സൗദിയിൽ കനത്ത മഴയ്ക്ക് സാധ്യത; വിവിധ മേഖലകളിൽ ജാഗ്രത നിർദ്ദേശം

സൗദി അറേബ്യ(Saudi Arabia)യിലെ വിവിധ മേഖലകളിൽ വെള്ളിയാഴ്ച വരെ മഴയ്ക്ക് സാധ്യത. കനത്ത മഴയ്ക്കും ആലിപ്പഴ വർഷത്തിനും ശക്തമായ കാറ്റിനും പ്രാദേശിക പ്രളയത്തിനും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം മുന്നറിയിപ്പ് നൽകി. ജിസാൻ, അസീർ, അൽ ബാഹ മേഖലകളിലാണ് ശക്തമായ മഴയ്ക്ക് കൂടുതൽ സാധ്യത. മണിക്കൂറിൽ 60 കിലോമീറ്ററിലധികം വേഗതയിൽ ശക്തമായ കാറ്റിനും സാധ്യതയുണ്ട്.

ശക്തമായ മഴ വാഹനയാത്രയിൽ കാഴ്ചപരിധിക്ക് കാരണമാകാം. പൂജ്യത്തിലേക്ക് വരെ താഴ്ന്നേക്കാം. ആലിപ്പഴ വീഴ്ച്ചയ്ക്കും ചില മേഖലകളിൽ വെള്ളപ്പൊക്കത്തിനും സാധ്യതയുണ്ട്. തീരപ്രദേശങ്ങളിൽ കടൽ പ്രക്ഷുബ്ധമാകാം. ചിലയിടങ്ങളിൽ വാട്ടർ സ്പൗട്ടുകൾ ഉൾപ്പെടെയുള്ള പ്രതിഭാസങ്ങൾ രൂപപ്പെടാനും സാധ്യതയുണ്ടെന്നാണ് മുന്നറിയിപ്പ്.

ശക്തമായ മഴയ്ക്ക് സാധ്യത

അസീർ മേഖലയിലും അബ്ഹ, ഖമീസ് മുഷൈത്ത്, അഹദ് റഫീദ, സറാത്ത് അബീദ, അൽ നമാസ്, തനൂമ, റിജാൽ അൽമാ, മഹായിൽ അസീർ തുടങ്ങിയ പ്രദേശങ്ങളിൽ മഴ ശക്തമാകാം. ഞായറാഴ്ചയും വെള്ളിയാഴ്ചയും ഇവിടെ കൂടുതൽ ശക്തമായ മഴയ്ക്ക് സാധ്യതയുണ്ടെന്നാണ് പ്രവചനം. അൽ ബാഹയിലും മഴ ലഭിക്കും.

അൽ ബാഹ നഗരം, ബൽജുറഷി, അൽ-മൻദഖ്, ഖിൽവ, ബനി ഹസൻ തുടങ്ങിയ പ്രദേശങ്ങളിലാണ് മഴ പ്രതീക്ഷിക്കുന്നത്. മക്ക മേഖലയിലും മഴയ്ക്ക് സാധ്യതയുണ്ട്. തായിഫ്, മൈസാൻ, അദം, അൽ അർദിയാത്ത് എന്നിവിടങ്ങളിൽ നേരിയതോ മിതമായതോ ആയ മഴ ലഭിക്കാം. അൽ കാമിൽ, ബഹ്റ, അൽ ജുമൂം, ഖുലൈസ് മേഖലകളിൽ മിതമായതോ ശക്തമായതോ ആയ മഴയ്ക്ക് കൂടുതൽ സാധ്യതയുണ്ട്. മദീന, അൽ ഉല, ഖൈബർ, നജ്റാൻ എന്നിവിടങ്ങളിൽ നേരിയ മഴയ്ക്കും സാധ്യതയുണ്ട്.

പ്രളയസാധ്യതയുള്ള പ്രദേശങ്ങളിലുള്ളവർ ഔദ്യോഗിക കാലാവസ്ഥാ മുന്നറിയിപ്പുകൾ നിരീക്ഷിക്കണമെന്നും അധികൃതരുടെ നിർദേശങ്ങൾ കർശനമായി പാലിക്കണമെന്നും ദേശീയ കാലാവസ്ഥാ കേന്ദ്രം നിർദേശിച്ചു.

English Summary : Saudi Arabia’s National Center of Meteorology (NCM) has issued a severe weather alert warning of heavy rainfall, flash floods, hail, and high winds exceeding 60 km/h across various regions, including Jizan, Asir, Al-Baha, Makkah, and Madinah, until Friday. Residents and motorists are urged to follow official safety guidelines and avoid flood-prone areas.