Weather 29/10/26 : കേരളം വരണ്ട അന്തരീക്ഷ സ്ഥിതിയിലേക്ക്; താപനില കൂടും

അർണബ് ചുഴലിക്കാറ്റ് കരകയറിയതോടെ, കേരളത്തിൽ അടുത്ത ഒരാഴ്ചയെങ്കിലും ഭൂരിഭാഗം പ്രദേശങ്ങളിലും വരണ്ട കാലാവസ്ഥയ്ക്ക് സാധ്യത. ചിലയിടങ്ങളിൽ ഒറ്റപ്പെട്ട സാധാരണ മഴ ലഭിക്കും. പകൽ താപനിലയിൽ നാലു ഡിഗ്രി വരെ സാധാരണയേക്കാൾ കൂടാനും സാധ്യത.

അടുത്ത ദിവസം ബംഗാൾ ഉൾ കടലിൽ രൂപപ്പെടുമെന്ന് പ്രതീക്ഷിക്കുന്ന ന്യൂനമർദ്ദവും കേരളത്തിൽ മഴ നൽകാൻ സാധ്യതയില്ല. ഈ സിസ്റ്റവും ചുഴലിക്കാറ്റ് ആകാൻ സാധ്യത ഉള്ളതിനാൽ ആണ് കേരളത്തിന് ലഭിക്കേണ്ട തുലാവർഷ മഴ കൂടി കുറയുന്നത്.

സാധാരണ കാലവർഷ കാലത്താണ് ബംഗാൾ ഉൾക്കടലിന്റെയും മറ്റും ന്യൂനമർദ്ദങ്ങളും ചുഴലിക്കാറ്റുകളും കേരളത്തിൽ കൂടുതൽ ഈർപ്പം എത്തിക്കുകയും കനത്ത മഴ നൽകുകയും ചെയ്യുക. പടിഞ്ഞാറൻ കാറ്റ് ശക്തമാകുന്നത് കൊണ്ടാണ് അത്.

എന്നാൽ കിഴക്കൻ കാറ്റിന്റെ സ്വാധീനം മൂലമുള്ള തുലാവർഷ മഴയെ പലപ്പോഴും ഈ മേഖലകളിൽ ഉണ്ടാകുന്ന ന്യൂനമർദ്ദങ്ങളും ചുഴലിക്കാറ്റുകളും മഴയുടെ കാര്യത്തിൽ കേരളത്തിന് പ്രതികൂലമായി മറുകയാണ് ചെയ്യുക. ബംഗാൾ ഉൾക്കടലിൽ നിന്നുള്ള ഈർപ്പത്തെ ഇത്തരം സിസ്റ്റങ്ങൾ കേന്ദ്രീകരിച്ച് ആന്ധ്രപ്രദേശ് ഒഡീഷ പോലുള്ള സംസ്ഥാനങ്ങളിൽ മഴ നൽകുന്നത് കൊണ്ടാണിത്.

മഴ വിട്ടു നിൽക്കുന്നതിനാൽ കേരളത്തിൽ സാധാരണയേക്കാൾ 4 ഡിഗ്രി വരെ താപനില വർധിക്കാൻ സാധ്യത എന്ന മുന്നറിയിപ്പ് കേന്ദ്ര കാലാവസ്ഥ വകുപ്പും പുറപ്പെടുവിച്ചിട്ടുണ്ട്. അതിനാൽ ചൂട് കൂടുന്നതിന്റെ മുന്നൊരുക്കങ്ങളും ചൂടിനെ നേരിടാനുള്ള തയ്യാറെടുപ്പുകളും നടത്തേണ്ടതാണ്.

Metbeat Weather ൻ്റെ നിരീക്ഷണത്തിലും വരും ദിവസങ്ങളിൽ പകൽതാപ നിലയിൽ വർധനവിനും രാത്രി താപനില സാധാരണ രീതിയിലും തുടരാനാണ് സാധ്യത. മലയോര മേഖലകളിലും മറ്റും രാത്രിയിലും പുലർച്ചെയും തണുപ്പ് അനുഭവപ്പെടാം. മൂടൽ മഞ്ഞിനും സാധ്യത.

എറണാകുളം മുതൽ തെക്കോട്ടുള്ള മേഖലയിലാണ് ചൂട് കൂടുക. ആലപ്പുഴ, കോട്ടയം, പത്തനംതിട്ട, എറണാകുളം, പാലക്കാട് ജില്ലകളിലാണ് മറ്റു ജില്ലകളെ അപേക്ഷിച്ച് ഇന്ന് കൂടുതൽ ചൂടിന് സാധ്യത.

കേരളത്തോടൊപ്പം തെക്കൻ തമിഴ്നാട്ടിലും ചൂട് കൂടും. തീരദേശ മേഖലകളിലും ചൂട് വർദ്ധിക്കും. കർണാടകയുടെ തെക്കു കിഴക്കൻ മേഖലയിലും മറ്റു ജില്ലകളെ അപേക്ഷിച്ച് ചൂട് കൂടും.

ചൂട്, കാറ്റ് മേഘങ്ങൾ ഉപകര ചിത്രങ്ങൾ എന്നിവ തൽസമയം കാണാൻ ഇവിടെ ക്ലിക്ക് ചെയ്യുക.

നിങ്ങളുടെ പ്രദേശത്തെ കാലാവസ്ഥ 16 ദിവസം വരെയുള്ള പ്രവചനം കാണാൻ ഇവിടെ ക്ലിക്ക് ചെയ്യുക.

English Summary : Kerala Weather Update: Shift to Dry Conditions and Rising Temperatures. Following the landfall of Cyclone Arnab, most parts of Kerala are expected to experience dry weather for at least the next week, with only isolated light rain in a few places.