അർണബ് ചുഴലിക്കാറ്റിന്റെ ആഘാതം; ചെന്നൈയിൽ കടൽക്ഷോഭം, കടൽവെള്ളം റോഡിലേക്ക് കയറി

അർണബ് ചുഴലിക്കാറ്റിന്റെ ആഘാതത്തിൽ ചെന്നൈ തീരമേഖലയിൽ കടൽക്ഷോഭം രൂക്ഷമായി. വടക്കൻ ചെന്നൈയിലെ എണ്ണൂരിലുള്ള ഭാരതിയാർ നഗർ പ്രദേശത്ത് ഇന്നലെ രാത്രി കടൽ തിരമാലകൾ ആഞ്ഞടിച്ച് റോഡിലേക്ക് കടൽവെള്ളം കയറി. എണ്ണൂർ, പട്ടിനപ്പാക്കം മേഖലകളിലാണ് കടൽ പ്രക്ഷുബ്ധമായത്.

ആന്ധ്രാപ്രദേശിലെ കാക്കിനഡ ജില്ലയിൽ യാനത്തിന് സമീപം ഇന്ന് പുലർച്ചെ രണ്ടിനും നാലിനും ഇടയിലാണ് അർണബ് ചുഴലിക്കാറ്റ് തീരം കടന്നത്. തീരം കടക്കുന്ന സമയത്ത് മണിക്കൂറിൽ 150 കിലോമീറ്റർ വേഗതയിൽ കാറ്റ് വീശിയതായാണ് റിപ്പോർട്ട്. ഇതിന്റെ സ്വാധീനമാണ് ചെന്നൈയുടെ തീരമേഖലകളിലും കടൽക്ഷോഭം ശക്തമാകാൻ കാരണമായത്.

വാഹനയാത്രക്കാർ ഭീതിയിലായി

എണ്ണൂരിലെ ഭാരതിയാർ നഗർ തീരത്ത് ശക്തമായ തിരമാലകൾ പാറകളിൽ ആഞ്ഞടിച്ച് റോഡിലേക്ക് തെറിച്ചുവീണു. തിരമാലകളിൽ റോഡിൽ കടൽവെള്ളം അടിഞ്ഞതോടെ ഇതുവഴി യാത്ര ചെയ്യുന്ന വാഹനയാത്രക്കാർ ഭീതിയിലായി. കടൽവെള്ളം റോഡിലേക്ക് കയറുന്നതിനാൽ ഏറെ ജാഗ്രതയോടെയാണ് യാത്ര ചെയ്യുന്നതെന്ന് വാഹനയാത്രക്കാർ പറഞ്ഞു.

Cyclone Arnab El Niño Role : അർണബിന്റെ അതിവേഗ ശക്തിവർധനയ്ക്ക് കാരണം എൽനീനോ സ്വാധീനമോ?
ബംഗാൾ ഉൾക്കടലിൽ രൂപപ്പെട്ട അർണബ് ചുഴലിക്കാറ്റിന്റെ അതിവേഗത്തിലുള്ള ശക്തിവർധനയ്ക്കിടെ എൽനീനോ പ്രതിഭാസവും ചർച്ചയാകുന്നു.
https://metbeatnews.com/did-el-nino-trigger-cyclone-arnabs-rapid-intensification-climate-experts-weigh-i

പട്ടിനപ്പാക്കം തീരത്തും പതിവിലും വലിയ തിരമാലകൾ രൂപപ്പെട്ടതോടെ കടൽക്ഷോഭം രൂക്ഷമായി. സുരക്ഷാ മുൻകരുതലിന്റെ ഭാഗമായി പ്രദേശത്തെ മത്സ്യത്തൊഴിലാളികൾ ബോട്ടുകൾ കടലിലിറക്കാതെ തീരത്ത് സുരക്ഷിതമായി കെട്ടിയിട്ടിരിക്കുകയാണ്. ചുഴലിക്കാറ്റിന്റെ സ്വാധീനത്തിൽ തീരമേഖലകളിൽ കടൽ പ്രക്ഷുബ്ധമായതോടെ ജനങ്ങൾ ജാഗ്രത പാലിക്കുകയാണ്.

English Summary : Cyclone Arnab made landfall between 2:00 AM and 4:00 AM near Yanam in Kakinada district, Andhra Pradesh, packed with winds reaching speeds up to 150 km/h.