ബംഗാൾ ഉൾക്കടലിൽ ന്യൂനമർദ്ദം രൂപപ്പെട്ടു, കേരളത്തെ ബാധിക്കില്ല

ബംഗാൾ ഉൾക്കടലിൽ ഈ മാസത്തെ ആദ്യ ന്യൂനമർദ്ദം ഇന്നലെ രൂപപ്പെട്ടു. ഒഡീഷ തീരത്തോട് ചേർന്നാണ് പുതിയ ന്യൂനമർദ്ദം (Low pressure) രൂപപ്പെട്ടത്. വടക്കു പടിഞ്ഞാറൻ ബംഗാൾ ഉൾക്കടലിൽ ആണ് ഇപ്പോൾ ന്യൂനമർദ്ദം ഉള്ളത്.

ഇതിൻ്റെ സ്വാധീനം കേരളത്തിൽ ഉണ്ടാകാൻ സാധ്യതയില്ല. കാലവർഷക്കാറ്റ് ( monsoon surge) ദുർബലമായി തുടരുന്നത് കൊണ്ടാണിത്. കാലവർഷ പാത്തി (monsoon trough) അതിൻ്റെ സാധാരണ പൊസിഷനിൽ ഉത്തരേന്ത്യ വഴി തുടരുന്നുണ്ട്. ഉത്തരേന്ത്യയിൽ പ്രത്യേകിച്ച് മധ്യ ഇന്ത്യയിൽ ഒറ്റപ്പെട്ട മഴ തുടരും.

കേരളത്തിലും തമിഴ്നാട്ടിലും വരും ദിവസങ്ങളിലും മഴ കുറഞ്ഞു നിൽക്കാനാണ് സാധ്യത. കേരളത്തിൽ തിങ്കളാഴ്ച രാത്രി മഴ വീണ്ടും സജീവമായേക്കും. എന്നാൽ ശക്തമായ മഴയോ അതിശക്തമായ മഴയോ ഉണ്ടാകാൻ സാധ്യതയില്ല. ഇപ്പോഴത്തെ അന്തരീക്ഷത്തിന് അനുസരിച്ച് സാധാരണ മഴയോ ഇടത്തരം മഴയോ പ്രതീക്ഷിച്ചാൽ മതിയാകും.

കേരളതീരത്തും കർണാടക തീരത്തും ലക്ഷദ്വീപ് തീരത്തും കടലും ശാന്തമായിരിക്കും. തമിഴ്നാട് തീരത്തും കന്യാകുമാരി കടലിലും ശ്രീലങ്കയുടെ ഭാഗങ്ങളിലും കടലിൽ 50 കിലോമീറ്റർ വരെ വേഗത്തിൽ കാറ്റിന് സാധ്യത. ആന്ധ്രപ്രദേശിൽ കരക്കാറ്റും ശക്തമാകും.

തമിഴ്നാട്ടിൽ കേരളത്തെപ്പോലെ മഴ കുറഞ്ഞു നിൽക്കും. എന്നാൽ കർണാടകയിൽ തെക്ക് ഉൾനാടൻ കർണാടകയിലും, വടക്ക് ഉൾനാടൻ കർണാടകയിലും പലയിടങ്ങളിലായി മഴ ലഭിക്കും. വടക്ക് ഉൾനാടൻ കർണാടകയിൽ ഇന്നുമുതൽ അടുത്ത അഞ്ചു ദിവസം പരക്കെയും ഒറ്റപ്പെട്ടും മഴ ലഭിക്കും. തെക്ക് ഉൾനാടൻ കർണാടകയിൽ നാളെ മുതലാണ് മഴ സാധ്യത.

ലക്ഷദ്വീപിലും മാഹിയിലും പ്രസന്നമായ കാലാവസ്ഥ ആയിരിക്കും. നിങ്ങളുടെ പ്രദേശത്ത് അടുത്ത അഞ്ചുദിവസത്തെ കാലാവസ്ഥ അറിയാൻ ഞങ്ങളുടെ വെബ്സൈറ്റ് ആയ metbeat.com സന്ദർശിക്കുക.

English Summary : Low pressure area formed in Bay of Bengal, will not affect Kerala