ലോകത്ത് ആദ്യമായി കിരിബാത്തിയിൽ പുതുവർഷം പിറന്നു, 2026 നെ വരവേറ്റ് ലോകം

പുതിയ പ്രതീക്ഷകളുമായി കേരളം പുതുവർഷത്തിലേക്ക് ചുവടുവെച്ചു. സംസ്ഥാനത്തെ പ്രധാന നഗരങ്ങളെല്ലാം വലിയ ആഘോഷങ്ങളോടെയാണ് 2025-നോട് വിട പറഞ്ഞതും 2026-നെ വരവേറ്റതും. കേരളത്തിൽ പുതുവർഷപ്പിറവിയുടെ അടയാളമായ പപ്പാഞ്ഞിയെ കത്തിക്കലും ഗംഭീരമായി നടന്നു. പ്രധാനമായി ഫോർട്ട് കൊച്ചിയിലും തിരുവനന്തപുരത്തുമാണ് പടുകൂറ്റൻ പപ്പാഞ്ഞിമാരെ കത്തിച്ചത്. കൂടാതെ പലയിടങ്ങളിലും ചെറുപപ്പാഞ്ഞിമാരെ കത്തിച്ചുകൊണ്ടും പുതുവർഷത്തെ വരവേറ്റു.

പുതുവത്സരാഘോഷത്തിനിടെ ജപ്പാനില്‍ ശക്തമായ ഭൂചലനം. ഡിസംബര്‍ എട്ടിന് ജപ്പാനിലെ സെര്‍ജിയോണില്‍ 7.5 തീവ്രതയുള്ള ഭൂചലനമുണ്ടായതിന് പിന്നാലെ ജപ്പാന്റെ കിഴക്കന്‍ നോഡ മേഖലയിലെ തീരദേശത്താണ് ഇന്ന് 6 തീവ്രതയിലുള്ള ഭൂചലനം നടന്നത്. 19.3 കി.മി താഴ്ചയിലാണ് ഭൂചലന പ്രഭവ കേന്ദ്രമെന്ന് യു.എസ് ജിയോളജിക്കല്‍ സര്‍വേ പറഞ്ഞു. കഴിഞ്ഞ ദിവസം ജപ്പാനിലുണ്ടായ 7.5 തീവ്രതയുള്ള ഭൂചലനത്തില്‍ 30 പേര്‍ക്ക് പരുക്കേറ്റിരുന്നു. 90,000 പേരെയാണ് മാറ്റിപാര്‍പ്പിച്ചത്. പ്രാദേശിക സമയം ഇന്ന് വൈകിട്ട് 5:26 നാണ് ഭൂചലനം ഉണ്ടായത്. നാശനഷ്ടമോ ആളപായമോ റിപ്പോര്‍ട്ട് ചെയ്യപ്പെട്ടിട്ടില്ല. സുനാമി മുന്നറിയിപ്പും പുറപ്പെടുവിച്ചിട്ടില്ല.

ഓരോ രാജ്യത്തും വ്യത്യസ്തമായ രീതിയിലാണ് പുതുവർഷത്തെ വരവേൽക്കുന്നത്. സിഡ്നിയിലെ ഹാർബർ ബ്രിഡ്ജ്, ദുബായിലെ ബുർജ് ഖലീഫ, ലണ്ടനിലെ ബിഗ് ബെൻ എന്നിവിടങ്ങളിലെ വെടിക്കെട്ടുകൾ ലോകപ്രശസ്തമാണ്. പലയിടങ്ങളിലും ബന്ധുക്കളും സുഹൃത്തുക്കളും ഒത്തുചേർന്ന് വിരുന്നുകൾ ഒരുക്കുന്നു. ഡിസംബർ 31 അർദ്ധരാത്രി 12 മണിയാകാൻ സെക്കന്റുകൾ എണ്ണുന്ന 'കൗണ്ട് ഡൗൺ' ആവേശകരമായ നിമിഷമാണ്. കേരളത്തിൽ കൊച്ചിൻ കാർണിവലും ഫോർട്ട് കൊച്ചിയിലെ 'പാപ്പാൻജി'യെ കത്തിക്കുന്ന ചടങ്ങും ഏറെ പ്രശസ്തമാണ്. പഴയ വർഷത്തെ തിന്മകളെയും ദുഃഖങ്ങളെയും പ്രതീകാത്മകമായി കത്തിച്ചുകളഞ്ഞ് പുതിയൊരു നന്മയുടെ കാലത്തെ വരവേൽക്കുക എന്നതാണ് ഇതിന്റെ പിന്നിലെ സങ്കല്പം.

സിഡ്‌നി ഹാർബറിലെ പുതുവത്സരാഘോഷത്തിനു മുമ്പ്, ബോണ്ടി ബീച്ചിലുണ്ടായ വെടിവെപ്പിൽ കൊല്ലപ്പെട്ടവർക്കായി നഗരം മൗനമാചരിച്ചു. ഡിസംബർ 14-ന് ഹനുക്ക ആഘോഷത്തിനിടെ ജൂത സമൂഹത്തിന് നേരെ നടന്ന ആക്രമണത്തിൽ 15 പേരാണ് കൊല്ലപ്പെട്ടത്. ഇവരുടെ സ്മരണാർത്ഥം പ്രാദേശിക സമയം രാത്രി 11 മണിക്ക് സിഡ്‌നിയിലെ ഔദ്യോഗിക ആഘോഷങ്ങൾ ഒരു മിനിറ്റ് നേരത്തേക്ക് നിർത്തിവെച്ചു. സമാധാനത്തിൻ്റെ പ്രതീകമായി സിഡ്നി ഹാർബർ ബ്രിഡ്‌ജിൽ വെള്ള വെളിച്ചം തെളിച്ചു.

ന്യൂസിലാൻഡിലെ പല ഭാഗങ്ങളിലും പുതുവർഷം ആവേശത്തോടെ വരവേറ്റെങ്കിലും, വടക്കൻ ദ്വീപുകളിൽ കാലാവസ്ഥാ വ്യതിയാനം ആഘോഷങ്ങൾക്ക് മങ്ങലേൽപ്പിച്ചു. ശക്തമായ മഴയ്ക്കും ഇടിമിന്നലിനും സാധ്യതയുണ്ടെന്ന കാലാവസ്ഥാ പ്രവചനത്തെത്തുടർന്ന് ഈ മേഖലയിലെ ചില പ്രാദേശിക പരിപാടികൾ റദ്ദാക്കി. മുൻകരുതൽ നടപടിയെന്ന നിലയിലാണ് അധികൃതർ ഈ തീരുമാനമെടുത്തത്. മോശം കാലാവസ്ഥയിലും മറ്റ് പ്രധാന നഗരങ്ങളിൽ ആഘോഷങ്ങൾ നിയന്ത്രണങ്ങളോടെ തുടരുന്നുണ്ട്.

കിഴക്കൻ ഏഷ്യൻ രാജ്യങ്ങളായ ജപ്പാനിലും ദക്ഷിണ കൊറിയയിലും പുതുവർഷം പിറന്നു. ഇന്ത്യൻ സമയം രാത്രി 8.30-ഓടെ (15:00 GMT) ഇരു രാജ്യങ്ങളിലും പുതുവത്സരാഘോഷങ്ങൾ ആരംഭിച്ചു. ഐശ്വര്യവും സമാധാനവും നേർന്ന് ആരാധനാലയങ്ങളിൽ മണികൾ മുഴക്കിയാണ് ഈ രാജ്യങ്ങൾ പുതുവർഷത്തെ വരവേൽക്കുന്നത്