Kerala Weather 10/07/26 : ദക്ഷിണ ഗൈന കടലിലെ ചുഴലിക്കാറ്റ്; മഴ ഇന്നും നാളെയും തുടരാൻ സാധ്യത

കേരളത്തിൽ ഇന്നും ഒറ്റപ്പെട്ട മഴ ലഭിക്കും. വടക്കൻ കേരളത്തിലും മധ്യ ജില്ലകളിലും തെക്കൻ കേരളത്തിലും ഇന്ന് മഴ ലഭിക്കാൻ അനുകൂലമായ അന്തരീക്ഷ സ്ഥിതി ഉണ്ടാവും. എന്നാൽ കഴിഞ്ഞ ദിവസങ്ങളിൽ പെയ്തു പോലെയുള്ള കനത്ത മഴ സാധ്യത പൊതുവേ കുറവാണ്. ഒറ്റപ്പെട്ട ശക്തമായ മഴയും ഇടവേളകളും ലഭിക്കും.

തിരുവനന്തപുരം, കൊല്ലം, ആലപ്പുഴ, കോട്ടയം, പത്തനംതിട്ട, ഇടുക്കി, എറണാകുളം, തൃശൂർ, പാലക്കാട് മലപ്പുറം ജില്ലകളിലാണ് ഇന്ന് കൂടുതൽ മഴ പ്രതീക്ഷിക്കുന്നത്. വടക്കൻ ജില്ലകളിൽ മഴ കഴിഞ്ഞ് ദിവസങ്ങളെ അപേക്ഷിച്ച് കുറവായിരിക്കും. കാറ്റിന്റെ ശക്തിയിലും ദിശയിലും മാറ്റം വരുന്നതോടെ ഇന്ന് വൈകിട്ട് മുതൽ മഴ കുറയാനാണ് സാധ്യത.

ന്യൂനമർദ്ദവും ന്യൂനമർദ്ദ പാത്തിയും ദുർബലമാകുന്നു

ബംഗാൾ ഉൾക്കടലിലെ ന്യൂനമർദ്ദം കരകയറിയശേഷം മധ്യ ഇന്ത്യയ്ക്കു മുകളിൽ സ്ഥിതി ചെയ്തത് മൂലം ഉണ്ടായ അന്തരീക്ഷ മാറ്റവും ഗുജറാത്ത് തീരം മുതൽ കേരളതീരം വരെ കഴിഞ്ഞ ദിവസം രൂപപ്പെട്ട ന്യൂനമർദ്ദ പാത്തിയും ( ട്രഫ് ) ആണ് കഴിഞ്ഞ ദിവസങ്ങളിൽ കേരളത്തിൽ കനത്ത മഴക്ക് കാരണമായത്.

കേരളത്തിൻ്റെ വിവിധ ഭാഗങ്ങളിൽ മലവെള്ളപ്പാച്ചിൽ തുടരുന്നുണ്ട്. അതിനാൽ കിഴക്കൻ മലയോര മേഖലകളിൽ യാത്ര ചെയ്യുന്നവർ ജാഗ്രത പുലർത്തുക. മണ്ണാർക്കാട് കുന്തിപ്പുഴയിൽ ഇന്നലെ മലവെള്ളപ്പാച്ചിൽ ഉണ്ടായി. കാട്ടാനയുടെ ജഡം ഒഴുകിയെത്തി.

മണ്ണാർക്കാട് കുന്തിപ്പുഴയിലെ കുരുത്തിച്ചാലിൽ ഇന്നലെയുണ്ടായ മലവെള്ളപ്പാച്ചിലിൽ ഒഴുകി വന്ന കാട്ടാനയുടെ ജഡം . Photo : Special Arrangment

ദക്ഷിണ ചൈന കടലിലെ ചുഴലിക്കാറ്റ് മഴ നൽകും

ഇവ ദുർബലമാകുമെങ്കിലും ദക്ഷിണ ചൈന കടലിലെ ശക്തമായ ചുഴലിക്കാറ്റിലേക്ക് അറബിക്കടലിൽ നിന്ന് കാറ്റ് ആകർഷിക്കപ്പെടുന്ന സാഹചര്യമുണ്ട്. ഇത് മൂലം കടലിൽ രൂപം കൊള്ളുന്ന മേഘങ്ങൾ കരയിൽ പെയ്യാനുള്ള സാധ്യത കൂടി. ഈ കാരണത്താൽ ഇന്നും നാളെയും കേരളത്തിൽ മഴ തുടർന്നേക്കും എന്നാണ് Metbeat Weather ൻ്റെ നിരീക്ഷണം.

കേരളതീരത്ത് ഉയർന്ന തിരമാല, കാറ്റ് സാധ്യത

കേരളതീരത്ത് മാഹി മുതൽ വളപട്ടണം വരെ ഉയർന്ന തിരമാല സാധ്യത നിലനിൽക്കുന്നു. കേരളതീരത്ത് മണിക്കൂറിൽ 50 കിലോമീറ്റർ വരെ വേഗതയിലുള്ള കാറ്റിന് സാധ്യതയുള്ളതിനാൽ മത്സ്യത്തൊഴിലാളികൾ കടലിൽ പോകുന്നതിന് വിലക്കുണ്ട്.

English Summary : Isolated rainfall is expected across southern, central, and northern Kerala today. While the intensity will be lower compared to the heavy downpours of previous days, heavy spells with intermittent breaks will still occur. Rain is likely to recede by this evening as wind speed and direction change.