ചൂടിലുരുകി കേരളം, ഇന്ന് കോട്ടയത്ത് ചൂട് സാധാരണയേക്കാള്‍ 4.6 ഡിഗ്രി കൂടുതല്‍

ഒറ്റപ്പെട്ട മഴ ലഭിക്കുന്നുണ്ടെങ്കിലും ചൂടിലുരുകുകയാണ് കേരളം. രണ്ടു മുതല്‍ നാലു ഡിഗ്രി വരെയാണ് താപനില കൂടുമെന്ന് കാലാവസ്ഥാ വകുപ്പ് അടക്കം പ്രവചിച്ചതെങ്കിലും ഇന്നത്തെ ചൂട് അതിനും മുകളില്‍ പോയി. കോട്ടയത്ത് ഇന്ന് സാധാരണയേക്കാള്‍ 4.6 ഡിഗ്രി സെല്‍ഷ്യസ് അധികം ആണ് ചൂട് രേഖപ്പെടുത്തിയത്. കൊച്ചി അന്താരാഷ്ട്ര വിമാനത്താവളത്തിലും പാലക്കാട്ടും ചൂട് 4 ഡിഗ്രിയിലധികം റിപ്പോര്‍ട്ടു ചെയ്തു.

കോട്ടയത്ത് ഇന്ന് 35.5 ഡിഗ്രി സെല്‍ഷ്യസ് ആണ് താപനില രേഖപ്പെടുത്തിയത്. പുനലൂരില്‍ 35.8 (3.8 ഡിഗ്രി കൂടുതല്‍) ഡിഗ്രി സെല്‍ഷ്യസും കോഴിക്കോട്ട് 35.1 ഉം (3.9), മട്ടന്നൂര്‍ വിമാനത്താവളം 34.8 ഡിഗ്രി സെല്‍ഷ്യസും കൊച്ചി നെടുമ്പാശ്ശേരി വിമാനത്താവളത്തില്‍ 34.7 ഡിഗ്രി സെല്‍ഷ്യസും (4.2) , പാലക്കാ് 34.6 ഡിഗ്രി സെല്‍ഷ്യസും (4.1), തൃശൂര്‍ വെള്ളാനിക്കരയില്‍ 34.2 ഡിഗ്രി (3.8) , തിരുവനന്തപുരം സിറ്റി 34 (2.8), കണ്ണൂര്‍ 33.7 (2.6), കരിപ്പൂര്‍ വിമാനത്താവളം 33.5 ഡിഗ്രി സെല്‍ഷ്യസ് (3.4), തിരുവനന്തപുരം വിമാനത്താവളം 32.3 ഡിഗ്രി (1.7) എന്നിങ്ങനെയാണ് ഇന്ന് ഉയര്‍ന്ന താപനില രേഖപ്പെടുത്തിയത്.

മറ്റു സംസ്ഥാനങ്ങളില്‍ ഇവിടത്തേക്കാള്‍ ചൂട്

കേരളത്തില്‍ 4 ഡിഗ്രിക്കു മുകളില്‍ കൂടിയ ചൂട് രേഖപ്പെടുത്തുന്നുണ്ടെങ്കിലും തീരദേശ ആന്ധ്രാപ്രദേശ്, വടക്കന്‍, തെക്കന്‍ ഉള്‍നാടന്‍ കര്‍ണാടക തുടങ്ങിയ മേഖലകളില്‍ 5.1 ഡിഗ്രിക്കു മുകളിലാണ് ചൂട് രേഖപ്പെടുത്തുന്നത്. നാളെ കേരളത്തില്‍ ചൂടിനെ തുടര്‍ന്ന് മുന്നറിയിപ്പ് നല്‍കിയിട്ടില്ല. എല്‍നിനോയുടെ സ്വാധീനമാണ് കേരളത്തില്‍ കടുത്ത ചൂട് അനുഭവപ്പെടാന്‍ പ്രധാന കാരണം.

English Summary : Kerala is experiencing a severe heat wave despite sporadic rainfall, with temperatures rising well above the Met Department's predicted 2–4°C increase. Kottayam recorded the highest temperature deviation at 35.5°C—4.6°C above the normal average.