കോഴിക്കോട് തീരത്ത് ന്യൂനമർദം കരകയറാൻ സാധ്യത; വടക്കൻ കേരളത്തിൽ മഴ കനക്കും, 7 ജില്ലകളിൽ ഓറഞ്ച് അലർട്ട്

വടക്കൻ കേരളത്തിന് സമീപം നിലകൊള്ളുന്ന ന്യൂനമർദം കോഴിക്കോട് തീരത്തോട് ചേർന്ന മേഖലയിൽ കരകയറാൻ സാധ്യതയെന്ന് കാലാവസ്ഥാ നിരീക്ഷണം. ഇതിന്റെ സ്വാധീനത്തിൽ വടക്കൻ കേരളത്തിലും മധ്യകേരളത്തിലും ശക്തമായ മഴയ്ക്ക് സാധ്യതയുണ്ട്. മഴയ്ക്കൊപ്പം ശക്തമായ കാറ്റിനും ഇടിമിന്നലിനും സാധ്യതയുള്ളതിനാൽ ജാഗ്രത പാലിക്കണം.

മലപ്പുറം ജില്ലയിലെ തിരൂർ മുതൽ കണ്ണൂർ ജില്ലയിലെ തലശ്ശേരി വരെയുള്ള തീരദേശ മേഖലകളിൽ മേഘാവൃതമായ അന്തരീക്ഷം നിലനിൽക്കുമെന്നാണ് പ്രവചനം. ഉച്ചയ്ക്കുശേഷം മുതൽ വൈകിട്ടോടെ ന്യൂനമർദം ഈ മേഖലയിലൂടെ കരകയറാൻ സാധ്യതയുണ്ടെന്നാണ് കാലാവസ്ഥാ നിരീക്ഷണം സൂചിപ്പിക്കുന്നത്.

Kodaikanal Landslide : ന്യൂനമർദ്ദങ്ങൾ ശക്തിപ്രാപിക്കുന്നു; തമിഴ്നാട്ടിൽ അതിശക്തമായ മഴ, കൊടൈക്കനാലിൽ മണ്ണിടിച്ചിൽ
തമിഴ്നാട്ടിൽ അതിശക്തമായ മഴയിൽ കൊടൈക്കനാലിലും മേട്ടുപ്പാളയം–ഊട്ടി പാതയിലും മണ്ണിടിച്ചിൽ.
https://metbeatnews.com/landslides-block-ooty-and-kodaikanal-routes-ban-on-tourists-issued

ഏഴ് ജില്ലകളിൽ ഓറഞ്ച് അലർട്ട്

ഇന്ന് (ഒക്ടോബർ 24) തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. നാളെ (ഒക്ടോബർ 25) പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ ജില്ലകളിലും ഓറഞ്ച് അലർട്ടാണ്.

വിവിധ ജില്ലകളിൽ മഞ്ഞ അലർട്ട്

ഒക്ടോബർ 24ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് മഞ്ഞ അലർട്ട്. ഒക്ടോബർ 25ന് തിരുവനന്തപുരം, കൊല്ലം, ആലപ്പുഴ, കാസർകോട് ജില്ലകളിലും ഒക്ടോബർ 26ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും മഞ്ഞ അലർട്ട് പ്രഖ്യാപിച്ചിട്ടുണ്ട്. ഒറ്റപ്പെട്ടയിടങ്ങളിൽ ശക്തമായ മഴയ്ക്കാണ് മഞ്ഞ അലർട്ടുള്ള ജില്ലകളിൽ സാധ്യത.

ജാഗ്രത നിർദേശം

മഴ ശക്തമാകുന്ന സാഹചര്യത്തിൽ മലയോര മേഖലകളിൽ താമസിക്കുന്നവർ ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ സാധ്യതകൾ കണക്കിലെടുത്ത് ജാഗ്രത പാലിക്കണം. അധികൃതരുടെ നിർദേശമുണ്ടെങ്കിൽ സുരക്ഷിത സ്ഥാനങ്ങളിലേക്ക് മാറണം. നദികളിലും മറ്റ് ജലാശയങ്ങളിലും ഇറങ്ങരുത്. വെള്ളക്കെട്ടുള്ള റോഡുകളിലൂടെ വാഹനമോടിക്കുന്നതും അത്യാവശ്യമല്ലാത്ത യാത്രകളും ഒഴിവാക്കണം.

English Summary : A low-pressure system situated near Northern Kerala is expected to landfall/make landfall along the Kozhikode coast, according to the Meteorological Department. Under its influence, severe downpours accompanied by strong winds and thunderstorms are forecasted across Northern and Central Kerala.