ന്യൂനമര്‍ദം: ശോഭായാത്രകളെ മഴ മങ്ങലേല്‍പ്പിക്കില്ല

ശ്രീകൃഷ്ണ ജയന്തി ദിനമായ നാളെയും കേരളത്തില്‍ മഴ സാധ്യത കുറവ്. തെക്കന്‍ കേരളത്തില്‍ ചിലയിടങ്ങളില്‍ ഉച്ചയ്ക്കു ശേഷം ഒറ്റപ്പെട്ട മഴ സാധ്യത. പത്തനംതിട്ട, കോട്ടയം, കൊല്ലം ജില്ലകളിലാണ് മഴ സാധ്യത. വടക്കന്‍ കേരളത്തില്‍ പ്രസന്നമായ കാലാവസ്ഥയാണ് നാളെയും പ്രതീക്ഷിക്കുന്നത്. ശോഭായാത്രകളെ കാലാവസ്ഥ പ്രതികൂലമായി ബാധിക്കില്ലെന്നാണ് ഞങ്ങളുടെ നിരീക്ഷണം.

ന്യൂനമര്‍ദം ബംഗാള്‍ ഉള്‍ക്കടലില്‍ സജീവമായി നിലനില്‍ക്കുന്ന സാഹചര്യത്തില്‍ ശോഭായാത്രകളെ മഴ പ്രതികൂലമായി ബാധിക്കുമോയെന്ന് ആശങ്കയുയര്‍ന്നിരുന്നു. ആന്ധ്രാപ്രദേശിനും ഒഡിഷ തീരത്തിനും സമീപമാണ് ന്യൂനമര്‍ദം സ്ഥിതി ചെയ്യുന്നത്. ഈ സിസ്റ്റം വടക്കു വടക്കുപടിഞ്ഞാറ് ദിശയില്‍ സഞ്ചരിച്ച് തെക്കന്‍ ചത്തീസ്ഗഡിനും വിദര്‍ഭയ്ക്കും ഇടയില്‍ രണ്ടു ദിവസത്തിനകം എത്തും.

കര്‍ണാടക മുതല്‍ മാന്നാര്‍ കടലിടുക്ക് വരെ അന്തരീക്ഷത്തിന്റെ താഴ്ന്ന ഉയരങ്ങളില്‍ ന്യൂനമര്‍ദ പാത്തിയും നിലകൊള്ളുന്നുണ്ട്. കാലവര്‍ഷക്കാറ്റ് പ്രതികൂലവും മേഘരൂപീകരണം കുറവുമായതിനാല്‍ കേരളത്തില്‍ ഈ സിസ്റ്റങ്ങള്‍ മഴ വ്യാപകമായി നല്‍കാന്‍ സാധ്യതയില്ല. എന്നാല്‍ തിങ്കളാഴ്ച രാത്രി മുതല്‍ കേരളത്തില്‍ മഴ അല്‍പം കൂടി മെച്ചപ്പെടുന്ന സാഹചര്യമുണ്ടാകും.

കേരളത്തില്‍ 11,500 ശോഭായാത്രകള്‍ സംഘടിപ്പിക്കുമെന്നും അഞ്ചുലക്ഷത്തോളം കുട്ടികള്‍ പങ്കെടുക്കുമെന്നും സംഘാടകര്‍ അറിയിച്ചു. തിരുവനന്തപുരം, കൊച്ചി, കോഴിക്കോട്, കൊച്ചി, കൊല്ലം, കോട്ടയം,ഗുരുവായൂര്‍, ആറന്മുള തുടങ്ങിയ സ്ഥലങ്ങളില്‍ വിപുലമായ ശോഭായാത്ര സംഗമങ്ങളും നടക്കും.