ബംഗാള്‍ ഉള്‍ക്കടലില്‍ ന്യൂനമര്‍ദം ശക്തിപ്പെട്ടു; നാളെ തീവ്ര ന്യൂനമര്‍ദമായേക്കും

വടക്കന്‍ ബംഗാള്‍ ഉള്‍ക്കടലില്‍ ഇന്ന് പുലര്‍ച്ചെ രൂപപ്പെട്ട ന്യൂനമര്‍ദം ശക്തിപ്പെട്ട് ശക്തികൂടിയ ന്യൂനമര്‍ദം ( well marked low pressure - WML) ആയി വൈകിട്ടോടെ ശക്തിപ്പെട്ടു. ഈ സിസ്റ്റം വീണ്ടും ശക്തിപ്പെട്ട് തീവ്രന്യൂനമര്‍ദം (Depression ) ആകുമെന്നാണ് ഇന്ന് രാത്രിയിലെ പുതുക്കിയ പ്രവചനത്തിലുള്ളത്. കനത്ത മഴ സാധ്യതയുള്ളതിനാല്‍ ഒഡിഷയില്‍ കാലാവസ്ഥാ വകുപ്പ് റെഡ് അലര്‍ട്ട് പ്രഖ്യാപിച്ചു. നിലവില്‍ പശ്ചിമബംഗാളിന്റെയും ബംഗ്ലാദേശിന്റെയും തീരത്താണ് സിസ്റ്റം സ്ഥിതി ചെയ്യുന്നത്.

ഇന്ത്യയുടെ കിഴക്കന്‍ തീരങ്ങളായ ആന്ധ്രാപ്രദേശ്, ഒഡിഷ, ബംഗാള്‍ എന്നിവിടങ്ങളില്‍ കനത്ത മഴയ്ക്ക് ഈ സിസ്റ്റം കാരണമാകും. കിഴക്കന്‍ തീരത്ത് അതിശക്തമായ മഴയും മണിക്കൂറില്‍ 40 മുതല്‍ 60 കി.മി വേഗത്തിലുള്ള കാറ്റും പ്രതീക്ഷിക്കാമെന്ന് കാലാവസ്ഥാ വകുപ്പിന്റെ ബുള്ളറ്റിനില്‍ പറയുന്നു.

കടലില്‍ 40 മുതല്‍ 50 കി.മി വേഗത്തിലുള്ള കാറ്റുണ്ടാകും. ചില സമയത്ത് കാറ്റിന്റെ വേഗത 60 കി.മി എത്തും.

ഏതെല്ലാം സംസ്ഥാനങ്ങളില്‍ മഴ

ഒഡിഷ, ബംഗാള്‍, ഛത്തീസ്ഗഡ്, ജാര്‍ഖണ്ഡ്.

കേരളത്തിലെ മഴ സാധ്യത

ഇപ്പോഴത്തെ ന്യൂനമര്‍ദം നാളെയോടെ വീണ്ടും ശക്തിപ്പെട്ട് തീവ്രന്യൂനമര്‍ദം ആയാലും കേരളത്തില്‍ കനത്ത മഴയ്ക്ക് സാധ്യതയില്ലെന്ന് മെറ്റ്ബീറ്റ് വെതര്‍ പറയുന്നു. കേരളത്തില്‍ ഈ സിസ്റ്റം പുള്‍ എഫക്ട് മഴ നല്‍കില്ല. എങ്കിലും ചിലയിടങ്ങളില്‍ ഒറ്റപ്പെട്ട ഇടത്തരം, ശക്തമായ മഴ ലഭിച്ചേക്കും. പൊതുവെ പ്രസന്നമായ കാലാവസ്ഥയാണ് ഇന്നും (ഞായര്‍) നാളെ (തിങ്കള്‍) കേരളത്തില്‍ പ്രതീക്ഷിക്കുന്നതെന്ന് ഞങ്ങളുടെ നിരീക്ഷകര്‍ പറയുന്നു.