Kerala Weather 08/04/26 : ഇന്ന് മഴയില്ല, ചൂടുണ്ട്, പക്ഷേ കാറ്റ് ഉഷ്ണം കുറയ്ക്കും

കേരളത്തിൽ വേനൽ മഴക്ക് (Summer Rain) താൽക്കാലിക ഇടവേള വന്നതോടെ ഇന്ന് ( ബുധൻ) മുതൽ ചൂടു കൂടും. ശനിയാഴ്ച മുതലാണ് ഇനി മഴ സാധ്യതയുള്ളത്. അതുവരെ കേരളത്തിൽ പ്രത്യേകിച്ച് വടക്കൻ ജില്ലകളിൽ വരണ്ട അന്തരീക്ഷ സ്ഥിതി തുടരും. വടക്കൻ കേരളത്തിൽ ഇന്ന് ചൂടും ഈർപ്പവുമുള്ള (Hot Humid ) അന്തരീക്ഷ സ്ഥിതി ( weather ) മൂലം അസ്വസ്ഥത അനുഭവപ്പെടുന്ന സാഹചര്യമുണ്ടാക്കുമെങ്കിലും കാറ്റ് ഉഷ്ണം കുറയ്ക്കും.

നിയമസഭാ തെരഞ്ഞെടുപ്പിന്റെ വോട്ടെടുപ്പിന്റെ ( Assembly Election 2026 Kerala Weather) തലേദിവസം കേരളത്തിൽ എല്ലായിടത്തും തെളിഞ്ഞ അന്തരീക്ഷ സ്ഥിതിക്കാണ് (clear sky ) സാധ്യത. മഴക്ക് അനുകൂലമായ അന്തരീക്ഷ സാഹചര്യങ്ങൾ ഒന്നും കേരളത്തിലോ സമീപപ്രദേശങ്ങളിലോ നിലവിലില്ല. തമിഴ്നാട് വഴി മാന്നാർ കടലിടുക്കിലേക്ക് ഒരു ന്യൂനമർദ്ദ പാത്തി ( through) കടന്നു പോകുന്നുണ്ടെങ്കിലും, കേരളത്തിൽ മഴ നൽകാൻ അത് കാരണമാകില്ല.

തമിഴ്നാടിന്റെ ഉൾനാടൻ പ്രദേശങ്ങളിൽ ഒറ്റപ്പെട്ട മഴ ഈ സിസ്റ്റം മൂലം ഉണ്ടായേക്കാം. രാവിലത്തെ ഉപഗ്രഹ ചിത്ര പ്രകാരം, തൃശ്ശൂർ - വടക്കാഞ്ചേരി മേഖലകളിലും മാനന്തവാടി - കൽപ്പറ്റ മേഖലകളിലും മാത്രമാണ് അല്പമെങ്കിലും മേഘം ഉള്ളത്. കേരളത്തിൻ്റെ മറ്റു ഭാഗങ്ങളെല്ലാം തെളിഞ്ഞ അന്തരീക്ഷ സ്ഥിതിയാണ്.

India Monsoon 2026 Forecast : ഇന്ത്യയിൽ 2026-ലെ മൺസൂൺ കുറയുമോ? മുന്നറിയിപ്പുമായി സ്വകാര്യ കാലാവസ്ഥാ ഏജൻസി
ഇന്ത്യയിലെ 2026-ലെ തെക്കുപടിഞ്ഞാറൻ മൺസൂൺ (Southwest Monsoon) സാധാരണതലത്തിൽ താഴെയായിരിക്കാമെന്ന മുന്നറിയിപ്പുമായി സ്വകാര്യ കാലാവസ്ഥാ ഏജൻസി.
https://metbeatnews.com/india-monsoon-2026-forecast-skymet-warns-of-below-normal-rainfall-amid-rising-el-niño-concerns

മുകളിൽ പ്രതിപാദിച്ച പ്രദേശങ്ങളിലെ മേഘം മഴ നൽകുന്ന മേഘങ്ങളുമല്ല. മേഘങ്ങളില്ലാത്ത അന്തരീക്ഷം ചൂട് കൂടാൻ ഇടയാകും. മാത്രവുമല്ല യു.വി സൂചികയും (UV index ) കൂടും. നേരിട്ട് വെയിൽ കൊള്ളുന്നത് ( Direct Sun light) അപകടകരമായതിനാൽ മുൻകരുതലുകൾ സ്വീകരിക്കുക.

കാറ്റ് ഇന്നും ഉണ്ടാകും

ഇന്നലെ മുതൽ കേരളത്തിൽ അനുഭവപ്പെടുന്ന വടക്കുപടിഞ്ഞാറൻ കാറ്റ് ഇന്നും നിലനിൽക്കും. ഇത് ചൂടിന് അല്പം ആശ്വാസമാണ്. ഇന്നലെ കേരളത്തിന്റെ തീരദേശം വഴിയാണ് കാറ്റ് ഉണ്ടായിരുന്നതെങ്കിൽ , ഇന്ന് ഇടനാട് പ്രദേശത്തേക്ക് കൂടി അത് വ്യാപിക്കും. അതിനാൽ ഉൾനാടൻ പ്രദേശങ്ങളിലും കാറ്റ് അനുഭവപ്പെടുകയും ചൂട് കുറയുകയും ചെയ്യുമെന്നാണ് Metbeat Weather ൻ്റെ നിഗമനം.

ഇന്ത്യയുടെ തെക്കേ അറ്റത്ത് രൂപപ്പെട്ട കാറ്റിന്റെ സർക്കുലേഷനും കാറ്റ് സജീവമായി നിലനിർത്താൻ സഹായിക്കും. മണിക്കൂറിൽ 20 മുതൽ 35 കിലോമീറ്റർ വരെ വേഗതയിലുള്ള Surface wind ആണ് കേരളത്തിൽ പ്രതീക്ഷിക്കുന്നത്. പെട്ടെന്നുണ്ടാകുന്ന ശക്തമായ കാറ്റ് ( gust wind) അല്ലാത്തതിനാൽ മരങ്ങൾ വീഴലോ മറ്റു നാശനഷ്ടങ്ങൾക്കോ സാധ്യതയില്ല.

തെരഞ്ഞെടുപ്പിന് മുന്നൊരുക്കം നടത്തുന്ന വൈദ്യുതി വകുപ്പ് ഉൾപ്പെടെയുള്ള ജീവനക്കാർ പ്രത്യേകിച്ച് ജാഗ്രത പാലിക്കേണ്ട സാഹചര്യത്തിലേക്ക് എത്തുന്ന വിധമുള്ള ശക്തമായ കാറ്റ് ഉണ്ടാവുകയില്ല. മഹാരാഷ്ട്രയിലെ രത്നഗിരി മുതൽ തീരത്തു നിന്നുള്ള കാറ്റ് കരയിൽ പ്രവേശിക്കുകയും തിരുവനന്തപുരം വരെ തുടരുകയും ചെയ്യുന്നുണ്ട്.

പാലക്കാട് ചുരം വഴി തമിഴ്നാട്ടിലേക്കും

കേരളത്തിൽ എത്തുന്ന കാറ്റ് പശ്ചിമഘട്ടം തടഞ്ഞു നിർത്തുന്നതിനാൽ തെക്കോട്ടേക്ക് പ്രവഹിക്കുകയും പാലക്കാട് വെച്ച് പശ്ചിമഘട്ടത്തിന്റെ വിടവായ പാലക്കാട് ചുരം വഴി തമിഴ്നാട്ടിലേക്ക് പ്രവേശിക്കുകയും ചെയ്യുന്നുണ്ട്. ഈ കാറ്റ് മധ്യ തമിഴ്നാട്ടിലൂടെ കിഴക്കൻ തമിഴ്നാട് തീരം വരെ എത്തുന്നു. ഇതിനിടയിൽ പെടുന്ന പ്രദേശങ്ങളിലും കാറ്റ് ലഭിക്കും.

അന്തരീക്ഷത്തിന്റെ താഴ്ന്ന ഉയരങ്ങളിലൂടെയാണ് ഈ കാറ്റ് പോകുന്നതിനാലാണ് പശ്ചിമഘട്ടം തടഞ്ഞുനിർത്തുന്ന സാഹചര്യം ഉള്ളത്. കാറ്റിന്റെ ഒരു ഭാഗം പാലക്കാട് വഴി തിരിഞ്ഞു പോകുന്നതിനാൽ, തൃശ്ശൂരിൽ എറണാകുളം ജില്ലകളിൽ മറ്റു ജില്ലകളെ അപേക്ഷിച്ച് കാറ്റിന്റെ ശക്തി കുറയുകയും ചെയ്യുന്നുണ്ട്.

എറണാകുളം വഴി കര കയറുന്ന കാറ്റ് തെക്കൻ ജില്ലകളിലും ലഭിക്കും. തമിഴ്നാട്ടിലെ കോയമ്പത്തൂര് പൊള്ളാച്ചി ഉൾപ്പെടെയുള്ള മേഖലകളിൽ വൈകിട്ടും രാത്രിയും ശക്തമായ കാറ്റുണ്ടാവും.

NB: കാലാവസ്ഥ അപ്ഡേറ്റുകളും വാർത്തകളും വാട്സപ്പിൽ ലഭിക്കാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക

Metbeat News

English Summary: Kerala Weather Update (April 8, 2026): Rising Heat and Strong Breezes Ahead of Elections. Kerala is set to experience a break from summer rain today . Clear skies are predicted statewide until Friday, with rain only likely to return by Saturday.