Weather 19/09/26 : ആൻഡമാൻ കടലിൽ ന്യൂനമർദ്ദം രൂപപ്പെട്ടു, അർണബ് ചുഴലിക്കാറ്റിന് സാധ്യത

തായ്‌ലൻഡ് കടലിൽ കഴിഞ്ഞദിവസം രൂപപ്പെട്ട ചക്രവാത ചുഴി വടക്കൻ അൻഡമാൻ കടലിൽ എത്തി ഇന്ന് രാവിലെയോടെ ന്യൂനമർദ്ദമായി ( low pressure area ) മാറി. എന്നാൽ കേന്ദ്ര കാലാവസ്ഥാ വകുപ്പ് ന്യൂനമർദ്ദം രൂപപ്പെട്ടത് സ്ഥിരീകരിച്ചിട്ടില്ല. ഇന്ന് വൈകിട്ടോടെ സ്ഥിരീകരണം ഉണ്ടായേക്കും.

ആൻഡമാൻ കടലിലെ ന്യൂനമർദ്ദം ശക്തിപ്പെട്ട് ഒഡീഷക്കും ആന്ധ്രപ്രദേശിനും ഇടയിൽ കരകയറാനാണ് സാധ്യത. ഒഡീഷയിൽ ന്യൂനമർദ്ദ സാധ്യതയെ തുടർന്ന് 20 ജില്ലകൾക്ക് സംസ്ഥാന സർക്കാർ അലർട്ട് പുറപ്പെടുവിച്ചു. വരും ദിവസങ്ങളിൽ കനത്ത മഴയും ഇടിയോടുകൂടിയുള്ള കാറ്റും ഉണ്ടാകുമെന്നാണ് മുന്നറിയിപ്പ്.

ചുഴലിക്കാറ്റ് ആയാൽ അർണബ് എന്ന പേരിൽ അറിയപ്പെടും

ഈ ന്യൂനമർദ്ദം ഈ മാസം 22 ഓടെ ചുഴലിക്കാറ്റ് ആയി മാറാൻ സാധ്യതയുണ്ടെന്ന് Metbeat Weather പറയുന്നു. ഈ സീസണിലെ ബംഗാൾ ഉൾക്കടലിലെ ആദ്യത്തെ ചുഴലിക്കാറ്റ് ആയിരിക്കും ഇത്. ഇന്ത്യ നൽകിയ അർണബ് എന്ന പേരിലായിരിക്കും ചുഴലിക്കാറ്റ് രൂപപ്പെട്ടാൽ അറിയപ്പെടുക.

95 B എന്ന പേരിലാണ് ബംഗാൾ ഉൾക്കടലിൽ ഇപ്പോൾ രൂപപ്പെട്ട ന്യൂനമർദ്ദം അറിയപ്പെടുക.
ഇപ്പോൾ ഈ മേഖലയിൽ കാറ്റിന്റെ വേഗത മണിക്കൂറിൽ 28 കിലോമീറ്റർ രേഖപ്പെടുത്തുന്നുണ്ട്. മർദം 1009 മില്ലി ബാർ ആണ്.

രണ്ടുദിവസത്തിനകം തീവ്ര ന്യൂനമർദ്ദം ആകും

സിസ്റ്റം ഇപ്പോൾ ആന്റമാനിൽ നിന്നും ഏകദേശം 320 കിലോമീറ്ററും ആന്ധ്രയിലെ ശ്രീകാകുളത്ത് നിന്നും 1420 കിലോമീറ്ററും ചെന്നൈയിൽ നിന്നും 1660 കിലോമീറ്ററും അകലെയാണ് സ്ഥിതിചെയ്യുന്നത്. രണ്ട് ദിവസം ആൻഡമാൻ കടലിൽ തന്നെ വളരെ പതുക്കെ സഞ്ചരിച്ച് പിന്നീട് മധ്യ ബംഗാൾ ഉൾക്കടലിൽ എത്തിയശേഷം ഡിപ്രഷനായി ശക്തിപ്പെടും.

സെപ്റ്റംബർ സിസ്റ്റങ്ങൾ ആന്ധ്രയിലേക്ക്

നിലവിൽ കാലാവസ്ഥ മോഡലുകൾ നൽകുന്ന സൂചന പ്രകാരം ആന്ധ്രാപ്രദേശിന്റെ വടക്കൻ മേഖലയും ഒഡീഷയുടെ തെക്കൻ മേഖലയും ലക്ഷ്യമാക്കിയാണ് ഈ ന്യൂനമർദ്ദം സഞ്ചരിക്കുന്നത്. എന്നാൽ ബംഗാൾ ഉൾക്കടലിൽ എത്തിയശേഷം ഇതിൻ്റെ ദിശയിൽ മാറ്റം വരാനുള്ള സാധ്യത നിലനിൽക്കുന്നു.

ഉയർന്ന മർദ്ദ മേഖലയായ സബ്ട്രോപിക്കൽ റിഡ്ജ് രൂപപ്പെടുന്നത് അനുസരിച്ച് സിസ്റ്റത്തിന്റെ പാത ആന്ധ്രപ്രദേശിലേക്ക് മാറാൻ സാധ്യതയുണ്ട്. നേരത്തെയും സെപ്റ്റംബർ ഒക്ടോബർ മാസങ്ങളിലെ ന്യൂനമർദ്ദങ്ങൾ ആന്ധ്രപ്രദേശിൽ കരകയറിയ ചരിത്രമുണ്ട്. അങ്ങനെയെങ്കിൽ കേരളത്തിലും തമിഴ്നാട്ടിലും കൂടുതൽ മഴ സാധ്യത പ്രതീക്ഷിക്കാം.

തീരത്തോട് അടുത്ത് ചുഴലിക്കാറ്റ്

ബംഗാൾ ഉൾക്കടലിൽ ഈ മാസം 21നു ശേഷം ചുഴലിക്കാറ്റ് സാധ്യതയുണ്ടെന്ന് കഴിഞ്ഞ ആഴ്ച തന്നെ Metbeat News റിപ്പോർട്ട് ചെയ്തിരുന്നു. ഇപ്പോഴത്തെ ന്യൂനമർദ്ദം ശക്തിപ്പെട്ട് കരകയറുന്നതിനു മുൻപായി ഏതാനും മണിക്കൂറുകൾ ചുഴലിക്കാറ്റ് മാനദണ്ഡത്തിലേക്ക് എത്തുമെന്നാണ് പ്രതീക്ഷിക്കുന്നത്. സിസ്റ്റം ശക്തിപ്പെടാൻ ഉള്ള എല്ലാ അനുകൂല അന്തരീക്ഷവും ഈ മേഖലയിലുണ്ട് എന്നുള്ളതാണ് കാരണം.

ബംഗാൾ ഉൾക്കടലിൽ ഈ മാസം അവസാനം ചുഴലിക്കാറ്റ് സാധ്യത
New Low-Pressure System and Kerala Weather Update
https://metbeatnews.com/new-low-pressure-system-and-kerala-weather-update

ന്യൂനമർദ്ദം രൂപപ്പെടുന്ന സാഹചര്യം കേരളത്തിലും ദക്ഷിണേന്ത്യയിലും മഴയ്ക്ക് കാരണമാകും. തമിഴ്നാട്, കർണാടക ഉൾപ്പെടെയുള്ള അയൽ സംസ്ഥാനങ്ങളിൽ മഴ ലഭിക്കുന്നത് ചൂട് കുറയാൻ ഇടയാക്കും.

ഈ മാസം 20 മുതൽ 26 വരെയുള്ള ദിവസങ്ങളിൽ കേരളത്തിൽ വിവിധ പ്രദേശങ്ങളിൽ ഒറ്റപ്പെട്ട ശക്തമായ മഴയ്ക്ക് സാധ്യത. 25 ന് ശേഷം ശക്തമായതോ അതിശക്തമായതോ ആയ മഴക്കും സാധ്യത. ഈ മാസം അവസാനം വരെ ഒറ്റപ്പെട്ട മഴ വിവിധ പ്രദേശങ്ങളിലായി തുടരും.

ദക്ഷിണേന്ത്യൻ സംസ്ഥാനങ്ങളിൽ കേരളത്തോടൊപ്പം മഴ ലഭിക്കും. ഇടിയോടുകൂടിയുള്ള മഴയാണ് മിക്കപ്രദേശങ്ങളിലും ഉണ്ടാവുക.

അതിനിടെ, കാലവർഷം വടക്കു പടിഞ്ഞാറ് ഇന്ത്യയിൽ നിന്ന് ഇന്ന് വിടവാങ്ങി തുടങ്ങും.

കാലവർഷം കേരളത്തിൽ നിന്ന് വിടവാങ്ങുന്നതോടെ മാത്രമാണ് പൂർണമായി വിടവാങ്ങി എന്ന് പറയാൻ കഴിയുക. സാധാരണ 30 മുതൽ 45 ദിവസം വരെ കാലവർഷം വിടവാങ്ങാൻ സമയം എടുക്കാറുണ്ട്. ഇത്തവണ ഒക്ടോബർ 15ന് മുമ്പ് കാലവർഷം കേരളത്തിൽ നിന്ന് വിടവാങ്ങുമെന്നാണ് പ്രതീക്ഷിക്കുന്നത്.

പിന്നാലെ തുലാവർഷം എത്തും. തുലാവർഷം സാധാരണ രീതിയിൽ ലഭിക്കാനാണ് സാധ്യത. എൽ നിനോ ഭീഷണി ഉണ്ടെങ്കിലും, ഇന്ത്യൻ ഓഷ്യൻ ഡൈപോൾ (IOD) പോസിറ്റീവിലേക്ക് വരുന്നതാണ് കാരണം. എല്ലാ വർഷത്തെ ലഭിക്കുന്ന മഴവെള്ളം പരമാവധി സംഭവിച്ചാൽ വരാനിരിക്കുന്ന വരൾച്ചയെ നേരിടാൻ കഴിയും.

നിങ്ങളുടെ പ്രദേശത്തെ കാലാവസ്ഥ അടുത്ത 15 ദിവസം വരെയുള്ളത് മുൻകൂട്ടി അറിയാം ഞങ്ങളുടെ ഫോർകാസ്റ്റ് വെബ്സൈറ്റ് metbeat.com ഉപയോഗിക്കാം. മിന്നൽ, മഴ സാധ്യത, ലൈവ് ഉപഗ്രഹ ചിത്രങ്ങൾ, കാറ്റ്, കടലിലെ ഒഴുക്ക് എന്നിവ അറിയാൻ ഞങ്ങളുടെ വെബ്സൈറ്റിൽ നൽകിയ താഴെയുള്ള ലിങ്ക് ഉപയോഗിക്കാം.

Live Lightning Strike Map | Metbeat News
Real-time lightning strike tracker for Kerala and the world. Live thunderstorm and lightning activity map powered by Blitzortung.org.
https://metbeatnews.com/page/lightning-strike-map?lat=11.2448

English Summary : Low Pressure Area Forms in Andaman Sea; Potential Cyclone "Arnab" Ahead. low-pressure area (designated as 95B) has formed in the North Andaman Sea from a previous cyclonic circulation. It is expected to strengthen into a depression over the central Bay of Bengal within two days