Kerala weather 15/04/26 : 12 ജില്ലകളിൽ ഉഷ്ണ മുന്നറിയിപ്പ്, വടക്കൻ കേരളത്തിലും തെക്കൻ ജില്ലകളിലും മഴ സാധ്യത

കേരളത്തിൽ ഇടുക്കിയും വയനാടും ഒഴികെ എല്ലാ ജില്ലകളിലും ഇന്നും Hot Humid weather ( ചൂടും അസ്വസ്ഥതയും ഉണ്ടാക്കുന്ന അന്തരീക്ഷം ) മുന്നറിയിപ്പ്. കേന്ദ്ര കാലാവസ്ഥ വകുപ്പിന്റെ ( IMD) പ്രവചന പ്രകാരം ഇന്ന് ചില ജില്ലകളിൽ ഒറ്റപ്പെട്ട മഴ സാധ്യതയുണ്ട്. തെക്ക്, വടക്ക് ജില്ലകളിലാണ് ഒറ്റപ്പെട്ട മഴ പ്രവചിക്കപ്പെടുന്നത്.

എന്നാൽ കടുത്ത വേനൽ ചൂടിന് ആശ്വാസമാകുന്ന രീതിയിൽ കേരളത്തിൽ മഴ സാധ്യത ഇപ്പോൾ ഇല്ലെന്നാണ് Metbeat Weather നിരീക്ഷിക്കുന്നത്. വടക്കൻ കേരളത്തിലും തെക്കൻ ജില്ലകളിലും ഇന്ന് ഒറ്റപ്പെട്ട മഴ സാധ്യതയുണ്ട്. രാത്രിയും വൈകിട്ടും ആയി മഴ പ്രതീക്ഷിക്കാം. വടക്കൻ കേരളത്തിൽ കണ്ണൂർ, കോഴിക്കോട് ജില്ലകളുടെ കിഴക്കൻ മേഖലകളിലാണ് മഴ സാധ്യത.

കർണാടകയ്ക്ക് മുകളിൽ രൂപപ്പെട്ട അതിമർദ്ദം ( Anti Cyclone) കേരളത്തിലും ചൂട് കൂട്ടാൻ ഇടയാകും. വടക്കൻ കർണാടകയുടെ ഉൾനാടൻ പ്രദേശങ്ങൾ, ആന്ധ്ര പ്രദേശ്, മഹാരാഷ്ട്ര, മധ്യ മറാത്ത്വാഡ എന്നിവിടങ്ങളിൽ ഉഷ്ണ തരംഗ സാധ്യത നിലനിൽക്കുന്നു.

കേരളത്തിൽ ഇന്നലെയും താപനില നാല്പത് ഡിഗ്രി സെൽഷ്യസ് രേഖപ്പെടുത്തി. പാലക്കാട്ടാണ് രണ്ടാമതും 40 ഡിഗ്രി താപനില രേഖപ്പെടുത്തിയത്. കഴിഞ്ഞ ദിവസവും പാലക്കാട് 40 ഡിഗ്രി താപനില ഉണ്ടായിരുന്നു. മറ്റു ജില്ലകളിൽ 36 നും 38 നും ഇടയിലാണ് പകൽ രേഖപ്പെടുത്തിയ ഉയർന്ന താപനില.

അന്തരീക്ഷ ആർദ്രത ( humidity) കൂടുതലുള്ളതിനാലാണ് കേരളത്തിൽ ഉഷ്ണം അനുഭവപ്പെടുന്നത്. ചൂടും ആർദ്രതയും ചേർന്ന് ഉണ്ടാകുന്ന താപസൂചിക ( heat index or feels like temperature) കേരളത്തിൽ കൂടുതലാണ്. ഈ കാരണത്താൽ ചൂടു മൂലം തളർന്നുപോകുന്ന അവസ്ഥ ഉണ്ടാകുന്നു. വിയർത്തു ഒലിക്കുന്ന സാഹചര്യവും ഉണ്ടാകും.

വരുന്ന ദിവസങ്ങളിലും സമാനമായ അന്തരീക്ഷ സ്ഥിതി തുടരാനാണ് സാധ്യത. ഈ മാസം അവസാനം ആണ് കൂടുതൽ വേനൽ മഴ ഇപ്പോഴത്തെ സാഹചര്യത്തിൽ പ്രതീക്ഷിക്കുന്നത്. ചൂടിനെ നേരിടാനുള്ള സംസ്ഥാന ദുരന്തനിവാരണ വകുപ്പിന്റെ ( KSDMA ) മുൻകരുതൽ സ്വീകരിക്കുക.

വായനക്കാർക്ക് Metbeat News ൻ്റെ ഐശ്വര്യവും സമൃദ്ധിയും നിറഞ്ഞ വിഷു ആശംസകൾ

English Summary : Kerala Weather Update April 15: Heat Warning in 12 Districts; Isolated Rain Expected in North and South Kerala. Hot and Humid weather warning has been issued for 12 districts in Kerala, excluding Idukki and Wayanad, as an anti-cyclone over Karnataka continues to drive temperatures up. While Palakkad recently hit a peak of 40°C.