കേരളത്തിൽ കൂട്ടിൽ അകപ്പെട്ട ആദ്യ പെൺ കരിമ്പുലി ഇനി പുത്തൂർ സുവോളജിക്കൽ പാർക്കിൽ

പത്തനംതിട്ട കോന്നി കുളത്തുമണ്ണിൽ കൂട്ടിലകപ്പെട്ട പെൺ കരിമ്പുലിയെ (black panther) തൃശൂർ പുത്തൂർ സുവോളജിക്കൽ പാർക്കിലേക്ക് മാറ്റി. വിദഗ്ധ പരിശോധനയ്ക്കും തുടർനിരീക്ഷണത്തിനുമായാണ് കരിമ്പുലിയെ പാർക്കിലെത്തിച്ചത്. പരിശോധനകൾ പൂർത്തിയാക്കിയ ശേഷം ഇവിടെത്തന്നെ പാർപ്പിക്കാനാണ് വനംവകുപ്പിന്റെ തീരുമാനം. കൂട്ടിൽ അകപ്പെട്ട കേരളത്തിലെ ആദ്യത്തെ കരിമ്പുലിയായതിനാൽ വിശദമായ പരിശോധനയും നിരീക്ഷണവും ആവശ്യമാണെന്നാണ് വനംവകുപ്പ് പറയുന്നത്.

പെൺകരിമ്പുലിയായതിനാൽ പ്രജനനസാധ്യത കൂടി പരിഗണിച്ചാണ് സുവോളജിക്കൽ പാർക്കിലേക്ക് മാറ്റിയത്. ആദ്യം പുലിയെ ഉൾക്കാട്ടിൽ തുറന്നുവിടാനായിരുന്നു തീരുമാനം. എന്നാൽ ഈ നീക്കത്തിനെതിരെ എതിർപ്പുയർന്നതോടെയാണ് തീരുമാനം മാറ്റിയത്.

വെള്ളിയാഴ്ച്ച വൈകിട്ടാണ് കരിമ്പുലി കൂട്ടിലകപ്പെട്ടത്. തുടർന്ന് രാത്രി തന്നെ കോന്നി ഇക്കോ ടൂറിസം സെന്ററിലെത്തിച്ചു. ശനിയാഴ്ച്ച പുലർച്ചെയോടെയാണ് പുത്തൂർ സുവോളജിക്കൽ പാർക്കിലേക്ക് മാറ്റിയത്. ഇവിടെ വെറ്ററിനറി ഡോക്ടറുടെ നേതൃത്വത്തിൽ വിദഗ്ധ പരിശോധനയും നടത്തി.

സംശയം മാറാതെ പ്രദേശവാസികൾ

ദീർഘനാളായി കോന്നിയിലും പരിസരപ്രദേശങ്ങളിലും കരിമ്പുലിയുടെ സാന്നിധ്യം സ്ഥിരീകരിച്ചിരുന്നു. ഇതോടെ പ്രദേശവാസികൾ കടുത്ത ഭീതിയിലായിരുന്നു.
അതേസമയം, പ്രദേശത്ത് ഇനിയും കരിമ്പുലികൾ ഉണ്ടെന്നാണ് നാട്ടുകാർ പറയുന്നത്. കരിമ്പുലിയുടെ സാന്നിധ്യം ആവർത്തിക്കുന്ന സാഹചര്യത്തിൽ പ്രദേശവാസികൾക്കിടയിലെ ആശങ്കയും തുടരുകയാണ്.

English Summary : Discover the latest updates on Kerala's first-ever captured female black panther (leopard) from Konni, Pathanamthitta, now safely transferred to the Puthur Zoological Park in Thrissur for expert and breeding potential.veterinary observation