ന്യൂനമർദ്ദം ശക്തമായി, ബുർജ് ഖലീഫയിൽ മിന്നൽ പിണരുകൾ

ലോകത്തിലെ ഏറ്റവും ഉയരം കൂടിയ കെട്ടിടമായ ദുബായിലെ ബുർജ് ഖലീഫയിൽ മിന്നൽ പിണരുകൾ പതിക്കുന്ന ദൃശ്യം പങ്കുവെച്ച് ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് അൽ മക്തൂം. യുഎഇയിൽ "അൽ ബഷായർ' ന്യൂനമർദ്ദം ശക്തമായതിനെത്തുടർന്ന് വ്യാഴാഴ്ച അനുഭവപ്പെട്ട കനത്ത മഴയ്ക്കിടെയാണ് ബുർജ് ഖലീഫയ്ക്ക് മുകളിൽ മിന്നൽ ഏറ്റത്. ബുർജ് ഖലീഫയുടെ മുകളിൽ അതിശക്തമായ മിന്നൽ പിണർ പതിക്കുന്ന ദൃശ്യങ്ങളാണ് ഷെയ്ഖ് ഹംദാൻ സമൂഹമാധ്യമത്തിൽ പങ്കുവെച്ചത്.

Instagram

https://www.instagram.com/reel/DSZpLS0iR1a/?utm_source=ig_web_copy_link

വരും ദിവസങ്ങളിൽ മഴ ശക്തമാകുമെന്ന് മുന്നറിയിപ്പ് നൽകിക്കൊണ്ട് ബുധനാഴ്‌ചയും അദ്ദേഹം മേഘങ്ങളുടെ സഞ്ചാരപഥം വ്യക്തമാക്കുന്ന കാലാവസ്‌ഥാ ഭൂപടം പങ്കുവെച്ചിരുന്നു.ദേശീയ കാലാവസ്‌ഥാ നിരീക്ഷണ കേന്ദ്രത്തിന്റെ റിപ്പോർട്ട് പ്രകാരം യുഎഇയിൽ നിലവിലുള്ള 'അൽ ബഷായർ' ന്യൂനമർദ്ദം അതിന്റെ പാരമ്യത്തിലെത്തും. ഷാർജയിലും റാസൽഖൈമയിലും കഴിഞ്ഞദിവസം രാവിലെ മുതൽ കനത്ത മഴയും ആലിപ്പഴ വീഴ്ചയും റിപ്പോർട്ട് ചെയ്തിട്ടുണ്ട്. എന്നാൽ ഇതിനേക്കാൾ ശക്തമായ രണ്ടാമത്തെ മഴമേഘങ്ങൾ വൈകിട്ടോടെ അബുദാബിയിലേക്കും ദുബായിലേക്കും നീങ്ങുകയായിരുന്നു.
റെഡ് സീയിൽ നിന്നുള്ള ഉപരിതല ന്യൂനമർദ്ദത്തിൻ്റെ സ്വാധീനഫലമായി ഇടിമിന്നലോടും കാറ്റോടും കൂടിയ മഴ വരും ദിവസങ്ങളിലും തുടരുമെന്ന് അധികൃതർ വ്യക്തമാക്കി.

വ്യാപകമായ നാശനഷ്‌ട്ടം

എമിറേറ്റിന്റെ വിവിധ ഭാഗങ്ങളിൽ അനുഭവപ്പെട്ട കാറ്റിലും മഴയിലും ആലിപ്പഴ വർഷത്തിലും വ്യാപകമായ നാശനഷ്ടമുണ്ടായി. താഴ്ന്ന പ്രദേശങ്ങളിൽ വെള്ളക്കെട്ട് രൂക്ഷമായി. ഒട്ടേറെ മരങ്ങൾ കടപുഴകി. വിവിധ സ്ഥാപനങ്ങളുടെ ഡിസ്പ്ലേ ബോർഡുകൾ പറന്നുവീണ് ഏതാനും വാഹനങ്ങൾക്ക് കേടുപാടുണ്ടായി. ഓഫിസ്, താമസ കെട്ടിടങ്ങൾക്കും സാരമായ കേടുപാടുകളുണ്ട്. പുറംജോലി തൊഴിലാളികളെയും വാഹനയാത്രക്കാരെയും മഴ ദുരിതത്തിലാക്കി. പലയിടങ്ങളിലും മോട്ടർ ഉപയോഗിച്ച് പമ്പ് ചെയ്ത് വെള്ളക്കെട്ട് നീക്കുന്ന പ്രവർത്തനങ്ങൾ നഗരസഭയുടെ നേതൃത്വത്തിൽ പുരോഗമിക്കുകയാണ്. മുൻകരുതലിന്റെ ഭാഗമായി 2 ദിവസത്തേക്ക് ദുബായിലെ എല്ലാ പാർക്കുകളും ബീച്ചുകളും അടച്ചു. ദുബായിലെയും ഷാർജയിലെയും സഫാരി പാർക്കുകളും അടച്ചു. മഴ ശക്തമായതോട ദുബായുടെ ചില ഭാഗങ്ങളിൽ ട്രാഫിക് സിഗ്നൽ പ്രവത്തന രഹിതമായി.

English Summary : Severe weather in the Emirates has caused widespread damage, with flooding in low areas and fallen trees. Municipalities are actively managing water removal efforts.