Weather Kerala 26/07/26 : രണ്ട് ന്യൂനമർദ്ദങ്ങൾ, അവയെ ബന്ധിപ്പിച്ച് കാലവർഷ പാത്തി, കേരളത്തിൽ മഴ ശക്തിപ്പെടും

ബംഗാൾ ഉൾക്കടലിൽ കഴിഞ്ഞദിവസം രൂപപ്പെട്ട ന്യൂനമർദ്ദത്തെ (low pressure area) തുടർന്ന് കേരളത്തിൽ ഇന്ന് (Sunday ) ഒറ്റപ്പെട്ട മഴ ലഭിക്കും. വടക്കൻ ജില്ലകളിലാണ് കൂടുതൽ മഴ സാധ്യത. എന്നാൽ മധ്യകേരളത്തിലും ഇന്ന് രാവിലെയും വൈകിട്ടും ചില പ്രദേശങ്ങളിൽ മഴയുണ്ടാകും. തെക്കൻ ജില്ലകളിൽ ഇന്നും മഴ കുറഞ്ഞു നിൽക്കും.

നാളെ രാത്രി മുതൽ എല്ലാ ജില്ലകളിലും മഴ സാധ്യത

ബംഗാൾ ഉൾക്കടലിൽ ഒഡീഷ തീരത്തായാണ് ന്യൂനമർദ്ദം രൂപപ്പെട്ടത്. നിലവിൽ കേരളത്തിലെ അന്തരീക്ഷത്തെ ബംഗാൾ ഉൾക്കടലിലെ ന്യൂനമർദം കാര്യമായി സ്വാധീനിക്കുന്നില്ല. എന്നാൽ നാളെ (തിങ്കൾ) രാത്രി മുതൽ തെക്കൻ ജില്ലകളിൽ അടക്കം മഴ ലഭിക്കും. ചൊവ്വാഴ്ചയും ബുധനാഴ്ചയും കേരളത്തിൽ എല്ലാ ജില്ലകളിലും ഇടത്തരം മഴ സാധ്യത.

ഇനത്തെ മഴ സാധ്യതാ മേഖലകൾ

ഇന്ന് ( ഞായർ ) ഉച്ചയ്ക്ക് മുമ്പ് കോഴിക്കോട് ജില്ലയുടെ മലയോര മേഖലകളിൽ ഒറ്റപ്പെട്ട ശക്തമായ മഴ സാധ്യത. തൃശ്ശൂർ, എറണാകുളം, ഇടുക്കി, ആലപ്പുഴ ജില്ലകളിലും മഴ ലഭിക്കും. പത്തനംതിട്ട, കോട്ടയം, മലപ്പുറം ജില്ലകളിൽ ഇന്ന് ഒറ്റപ്പെട്ട പ്രദേശങ്ങളിൽ മഴയുണ്ടാകും.

ഉത്തരേന്ത്യൻ ന്യൂനമർദ്ദം തുടരുന്നു

തെക്കു പടിഞ്ഞാറൻ രാജസ്ഥാനിൽ കഴിഞ്ഞദിവസം രൂപപ്പെട്ട ന്യൂനമർദ്ദം തുടരുന്നത് ഉത്തരേന്ത്യയിൽ മഴ തുടരാൻ കാരണമാകും. എന്നാൽ ഗുജറാത്തിലും രാജസ്ഥാനിലും കഴിഞ്ഞദിവസം ഉണ്ടായ പ്രളയത്തിന് ശമനം ഉണ്ടാകും. ബംഗാൾ ഉൾക്കടലിലെ ന്യൂനമർദ്ദം പശ്ചിമബംഗാൾ ഭാഗത്തേക്കാണ് നീങ്ങുന്നത്.

ന്യൂനമർദ്ദങ്ങൾ ബന്ധിപ്പിച്ച് ന്യൂനമർദ്ദ പാത്തി

മുകളിൽ പറഞ്ഞ രണ്ട് ന്യൂനമർദ്ദങ്ങളും ബന്ധപ്പെടുത്തിക്കൊണ്ട് ഒരു ന്യൂനമർദ്ദ പാർത്തിയും രൂപപ്പെട്ടിട്ടുണ്ട്. ഇതിനെ Monsoon Through ( കാലവർഷ പാത്തി ഇ എന്നാണ് വിളിക്കുക. ഈ സാഹചര്യം ഉത്തരേന്ത്യൻ സംസ്ഥാനങ്ങളിൽ മഴ ശക്തിപ്പെടുത്താൻ കാരണമാകും. വടക്കൻ കേരളത്തിലും കർണാടകയിലും മഹാരാഷ്ട്രയിലും ലഭിക്കുന്ന മഴയിലും ഈ സിസ്റ്റത്തിന്റെ സ്വാധീനം ഉണ്ട്. എന്നാൽ മധ്യകേരളം മുതൽ തെക്കോട്ടേക്ക് ഈ സ്വാധീനം ഇല്ലാത്തതിനാൽ ആണ് മഴ ലഭിക്കാത്ത സാഹചര്യം തുടരുന്നത്.

ബംഗാൾ ഉൾകടലിലെ ന്യൂനമർദ്ദം കരകയറുകയും ഗുജറാത്തിലെ ന്യൂനമർദ്ദം ദുർബലമാവുകയും ചെയ്യുന്നതോടെ കാലവർഷക്കാറ്റ് മധ്യകേരളത്തിന് കൂടുതൽ അനുകൂലമായി മാറും. ഇതോടെ തെക്കൻ ജില്ലകളിലും മഴ ലഭിച്ചു തുടങ്ങും.

English Summary : Kerala Weather Update (26/07/2026): Two Low-Pressure Systems and Monsoon Trough to Intensify Rainfall Across the State. Current Rain Scenario: Isolated rainfall is expected across Kerala today (Sunday), primarily impacting the northern districts. Central regions will see morning and evening showers, while southern districts will continue to experience reduced rainfall