കൊച്ചിയിൽ വായുമലിനീകരണം രൂക്ഷമാകുന്നു; കാലാവസ്ഥയിലെ മാറ്റവും കാരണമാകുന്നു

കൊച്ചി നഗരത്തിൽ വായുമലിനീകരണം വർധിക്കുന്നതിന് പ്രധാന കാരണം വാഹനങ്ങളിൽ നിന്നുള്ള പുകയും സുരക്ഷാ മുൻകരുതലുകളില്ലാതെ നടക്കുന്ന നിർമാണപ്രവർത്തനങ്ങളുമെന്ന് വിദഗ്ദർ ചൂണ്ടികാട്ടുന്നു. കാലവർഷത്തിൽ നിന്ന് ശൈത്യകാലത്തിലേക്കുള്ള കാലാവസ്ഥാ മാറ്റത്തിനിടെ കാറ്റിന്റെ ഗതിയിലും അന്തരീക്ഷ സാഹചര്യങ്ങളിലുമുണ്ടാകുന്ന വ്യതിയാനങ്ങളും മലിനീകരണം രൂക്ഷമാക്കുന്നുണ്ടെന്നാണ് വിലയിരുത്തൽ. കൊച്ചിയിലെ വായു ഗുണനിലവാര സൂചിക (AQI) മോശമാകുന്നതിനെക്കുറിച്ച് വ്യാപകമായ ആശങ്ക ഉയർന്ന സാഹചര്യത്തിൽ നിരീക്ഷണ സംവിധാനങ്ങൾ ശക്തമാക്കാൻ കൊച്ചി കോർപറേഷൻ നടപടികൾ ആരംഭിച്ചു.

Delhi Air Pollution : ഡൽഹിയിൽ വായുമലിനീകരണം അതീവ ഗുരുതരാവസ്ഥയിൽ; 33 നിരീക്ഷണ കേന്ദ്രങ്ങളിലും എക്യുഐ 400 കടന്നു
രാജ്യതലസ്ഥാനമായ ഡൽഹിയിൽ വായുമലിനീകരണം വീണ്ടും അതീവ ഗുരുതര വിഭാഗത്തിലെത്തി.
https://metbeatnews.com/weather-forecast-and-ncr-pollution-levels

അപകടകരമാകുന്ന മാലിന്യസംസ്‌കരണ രീതി

വാഹനങ്ങളിൽ നിന്നുള്ള ഇന്ധനപ്പുക, ഗതാഗതക്കുരുക്കിൽ വാഹനങ്ങൾ ദീർഘനേരം നിർത്തിയിടുമ്പോഴുണ്ടാകുന്ന മലിനീകരണം, അമിതഭാരം കയറ്റിയുള്ള വാഹനങ്ങളുടെ സഞ്ചാരം എന്നിവ വായുവിന്റെ ഗുണനിലവാരം കുറയ്ക്കുന്ന പ്രധാന ഘടകങ്ങളാണെന്ന് മലിനീകരണ നിയന്ത്രണ ബോർഡ് (PCB) ഉദ്യോഗസ്ഥർ ചൂണ്ടിക്കാട്ടുന്നു. പൊടി നിയന്ത്രിക്കാനുള്ള ശാസ്ത്രീയ സംവിധാനങ്ങളില്ലാതെ തുറന്ന സ്ഥലങ്ങളിൽ നടക്കുന്ന നിർമാണപ്രവർത്തനങ്ങളും മാലിന്യങ്ങൾ കത്തിക്കുന്നതടക്കമുള്ള അശാസ്ത്രീയ മാലിന്യസംസ്കരണ രീതികളും മലിനീകരണം വർധിപ്പിക്കുന്നുണ്ട്.

മലിനീകരണ തോത് വ്യത്യസ്‌തം

കൃത്യമായ കാരണങ്ങൾ കണ്ടെത്താൻ സോഴ്‌സ് അപ്പോർഷൻമെന്റ് ഉൾപ്പെടെയുള്ള ശാസ്ത്രീയ പഠനങ്ങൾ ആവശ്യമാണെന്ന് വിദഗ്ധർ പറയുന്നു. കാലവർഷത്തിൽ നിന്ന് ശൈത്യകാലത്തേക്കുള്ള മാറ്റത്തിനിടെ കാറ്റിന്റെ ഗതിയിലുണ്ടാകുന്ന വ്യതിയാനവും അന്തരീക്ഷ താപനില കുറയുന്നതും മലിനീകരണ വസ്തുക്കൾ ഭൂനിരപ്പിനോട് ചേർന്ന് തങ്ങിനിൽക്കാൻ കാരണമാകുന്നു. പുലർച്ചെ സമയങ്ങളിലാണ് ഇതിന്റെ ആഘാതം കൂടുതൽ അനുഭവപ്പെടുന്നത്. കൊച്ചിയിലെ വിവിധ പ്രദേശങ്ങളിൽ മലിനീകരണത്തിന്റെ തോത് വ്യത്യസ്തമാണെന്നും കൊച്ചിൻ യൂണിവേഴ്സിറ്റി ഓഫ് സയൻസ് ആൻഡ് ടെക്നോളജിയിലെ (CUSAT) റഡാർ സെന്റർ ഡയറക്ടർ എസ്. അഭിലാഷ് പറഞ്ഞു.യ

നിരീക്ഷണ സ്റ്റേഷനുകൾ സ്ഥാപിക്കുന്നു

വായുവിന്റെ ഗുണനിലവാരം നിരീക്ഷിക്കാൻ നഗരത്തിലെ ഏഴ് പ്രധാന കേന്ദ്രങ്ങളിൽ പുതിയ നിരീക്ഷണ സ്റ്റേഷനുകൾ സ്ഥാപിക്കാനാണ് കോർപറേഷന്റെ തീരുമാനം. പത്തുലക്ഷം രൂപ ചെലവിൽ എസ്‌സിഎംഎസ് സ്കൂൾ ഓഫ് എൻജിനിയറിങ് ആൻഡ് ടെക്നോളജിയുടെ സാങ്കേതിക സഹായത്തോടെയാണ് പദ്ധതി നടപ്പാക്കുന്നത്. കോർപറേഷൻ ഓഫീസ്, ഇടപ്പള്ളി, വൈറ്റില, തോപ്പുംപടി, ഫോർട്ട് കൊച്ചി എന്നിവയുൾപ്പെടെയുള്ള സ്ഥലങ്ങളാണ് പ്രാഥമികമായി പരിഗണിക്കുന്നത്. കോർപറേഷൻ കൗൺസിലിന്റെ അംഗീകാരത്തിന് ശേഷമായിരിക്കും അന്തിമ കേന്ദ്രങ്ങൾ തീരുമാനിക്കുക.

നിരീക്ഷണ കേന്ദ്രങ്ങൾക്കൊപ്പം നഗരത്തിലെ വായു ഗുണനിലവാരം പൊതുജനങ്ങൾക്ക് തത്സമയം അറിയാൻ കഴിയുന്ന ഡാഷ്ബോർഡും സജ്ജമാക്കും. രണ്ടുമാസത്തിനുള്ളിൽ പദ്ധതി പൂർത്തിയാക്കാനാണ് കോർപ്പറേഷൻ്റെ തീരുമാനം. വായു ഗുണനിലവാരത്തെക്കുറിച്ചുള്ള പൊതുജനങ്ങളുടെ ആശങ്കയാണ് നടപടികൾ വേഗത്തിലാക്കാൻ കാരണമെന്നും പദ്ധതി നേരത്തേ തന്നെ കോർപറേഷന്റെ ബജറ്റിൽ ഉൾപ്പെടുത്തിയിരുന്നുവെന്നും മേയർ വ്യക്തമാക്കി.

അതേസമയം, അഞ്ച് കേന്ദ്രങ്ങളിൽ മാനുവൽ രീതിയിലുള്ള വായു ഗുണനിലവാര പരിശോധന തുടരുന്നുണ്ടെന്നും ദിവസേനയുള്ള റിപ്പോർട്ടുകൾ ദേശീയ മലിനീകരണ നിയന്ത്രണ ബോർഡിന് കൈമാറുന്നുണ്ടെന്നും അധികൃതർ വ്യക്തമാക്കി. ദേശീയ അന്തരീക്ഷ വായു ഗുണനിലവാര നിരീക്ഷണ പദ്ധതിയുടെ ഭാഗമായാണ് പരിശോധനയും റിപ്പോർട്ട് സമർപ്പിക്കലും തുടരുന്നത്.

English Summary : Air pollution in Kochi has reached concerning levels, driven primarily by heavy vehicular emissions, unregulated construction dust, and unscientific waste burning. According to Pollution Control Board (PCB) officials and climate experts from CUSAT, the seasonal transition from monsoon to winter has altered wind patterns and lowered temperatures, trapping pollutants closer to the ground—especially during early morning hours.