ന്യൂനമർദ്ദം തീവ്ര ന്യൂനമർദ്ദമായി; ചുഴലിക്കാറ്റ് സാധ്യത കുറഞ്ഞു, കേരളത്തിലെ മഴ വിവരങ്ങൾ

കഴിഞ്ഞദിവസം ബംഗാൾ ഉൾക്കടലിൽ രൂപപ്പെട്ട ന്യൂനമർദ്ദം ശക്തിപ്പെട്ട് തീവ്ര ന്യൂനമർദ്ദം (Depression) ആയി. അടുത്ത 24 മണിക്കൂറിൽ വീണ്ടും ശക്തിപ്പെട്ടു അതി തീവ്ര ന്യൂനമർദ്ദം ( Deep Depression) ആകും. ഈ സിസ്റ്റം അർണബ് ചുഴലിക്കാറ്റ് ആകാനുള്ള സാധ്യത കുറഞ്ഞു. അതിതീവ്ര ന്യൂനമർദ്ദമായ ശേഷം തെക്കൻ ഒഡീഷക്കും വടക്കൻ ആന്ധ്രപ്രദേശിനും ഇടയിൽ കരകയറാനാണ് സാധ്യത.

നിലവിൽ സിസ്റ്റം ഒഡിഷക്ക് തെക്കു കിഴക്ക് ഗോപാൽപൂരിൽ നിന്ന് 250 കിലോമീറ്ററും പുരിയിൽ നിന്ന് 270 കിലോമീറ്ററും, ആന്ധ്രപ്രദേശിലെ കലിംഗ പട്ടണത്തുനിന്ന് 330 കിലോമീറ്ററും വിശാഖപട്ടണത്തുനിന്ന് 410 കിലോമീറ്ററും അകലെയാണ് സിസ്റ്റം സ്ഥിതി ചെയ്യുന്നത്.

സെപ്റ്റംബർ 23ന് രാത്രിയോ, 24ന് പുലർച്ചയോ വിശാഖപട്ടണത്തിനും ഗോപാൽപുരത്തിനും ഇടയിൽ കരകയറാനാണ് സാധ്യത. തുടർന്ന് മധ്യ ഇന്ത്യയിലേക്ക് സഞ്ചരിക്കും.

കേരളത്തിലെ മഴ

കഴിഞ്ഞദിവസം ന്യൂനമർദ്ദം രൂപപ്പെട്ട ശേഷം കേരളത്തിൽ ലഭിച്ച മഴ ഇനിയുള്ള ദിവസങ്ങളിൽ കുറയും . വടക്കൻ കേരളം മഴ ഗണ്യമായി കുറവായിരിക്കും. പകൽ ചൂട് കൂടും. രാത്രിയിലും താപനിലയിൽ വർദ്ധനവ് ഉണ്ടാകും.

മധ്യകേരളത്തിൽ സമ്മിശ്രമായ കാലാവസ്ഥ. പകൽ വെയിൽ ആണെങ്കിലും വൈകിട്ടും രാത്രിയും ചിലയിടങ്ങളിൽ മഴ ലഭിക്കും. വടക്കൻ കേരളത്തെ അപേക്ഷിച്ച് ചൂടിന് കുറവുണ്ടാകും.

തെക്കൻ ജില്ലകളിൽ മഴ സാധ്യത നിലനിൽക്കുന്നു. കഴിഞ്ഞ ദിവസത്തെ പോലെ ശക്തമായ മഴ ഉണ്ടാകില്ലെങ്കിലും, ഒന്നോ രണ്ടോ മഴ പ്രതീക്ഷിക്കാം. രാത്രിയിലും വൈകിട്ടും ചിലപ്പോൾ രാവിലെയും മഴ ലഭിക്കും. താപനിലയിൽ കുറവ് അനുഭവപ്പെടും.

അറബിക്കടലിൽ മേഘങ്ങൾ രൂപപ്പെടുന്നുണ്ടെങ്കിലും, കൂടുതലും കടലിൽ തന്നെ മഴയായി പെയ്തു പോകും. കാറ്റ് പൂർണമായി അനുകൂലമല്ലാത്തതാണ് കാരണം. ന്യൂനമർദ്ദം ശക്തിപ്പെട്ട് തീരത്തേക്ക് അടുക്കുന്തോറും കേരളത്തിലെ കാറ്റിൻ്റെ പാറ്റേണിലും വ്യത്യാസവും വരും.

കാറ്റ് തീരത്തിന് സമാന്തരമായി പോകുന്നതിനാൽ ആണ് മഴ കുറയുന്നത്. അല്ലാതെ മേഘങ്ങളുടെ രൂപീകരണതോണ്ട് കുറവുമൂലം മാത്രമല്ല. ന്യൂനമർദ്ദം കരകയറിയാലും കേരളത്തിൽ മഴയ്ക്ക് സാധ്യത കുറവാണ്.

English Summary : Low-Pressure System Intensifies into Deep Depression; Cyclone Unlikely, Rain to Decrease in Kerala.