ഇന്ത്യ നല്‍കിയ പ്രളയ മുന്നറിയിപ്പിനെ തുടര്‍ന്ന് പാകിസ്ഥാനില്‍ 48 മണിക്കൂറിനിടെ മൂന്നു ലക്ഷം പേരെ മാറ്റിപാര്‍പ്പിച്ചു. പഞ്ചാബ് പ്രവിശ്യയില്‍ പ്രളയമുണ്ടാകുമെന്നാണ് മുന്നറിയിപ്പ്. കഴിഞ്ഞ മാസം മുതല്‍ 13 ലക്ഷം പേരെയാണ് പാകിസ്ഥാനില്‍ മഴക്കെടുതികളുടെ പശ്ചാത്തലത്തില്‍ മാറ്റിപാര്‍പ്പിച്ചത്.

ബുധനാഴ്ചയാണ് പാകിസ്ഥാനില്‍ പ്രളയ സാധ്യതയുണ്ടെന്ന മുന്നറിയിപ്പ് ഇന്ത്യ നയതന്ത്ര ചാനല്‍ വഴി പാകിസ്ഥാന്‍ ഉദ്യോഗസ്ഥരെ അറിയിച്ചതെന്ന് പഞ്ചാബ് പ്രവിശ്യാ ദുരന്ത നിവാരണ അതോറിറ്റി ഡയരക്ടര്‍ ജനറല്‍ അര്‍ഫാന്‍ അലി ഖാത്തിയ പറഞ്ഞു.

പഞ്ചാബ് പ്രവിശ്യയിലെ മുസാഫര്‍ഗഡ് ജില്ലയിലെ 12 ലേറെ ഗ്രാമങ്ങള്‍ വെള്ളത്തിനടിയിലാണ്. നേരത്തെ സിയാല്‍കോട്ട്, നരോവല്‍ ഗ്രാമങ്ങളിലായിരുന്നു പ്രളയമുണ്ടായത്. ഈ രണ്ടു ഗ്രാമങ്ങളും ഇന്ത്യന്‍ അതിര്‍ത്തിയോട് ചേര്‍ന്നു നില്‍ക്കുന്നവയാണ്.

പ്രളയ ജലം കൃഷിയിടത്തിലേക്ക് പ്രവേശിക്കാതെ തിരിച്ചുവിടാനാണ് അധികൃതര്‍ ശ്രമിക്കുന്നത്. പ്രധാന നഗരങ്ങളിലേക്ക് വെള്ളം കയറുന്നതും തടയാന്‍ ശ്രമിക്കുന്നുണ്ട്.

കിഴക്കന്‍ പാകിസ്ഥാനിലും വടക്കുപടിഞ്ഞാറന്‍ ഇന്ത്യയിലുമാണ് പ്രളയം നാശംവിതച്ചത്. പഞ്ചാബ് പ്രവിശ്യയുടെ ചരിത്രത്തില്‍ ഏറ്റവും വലിയ രക്ഷാപ്രവര്‍ത്തനമാണ് നടക്കുന്നതെന്ന് പാക് മാധ്യമങ്ങള്‍ റിപ്പോര്‍ട്ട് ചെയ്യുന്നു.

കശ്മിരില്‍ കനത്ത മഴയെ തുടര്‍ന്ന് ഡാമുകള്‍ നിറഞ്ഞ സാഹചര്യത്തില്‍ 24 മണിക്കൂറിനിടെ രണ്ടു തവണയാണ് ഇന്ത്യ പാകിസ്ഥാന് പ്രളയ മുന്നറിയിപ്പ് നല്‍കിയത്. ബോട്ടുകളും മറ്റും ഉപയോഗിച്ചാണ് പാകിസ്ഥാനില്‍ രക്ഷാപ്രവര്‍ത്തനം നടക്കുന്നത്.

വീടിന്റെ മേല്‍ക്കൂരയില്‍ ഒറ്റപ്പെട്ടു പോയവരെ കണ്ടെത്താന്‍ ഡ്രോണുകളും ഉപയോഗിക്കുന്നുണ്ട്. 33,000 ഗ്രാമങ്ങളിലായി 33 ലക്ഷം പേരാണ് പഞ്ചാബ് പ്രവിശ്യയില്‍ താമസിക്കുന്നത്. പഞ്ചാബ് പ്രവിശ്യാ മുഖ്യമന്ത്രി മറിയം നവാസ് ശരീഫ് പ്രളയ ബാധിത പ്രദേശങ്ങള്‍ സന്ദര്‍ശിച്ചു. 40,000 പേരാണ് ഇവിടെ ദുരിതാശ്വാസ കേന്ദ്രത്തിലുള്ളതെന്നാണ് ദേശീയ ദുരന്ത നിവാരണ അതോറിറ്റിയുടെ കണക്ക്.

ഇന്ത്യയിലെ പഞ്ചാബില്‍ കഴിഞ്ഞ ദിവസത്തെ പ്രളയത്തെ തുടര്‍ന്ന് 30 പേര്‍ മരിച്ചിരുന്നു. ഓഗസ്റ്റ് 1 മുതല്‍ 20,000 പേരെയാണ് മാറ്റിപാര്‍പ്പിച്ചത്.

Metbeat News