Kerala Weather 19/12/25 : വടക്കൻ കേരളം തണുക്കുന്നു, തെക്ക് ചക്രവാത ചുഴി

ഉത്തരേന്ത്യൻ ശൈത്യം കർണാടക വഴി കേരളത്തിൽ എത്തുന്നതോടെ വടക്കൻ കേരളത്തിൽ രാത്രിയും പുലർച്ചെയും തണുത്ത അന്തരീക്ഷ സ്ഥിതി വീണ്ടും. വയനാട് കോഴിക്കോട്, മലപ്പുറം, ജില്ലകളിലാണ് തണുത്ത അന്തരീക്ഷം അനുഭവപ്പെടുന്നത്. കർണാടകയിലെ മൈസൂർ വഴി എത്തുന്ന ശീത കാറ്റാണ് കാരണം.

തൃശ്ശൂർ മുതൽ തിരുവനന്തപുരം വരെയുള്ള തീരപ്രദേശങ്ങളിൽ രാത്രി താപനില 20 ഡിഗ്രിയോട് അടുത്താണ് അനുഭവപ്പെടുന്നത്. എന്നാൽ കോഴിക്കോട്, മലപ്പുറം ജില്ലയുടെയും കണ്ണൂർ ജില്ലയുടെ തെക്കൻ മേഖലയിലെ തീരദേശത്തും രാത്രി താപനില 16- 18 ഡിഗ്രിയിലേക്ക് താഴ്ന്നു.

വടക്കൻ കേരളത്തെ അപേക്ഷിച്ച് തെക്കൻ ജില്ലകളിൽ താരതമ്യേന തണുപ്പ് കുറവാണ്. 18 നും 20 ഡിഗ്രിക്കും ഇടയിലാണ് കോട്ടയം, പത്തനംതിട്ട, കൊല്ലം ജില്ലകളിൽ രാത്രി താപനില പ്രതീക്ഷിക്കുന്നത്. ആലപ്പുഴ, കൊല്ലം, തിരുവനന്തപുരം ജില്ലകളുടെ തീരദേശ മേഖലയിൽ താപനില 20 ഡിഗ്രിയിലേക്ക് എത്തും.

പൊതുവേ കേരളത്തിൻ്റെ എല്ലാ ഭാഗങ്ങളിലും മുൻ വർഷങ്ങളെ അപേക്ഷിച്ച് ഇപ്പോൾ തണുപ്പ് കൂടുതലായി അനുഭവപ്പെടുന്നുണ്ട്. പകൽ ചൂടിലും വ്യത്യാസം കണ്ടു തുടങ്ങി. കാസർകോട് ജില്ലയിലും എറണാകുളം മുതൽ തെക്കോട്ടുള്ള ജില്ലകളിലും പകൽ ചൂട് മറ്റു ജില്ലകളെ അപേക്ഷിച്ച് കൂടുതലാണ്. 32 മുതൽ 34 ഡിഗ്രി വരെയാണ് ഈ മേഖലയിൽ പകൽ താപനില പ്രതീക്ഷിക്കുന്നത്.

എന്നാൽ വടക്കൻ ജില്ലകളിൽ പകൽ താപനിലയും കുറഞ്ഞ നിലയിൽ തുടരുകയാണ്. 28 മുതൽ 30 ഡിഗ്രി വരെയാണ് കോഴിക്കോട്, മലപ്പുറം ജില്ലകളിൽ പകൽ താപനില പ്രതീക്ഷിക്കുന്നത്. വയനാട് ജില്ലയിൽ 26 മുതൽ 28 ഡിഗ്രി വരെയാണ് പകൽ ചൂട് പ്രതീക്ഷിക്കുന്നത്.

ഉത്തരേന്ത്യയിലെ അതിമർദം (High Pressure), പശ്ചിമ വാതത്തിന്റെ (Western Disturbance) സ്വാധീനം എന്നിവയാണ് ഉത്തരേന്ത്യൻ ശൈത്യ കാറ്റിനെ (Cold Dry Wind) ദക്ഷിണേന്ത്യയിൽ എത്തിക്കുന്നത്. കേരളത്തിൻ്റെ തെക്കൻ മേഖലയിൽ ഒരു ചക്രവാത ചുഴി (Cyclonic Circulation) ഇന്നലെ മുതൽ നിലനിൽക്കുന്നതിനാൽ തണുപ്പ് തെക്കൻ ജില്ലകളിലേക്ക് എത്തുന്നതിന് ചെറിയ പ്രതിരോധമുണ്ട്. സമുദ്രനിരപ്പിൽ നിന്ന് 1.5 കിലോമീറ്റർ ഉയരത്തിൽ ആയാണ് ചക്രവാത ചുഴി നിലനിൽക്കുന്നത്. ഇത് നീങ്ങുന്നതോടെ തെക്കൻ ജില്ലകളിലേക്കും തണുപ്പെത്തും.

ഇന്നലെ മുതൽ ഉത്തരേന്ത്യയിൽ ശൈത്യ തരംഗത്തെ (Cold Wave ) തുടർന്ന് കേന്ദ്ര കാലാവസ്ഥ വകുപ്പ് റെഡ് അലർട്ട് പ്രഖ്യാപിച്ചിട്ടുണ്ട്. ദക്ഷിണേന്ത്യയിലും ശൈത്യ തരംഗ മുന്നറിയിപ്പുണ്ട്. തെലങ്കാനയിലെ വിവിധ ജില്ലകളിലാണ് മുന്നറിയിപ്പ് നൽകിയത്. ഡിസംബർ പകുതിയോടെ ശൈത്യ തരംഗ മുന്നറിയിപ്പ് ദക്ഷിണേന്ത്യയിൽ പതിവുള്ളതല്ല. കേരളത്തിൽ ക്രിസ്മസ് വരെ സമാന കാലാവസ്ഥ തുടരുമെന്നാണ് പ്രതീക്ഷിക്കുന്നത്. മഴ അതുവരെ വിട്ടുനിൽക്കും.

English Summary: Kerala Weather 19/12/25: North Kerala is getting colder, cyclonic Circulation in the south