കൊച്ചിയിൽ വിഷപ്പുക ഭീഷണി; വായുഗുണനിലവാരം 153ലെത്തി, ജാഗ്രതാ നിർദേശം

കൊച്ചി നഗരപ്രദേശങ്ങളിൽ മലിനമായ പുക ഉയരുന്നത് ആശങ്കയാകുന്നു. തൃപ്പൂണിത്തുറ, വൈറ്റില, ഇരുമ്പനം, അമ്പലമുകൾ, ഏലൂർ മേഖലകളിലാണ് ഉയർന്ന വായുമലിനീകരണം രേഖപ്പെടുത്തിയിരിക്കുന്നത്. രാവിലെ ആറുമുതൽ എട്ടുവരെ കോടമഞ്ഞിന് സമാനമായി കാണപ്പെടുന്നത് അപകടകരമായ പുകയാണെന്നാണ് വിദഗ്ധരുടെ മുന്നറിയിപ്പ്. ഈ മലിനവായു ശ്വസിക്കുന്നത് ഒരു ദിവസം എട്ട് സിഗരറ്റ് വലിക്കുന്നതിന് തുല്യമാണെന്നും വിദഗ്ധർ ചൂണ്ടിക്കാട്ടുന്നു.

വരും ദിവസങ്ങളിൽ 200 കടക്കാം

കൊച്ചിയിൽ നിലവിൽ വായുഗുണനിലവാര സൂചിക 153 ആണ്. പൂജ്യം മുതൽ 50 വരെയുള്ള എയർ ക്വാളിറ്റി ഇൻഡക്സ് (Air Quality Index) ആണ് ആരോഗ്യത്തിന് അനുയോജ്യമായ വായുനിലവാരമായി കണക്കാക്കുന്നത്. നഗരത്തിലെ എക്യുഐ സാധാരണയായി 150 മുതൽ 175 വരെ രേഖപ്പെടുത്താറുണ്ടെങ്കിലും ചില സമയങ്ങളിൽ ഇത് കൂടുതൽ ഉയരുന്നുണ്ട്. വരും ദിവസങ്ങളിൽ സൂചിക 200 കടന്നേക്കാമെന്നും പുറത്തിറങ്ങുന്നവർ ജാഗ്രത പാലിക്കണമെന്നും വിദഗ്ധർ മുന്നറിയിപ്പ് നൽകി.

Indonesia Wildfire Crisis 2026 : ഇന്തോനേഷ്യയിലെ വിഷപ്പുക നീക്കാൻ ഡ്രൈ ഐസ് പരീക്ഷണം; കാട്ടുതീ നിയന്ത്രിക്കാൻ പുതിയ മാർഗ്ഗം
ഇന്തോനേഷ്യയിലെ കാടുകളിൽ പടരുന്ന കാട്ടുതീയിൽ നിന്നുള്ള വിഷപ്പുക നീക്കാൻ പുതിയ പരീക്ഷണവുമായി അധികൃതർ.
https://metbeatnews.com/innovative-dry-ice-experiment-launched-to-disperse-indonesias-severe-wildfire-ha

വായു മലിനീകരണത്തിന് പ്രധാന കാരണമാകുന്നത് വാഹനങ്ങളുടെ വർദ്ധനവ്, ഗതാഗതക്കുരുക്ക്, നിർമാണപ്രവർത്തനങ്ങൾ, വ്യവസായശാലകളുടെ വർധന എന്നിവയാണ്. കഴിഞ്ഞ രണ്ട് മാസത്തിനിടെ കൊച്ചിയിൽ രേഖപ്പെടുത്തിയ ഏറ്റവും ഉയർന്ന എക്യുഐ 248 ആണ്. ഏലൂർ, ഇടയാർ, അമ്പലമുകൾ തുടങ്ങിയ വ്യവസായ മേഖലകളിൽ മലിനീകരണത്തിന്റെ തോത് ഉയരുന്നതായും വിലയിരുത്തപ്പെടുന്നു.

കൊച്ചി 91 ആം സ്ഥാനത്ത്

ലോകത്ത് ഏറ്റവുമധികം വായുമലിനീകരണമുള്ള നഗരങ്ങളുടെ പട്ടികയിൽ കൊച്ചി 91-ാം സ്ഥാനത്താണെന്നും റിപ്പോർട്ടിൽ പറയുന്നു. അതേസമയം, ആശങ്കപ്പെടേണ്ട സാഹചര്യമില്ലെന്നും വായുമലിനീകരണം കുറയ്ക്കുന്നതിനുള്ള നടപടികൾ സജീവമാക്കാൻ ഒരുങ്ങുകയാണെന്നും അധികൃതർ അറിയിച്ചു.

English Summary : Kochi faces a growing air pollution crisis as the Air Quality Index (AQI) climbs to 153, with experts warning that breathing this toxic morning smog is equivalent to smoking eight cigarettes a day. Areas like Thrippunithura, Vyttila, and Eloor are heavily affected due to vehicular emissions, traffic congestion, and industrial activity. With the AQI expected to exceed 200 in the coming days, authorities have issued health alerts while ranking Kochi 91st globally for air pollution. Discover the key causes, worst-hit zones, and precautions to stay safe.