ന്യൂനമർദ്ദങ്ങൾ ഒഴിഞ്ഞു, ആകാശം തെളിഞ്ഞു , തണുപ്പ് കൂടി തുടങ്ങി

ശൈത്യകാലത്തിന്റെ വരവറിയിച്ച്‌ കാലാവസ്ഥയിൽ മാറ്റം. പല ജില്ലകളിലും രാത്രിയും പുലർച്ചെയും അന്തരീക്ഷ താപനിലയിൽ കുറവ് രേഖപ്പെടുത്തി. ന്യൂനമർദ്ദങ്ങളും ചുഴലിക്കാറ്റുകളും ഒഴിഞ്ഞതോടെ ദക്ഷിണേന്ത്യയിൽ തെളിഞ്ഞ കാലാവസ്ഥ അനുഭവപ്പെടുകയാണ്. ഇന്ന് രാവിലെ ഉള്ള ഉപഗ്രഹ ചിത്രത്തിലും മേഘങ്ങൾ ഇല്ലാത്ത അന്തരീക്ഷം ആണുള്ളത്. ഇത് പകൽ ചൂട് വർധിപ്പിക്കാനും രാത്രിയിൽ തണുപ്പിനും കാരണമാകും.

മൂന്നാറിൽ വ്യാഴാഴ്ച അതിരാവിലെ താപനില 8.2 ഡിഗ്രി സെൽഷ്യസ് എത്തി. വയനാട് ജില്ലയിലെ കൽപ്പറ്റ, ഇടുക്കി ജില്ലയിലെ വട്ടവട എന്നിവിടങ്ങളിൽ താപനില 15.9 ഡിഗ്രി സെൽഷ്യസിൽ എത്തി. പൊന്മുടിയിൽ 18.8 ഉം അതിരപ്പള്ളിയിൽ 20.4 ഉം കൊല്ലങ്കോട് 21.7 ഡിഗ്രി സെൽഷ്യസും രേഖപ്പെടുത്തി.
തുലാവർഷം ദുർബലമായി തുടരുന്നതുകൊണ്ടാണ് തണുപ്പ് അനുഭവപ്പെടുന്നത്.

ഉത്തരേന്ത്യയിലും തണുപ്പ് അനുഭവപ്പെട്ടു തുടങ്ങിയിട്ടുണ്ട്. വടക്കു കിഴക്കൻ കാറ്റ് കേരളത്തിലേക്ക് പ്രവേശിക്കുന്നതാണ് തണുപ്പിന് കാരണം. ബംഗാൾ ഉൾക്കടലിൽ കഴിഞ്ഞ ദിവസം രൂപപ്പെട്ട ന്യൂനമർദ്ദം ആൻഡമാൻ കടലിലാണ് ഇപ്പോൾ ഉള്ളത്. അത് ആ മേഖലയിൽ വച്ച് തന്നെ വീണ്ടും ശക്തിപ്പെട്ടു തീവ്ര ന്യൂനമർദ്ദമായി ( Depression) മാറും. തുടർന്ന് ആന്ധ്രപ്രദേശ് തീരത്തേക്ക് നീങ്ങും. ഇതോടെ കാറ്റിന്റെ ഗതിയിലും മാറ്റം വരും.

അതിനാൽ ഏതാനും ദിവസം കൂടി തണുപ്പ് തുടരാനാണ് സാധ്യത. അതിനുശേഷം ന്യൂനമർദ്ദത്തിന്റെ ഭാഗമായ മഴ ദക്ഷിണേന്ത്യയിൽ ലഭിക്കും. ഇപ്പോഴത്തെ തണുപ്പ് താൽക്കാലികമായ പ്രതിഭാസം ആണെങ്കിലും ന്യൂനമർദ്ദങ്ങളും മറ്റും വിട്ടുനിൽക്കുന്നതോടെ വീണ്ടും തണുപ്പെത്തും .

English Summary : Weather patterns in Kerala indicate the onset of winter as low-pressure systems and cyclones clear out, leaving clear skies across South India. This atmospheric shift is causing warmer daytime temperatures and a noticeable drop in night and early morning temperatures. High-altitude regions like Munnar recorded temperatures as low as 8.2°C, while Kalpetta and Vattavada dipped to 15.9°C.