ന രീതി എന്നിവയെല്ലാം ശരിക്കും പ്രശംസനീയമാണ്. ഞങ്ങള്‍ ഇവിടെ വളരെ സന്തോഷത്തോടെ സമയം ചെലവഴിച്ചു, തികച്ചും സുരക്ഷിതരായിരുന്നു. ഇത് മനസ്സില്‍ തങ്ങിനില്‍ക്കുന്ന ഒരു അനുഭവമാണ്. ഈ പ്രവര്‍ത്തനത്തിന് പ്രചോദനം നല്‍കാനും പിന്തുണയ്ക്കാനും ഞങ്ങള്‍ തീര്‍ച്ചയായും വീണ്ടും വരുമെന്ന് മെസ്സി പറഞ്ഞു.

ഗ്ലോബല്‍ ഹ്യൂമാനിറ്റേറിയന്‍ പുരസ്‌കാരം

അതേസമയം ഈ മാസം വന്യജീവി സംരക്ഷണം മുന്‍നിര്‍ത്തി ഗ്ലോബല്‍ ഹ്യൂമന്‍ സൊസൈറ്റി നല്‍കിയ ഗ്ലോബല്‍ ഹ്യൂമാനിറ്റേറിയന്‍ പുരസ്‌കാരത്തിന് അനന്ദ് അംബാനി അർഹനായിരുന്നു. വന്യജീവി സംരക്ഷണരംഗത്ത് അനന്ത് അംബാനി സ്ഥാപിച്ച 'വന്‍താര' എന്ന സംരംഭത്തിന്റെ പ്രവര്‍ത്തനങ്ങള്‍ കണക്കിലെടുത്താണ് അവാര്‍ഡ് ലഭിച്ചത്.

വന്യജീവി സംരക്ഷണ രംഗത്ത് ഭാരതം മുന്നോട്ടുവെക്കുന്ന പുതിയ മാതൃകയ്ക്കുള്ള ആഗോള അംഗീകാരം കൂടിയാണ് പുരസ്‌കാരം. ഏഷ്യയില്‍ നിന്നും ഈ പുരസ്‌കാരം നേടുന്ന ആദ്യ വ്യക്തിയാണ് അനന്ത്. ഗ്ലോബല്‍ ഹ്യൂമാനിറ്റേറിയന്‍ പുരസ്‌കാരം നേടുന്ന ലോകത്തിലെ ഏറ്റവും പ്രായം കുറഞ്ഞ വ്യക്തി എന്ന ബഹുമതി കൂടി അദ്ദേഹം ഇതിലൂടെ സ്വന്തമാക്കി.

മൃഗക്ഷേമ, സംരക്ഷണ രംഗത്തെ ആഗോള തലത്തില്‍ ശ്രദ്ധിക്കപ്പെട്ട അംഗീകാരങ്ങളിലൊന്നാണ് ഗ്ലോബല്‍ ഹ്യൂമാനിറ്റേറിയന്‍ പുരസകാരം. മൃഗങ്ങളുടേയും മനുഷ്യരുടേയും ക്ഷേമത്തിനായി ആഗോളതലത്തില്‍ പരിവര്‍ത്തനാത്മകമായ സ്വാധീനം സൃഷ്ടിച്ച വ്യക്തികള്‍ക്കാണ് ഈ പുരസ്‌കാരം നല്‍കുന്നത്.

English Summary : Messi praises the Prime Minister's commitment to wildlife conservation, highlighting the beauty of efforts to protect and care for animals. A must-read