Kerala Weather 05/06/26 : കാലവർഷം സജീവം , കനത്ത മഴ തുടരും

കാലവർഷം കേരളത്തിലെത്തിയതിന്റെ രണ്ടാം ദിവസം രാവിലെ മുതൽ വിവിധ ജില്ലകളിൽ പരക്കെ മഴ. കാലവർഷക്കാറ്റ് കർണാടക വരെ സജീവമാണ്. രാവിലത്തെ ഉപഗ്രഹ ചിത്രത്തിൽ പടിഞ്ഞാറൻ തീരത്ത് നിരവധി മേഘങ്ങൾ രൂപപ്പെട്ട് മഴ നൽകാൻ തയ്യാറായി നിൽക്കുന്നതായി കാണാം.

ആലപ്പഴ, കൊല്ലം, തിരുവനന്തപുരം ഉൾപ്പെടെയുള്ള ജില്ലകളിൽ ഇപ്പോൾ മഴ കുറവാണെങ്കിലും വരുന്ന മണിക്കൂറിൽ മഴ ലഭിക്കും. എറണാകുളം, കോഴിക്കോട്, മലപ്പുറം, കണ്ണൂർ ജില്ലകളുടെ തീരദേശപ്രദേശങ്ങളിൽ ൾക്തമായ മഴ ലഭിക്കും.

കേരളത്തിൽ വരുന്ന ഏഴു ദിവസം 24 മണിക്കൂറിൽ 19 സെൻറീമീറ്റർ വരെ ശക്തിയുള്ള അതിശക്തമായ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പിന്റെ പ്രവചനം. ഇന്ന് കാസർകോട് , കണ്ണൂർ, വയനാട്, മലപ്പുറം, കോഴിക്കോട്, തൃശൂർ, എറണാകുളം ജില്ലകളിൽ കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചിട്ടുണ്ട്. അടുത്ത നാല് ദിവസവും വടക്കൻ കേരളത്തിൽ മഴ ശക്തിപ്പെടും.

തെക്കു പടിഞ്ഞാറൻ കാലവർഷം ഇന്നലെ (ജൂൺ 4) കേരളത്തിൽ എത്തിയതായി കേന്ദ്ര കാലാവസ്ഥ വകുപ്പ് സ്ഥിരീകരിച്ചിരുന്നു.

മധ്യ-കിഴക്കൻ അറബിക്കടലിനോട് ചേർന്നുള്ള ഗോവ തീരത്തിന് മുകളിലായി ചക്രവാത ചുഴി സ്ഥിതിചെയ്യുന്നുണ്ട്. ഇതാണ് കാലവർഷത്തെ കേരളത്തിലേക്ക് എത്താൻ സഹായിച്ചത്.

മഹാരാഷ്ട്രയിലെ മറാത്ത്‌വാഡ മുതൽ തെക്കുപടിഞ്ഞാറൻ അറബിക്കടൽ വരെ, കൊങ്കൺ-ഗോവ മേഖലയ്ക്ക് മുകളിലൂടെ സമുദ്രനിരപ്പിൽ നിന്ന് 5.8 കിലോമീറ്റർ ഉയരത്തിൽ ഒരു ന്യൂനമർദ്ദ പാത്തി (Trough) രൂപപ്പെട്ടിട്ടുണ്ട്.

തെക്കൻ തെലങ്കാനയ്ക്കും അതിനോട് ചേർന്നുള്ള തീരദേശ ആന്ധ്രാപ്രദേശ്, യാനം എന്നിവയ്ക്ക് മുകളിലായി ഒരു ചക്രവാത ചുഴിയും സ്ഥിതിചെയ്യുന്നു.

വടക്കൻ ആൻഡമാൻ കടലിനും അതിന്റെ സമീപപ്രദേശങ്ങൾക്കും മുകളിലായി ചക്രവാത ചുഴിയും സ്ഥിതിചെയ്യുന്നു.

ജൂൺ 4 മുതൽ 8 വരെ തീയതികളിൽ കേരളത്തിലും മാഹിയിലും ഒറ്റപ്പെട്ട ശക്തമായ (Heavy rainfall)/അതി ശക്തമായ മഴയ്ക്ക് (Heavy to Very Heavy rainfall) സാധ്യതയുണ്ടെന്നാണ് കാലാവസ്ഥ വകുപ്പിന്റെ പ്രവചനം.

English Summary : Kerala Weather Update: Southwest Monsoon Activates; Heavy Rainfall and Orange Alerts Predicted Across Districts . The Southwest Monsoon has officially arrived in Kerala (confirmed on June 4), bringing widespread rainfall across various districts. Active monsoon winds have extended up to Karnataka, and recent satellite imagery shows dense cloud formations along the western coast, indicating continued precipitation.