വടക്കു പടിഞ്ഞാറന്‍ ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദം കാരണം കേരളത്തില്‍ ഒറ്റപ്പെട്ട മഴ തുടരും. പശ്ചിമബംഗാളിനും വടക്കന്‍ ഒഡിഷ തീരത്തോടും ചേര്‍ന്നാണ് ന്യൂനമര്‍ദം സ്ഥിതി ചെയ്യുന്നത്. ഈ സിസ്റ്റം കേരളത്തിന്റെ കാലാവസ്ഥയെ പ്രതികൂലമായി ബാധിക്കില്ല, വെയിലും മഴയും ഇടവിട്ടുണ്ടാകും. ദിവസം ഒന്നോ രണ്ടോ മഴ പ്രതീക്ഷിക്കാം. എന്നതില്‍ കവിഞ്ഞ് കൂടുതല്‍ മഴക്ക് സാധ്യതയില്ല.

ന്യൂനമര്‍ദത്തെ തുടര്‍ന്ന് ഒഡിഷയില്‍ കേന്ദ്ര കാലാവസ്ഥാ വകുപ്പ് റെഡ് അലര്‍ട്ട് പ്രഖ്യാപിച്ചു. അയല്‍ സംസ്ഥാനമായ ചത്തീസ്ഗഡില്‍ ഓറഞ്ച് അലര്‍ട്ടും പ്രഖ്യാപിച്ചിട്ടുണ്ട്. കേരളം ഉള്‍പ്പെടെ ദക്ഷിണേന്ത്യന്‍ സംസ്ഥാനങ്ങളില്‍ പച്ച അലര്‍ട്ടാണുള്ളത്.

അടുത്ത 3 മണിക്കൂറില്‍ കേരളത്തിലെ തിരുവനന്തപുരം, ആലപ്പുഴ ജില്ലകളില്‍ ഒറ്റപ്പെട്ടയിടങ്ങളില്‍ ഇടത്തരം മഴയ്ക്കും മണിക്കൂറില്‍ 30 40 കിലോമീറ്റര്‍ വരെ വേഗതയില്‍ ശക്തമായ കാറ്റിനും, കൊല്ലം, പത്തനംതിട്ട, കോട്ടയം, ഇടുക്കി, എറണാകുളം, തൃശൂര്‍ ജില്ലകളില്‍ ഒറ്റപ്പെട്ടയിടങ്ങളില്‍ നേരിയ/ഇടത്തരം മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

കള്ളക്കടല്‍ പ്രതിഭാസത്തിന്റെ ഭാഗമായി തിരുവനന്തപുരം (കാപ്പില്‍ മുതല്‍ പൊഴിയൂര്‍ വരെ), കൊല്ലം (ആലപ്പാട്ട് മുതല്‍ ഇടവ വരെ), ആലപ്പുഴ (ചെല്ലാനം മുതല്‍ അഴീക്കല്‍ ജെട്ടി വരെ), എറണാകുളം (മുനമ്പം FH മുതല്‍ മറുവക്കാട് വരെ), തൃശൂര്‍ (ആറ്റുപുറം മുതല്‍ കൊടുങ്ങല്ലൂര്‍ വരെ) ജില്ലകളിലെ തീരങ്ങളില്‍ നാളെ (30/08/2026) വൈകുന്നേരം 05.30 മുതല്‍ 31/08/2026 രാത്രി 11.30 വരെ 0.6 മുതല്‍ 1.2 മീറ്റര്‍ വരെ ഉയര്‍ന്ന തിരമാലകള്‍ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.

Photo : Nidhish Krishnan

English SUMMARY: Low-Pressure System: Isolated Rain in Kerala, 'Kallakkadal' Alert Issued . Due to the formation of a low-pressure area, Kerala is expected to experience isolated rainfall. Weather authorities have also issued a 'Kallakkadal' (swell wave) alert for coastal regions, advising fishermen and coastal residents to exercise caution against unusual swell waves and high sea conditions.