Kerala Weather 08/07/26 : വടക്കൻ ജില്ലകളിൽ കനത്ത മഴ തുടരുന്നു ജാഗ്രത, കിണർ ഇടിഞ്ഞ് താഴ്ന്നു

കേരളത്തിൽ ഇന്നും ഒറ്റപ്പെട്ട ശക്തമായ മഴ സാധ്യത. വടക്കൻ ജില്ലകളിലാണ് കനത്ത മഴ സാധ്യതയുള്ളത്. ജൂലൈ 10 വരെ മഴ തുടരും എന്നായിരുന്നു നേരത്തെയുള്ള പ്രവചനം. ഇന്ന് രാവിലെ ഉള്ള ഉപഗ്രഹ ചിത്രങ്ങളിൽ വടക്കൻ കേരളത്തിലും മധ്യകേരളത്തിന് മുകളിലും ആയി മേഘങ്ങൾ കാണാം. ഇവ ഒറ്റപ്പെട്ട ശക്തമായ മഴ നൽകും.

കോഴിക്കോട് വയനാട്, മലപ്പുറം, കാസർകോട് , കണ്ണൂർ, തൃശ്ശൂർ, എറണാകുളം, ഇടുക്കി , കോട്ടയം ജില്ലകളിൽ ഇന്ന് ഒറ്റപ്പെട്ട ശക്തമായ മഴ സാധ്യത. ആലപ്പുഴ ജില്ലയിലും ഇടവിട്ട മഴ ലഭിക്കും.

കഴിഞ്ഞ കുറച്ചു ദിവസങ്ങളായി കനത്ത മഴ തുടരുന്ന വടക്കൻ ജില്ലകളുടെ കിഴക്കൻ മലയോരങ്ങളിൽ ജാഗ്രത പാലിക്കണം. കോഴിക്കോട് വയനാട് മലപ്പുറം ജില്ലകളുടെ കിഴക്കൻ മലയോര പ്രദേശങ്ങളിലാണ് കൂടുതൽ ജാഗ്രത വേണ്ടത്.

കോഴിക്കോട് മലപ്പുറം വയനാട് ജില്ലകളിൽ രാവിലെ ശക്തമായ മഴ തുടരുകയാണ്. കോഴിക്കോടിന്റെ കിഴക്കൻ മേഖലകളിൽ കിണറുകൾ ഇടിഞ്ഞു താഴ്ന്നു. കോഴിക്കോട് ജില്ലയിലെ മുക്കത്തിനടുത്ത് കാരശ്ശേരിയിൽ 70 വർഷം പഴക്കമുള്ള പൊതുകിണർ ഇടിഞ്ഞു താഴ്ന്നു.

കാരശ്ശേരി പഞ്ചായത്തിലെ പൊതുക്കിണർ ആണ് ഇടിഞ്ഞുതാഴ്ന്നത്. കാരശ്ശേരി - കറുത്തപറമ്പ് റോഡിൽ ആയുർവേദ ആശുപത്രിക്ക് സമീപമുള്ള വലിയ കിണറാണ് ഇന്നലെ രാത്രിയോടെ പൂർണ്ണമായും ഇടിഞ്ഞുപോയത്.

ഏതാണ്ട് 70 വർഷത്തോളം പഴക്കമുള്ള ഈ കിണർ പ്രദേശത്തെ നിരവധി കുടുംബങ്ങളുടെ പ്രധാന കുടിവെള്ള സ്രോതസ്സായിരുന്നു. വേനൽക്കാലത്ത് പോലും വറ്റാത്ത കിണർ പെട്ടെന്ന് ഇടിഞ്ഞുതാഴ്ന്നത് പ്രദേശവാസികളെ ആശങ്കയിലാഴ്ത്തിയിട്ടുണ്ട്.
മഴ തുടരുന്നതിനാൽ കിണറിന്റെ പരിസരപ്രദേശങ്ങളിൽ ഇനിയും മണ്ണ് ഇടിയാൻ സാധ്യതയുള്ളതിനാൽ അധികൃതർ എത്രയും പെട്ടെന്ന് സുരക്ഷാ മുൻകരുതലുകൾ സ്വീകരിക്കണമെന്നു നാട്ടുകാർ ആവശ്യപ്പെട്ടു.

കനത്തമഴയിൽ പുതുപ്പാടി ചിറക്കൽ ഫൈസലിൻ്റെ വീട്ടിലെ കിണർ ഇടിഞ്ഞു താഴ്ന്ന നിലയിൽ - Photo : Special Arrangment

കോഴിക്കോട് ജില്ലയുടെ കിഴക്കൻ പ്രദേശമായ പുതുപ്പാടിയിലും കിണർ ഇടിഞ്ഞ് താഴ്ന്നു. കനത്ത മഴയിൽ കിണർ ഇടിഞ്ഞ് താഴ്ന്നു . പശ്ചിമഘട്ടത്തിന്റെ അടിവാരം പ്രദേശമായ അടിവാരം പൊട്ടി ക്കയ്യിൽ തടയണ മുക്കിന് സമീപം ചിറക്കൽ ഫൈസലിൻ്റെ വീടിന് പുറകിൽ ഉള്ള കിണറാണ് ഇന്നലെ ഉച്ചക്ക് ആൾമറ സഹിതം ഇടിഞ്ഞു താഴ്ന്നത്.

ആൾമറയടക്കം കിണർ ഇടിഞ്ഞ് വീണത് വീടിന് സുരക്ഷാ ഭീഷണി നേരിടുന്നു. പഞ്ചായത്ത് അംഗം, വില്ലേജ് ഓഫീസർ എന്നിവർ സ്ഥലം സന്ദർശിച്ചു.സുരക്ഷാ ഭീഷണി നേരിടുന്ന തിനാൽ കുടുംബത്തെ ഇവിടെ നിന്നും മാറ്റി.

English Summary : Kerala Weather Update: Heavy Rain Lashes Northern Districts; High Alert Issued for Landslides and Soil Subsidence. Intense monsoon rains trigger soil erosion and well collapses across North Kerala, including Kozhikode and Wayanad. Read the latest weather warnings and safety updates.