Kerala Summer Rain 25/02/26 : മഴ കൂടുതൽ ദിവസം തുടരാൻ സാധ്യത

കേരളത്തിൽ കഴിഞ്ഞ ദിവസം മുതൽ ശക്തിപ്പെട്ട മഴ ഈ മാസം അവസാനം വരെ തുടരും. കഴിഞ്ഞ ദിവസത്തെ Metbeat Weather ൻ്റെ പ്രവചനത്തിൽ ഫെബ്രുവരി 26 വരെയായിരുന്നു മഴ തുടരുമെന്ന് പറഞ്ഞിരുന്നത്. എന്നാൽ പുതിയ അന്തരീക്ഷ സ്ഥിതി (weather ) അവലോകനം ചെയ്യുമ്പോൾ മഴ മാർച്ച് രണ്ടു വരെ തുടരാനാണ് സാധ്യത.

ഒറ്റപ്പെട്ടതെങ്കിലും കിട്ടുന്നിടത്ത് ശക്തമായി പെയ്യും

കഴിഞ്ഞ ദിവസത്തെ പോലെ കൂടുതൽ പ്രദേശങ്ങളിൽ ശക്തമായി മഴ പെയ്യുന്നതിന് ( Isolated Heavy Rain) പകരം ഒറ്റപ്പെട്ട മഴ ( Isolated Rain) ചില പ്രദേശങ്ങളിൽ മാത്രം ലഭിക്കും. മധ്യകേരളത്തിലും തെക്കൻ ജില്ലകളിലും ആണ് ഇത്തരത്തിലുള്ള മഴ ലഭിക്കാൻ കൂടുതൽ സാധ്യത.

വൈകുന്നേരങ്ങളിൽ ഇടിയോടെ മഴ ലഭിക്കും

മഴക്കൊപ്പം ഇടിമിന്നലിനും (Thunderstorm ) സാധ്യതയുള്ളതിനാൽ ജാഗ്രത പാലിക്കണം. ബംഗാൾ ഉൾക്കടലിൽ കഴിഞ്ഞദിവസം രൂപപ്പെട്ട ന്യൂനമർദ്ദം (Low Pressure Area - LPA) ആയിരുന്നു മഴക്ക് പ്രധാന കാരണം. ഇതോടൊപ്പം തെക്കു കിഴക്കൻ അറബിക്കടലിൽ (South East Arabian Sea) കേരളതീരത്തോടു ചേർന്ന് മറ്റൊരു ചക്രവാത ചുഴി (cyclonic circulation) രൂപപ്പെട്ടിരുന്നു.

മഴ തുടരാൻ കാരണം ഇത്

ചക്രവാത ചുഴിയെ തുടർന്ന് കേരളത്തിലേക്ക് അറബിക്കടലിൽ നിന്ന് ഈർപ്പം എത്തുന്നത് വൈകുന്നേരങ്ങളിൽ മേഘരൂപീകരണത്തിന് കാരണമാകുന്നു. കിഴക്കൻ കാറ്റിൻറെ സ്വാധീനം കൂടി ഉള്ളതിനാൽ ഇരു ദിശകളിൽ നിന്നുള്ള കാറ്റ് കൂടിച്ചേരുകയും അഭിസരണം (Low Level convergence) മൂലം മഴ ലഭിക്കുകയും ചെയ്യുന്നു.

ഇന്നത്തോടെ മഴ കുറയില്ല

ഇന്നലെ ഇടുക്കി, തൃശ്ശൂർ, പാലക്കാട് ജില്ലകളിൽ മഴ ലഭിച്ചിരുന്നു. ഇന്നത്തോടെ മഴ കുറയും എന്നായിരുന്നു കരുതിയിരുന്നത്. എന്നാൽ വരും ദിവസങ്ങളിലും പ്രത്യേകിച്ച് മധ്യ കേരളം കേന്ദ്രീകരിച്ച് മഴ തുടരാനുള്ള സാധ്യതയാണ് നിലനിൽക്കുന്നതെന്ന് Metbeat Weather ലെ നിരീക്ഷകർ പറയുന്നു.

മാർച്ച് ആദ്യവാരത്തോടെ വീണ്ടും വെതർ സിസ്റ്റങ്ങൾ (weather systems) ദുർബലമാവുകയും കേരളത്തിൽ വരണ്ട കാലാവസ്ഥ (Dry Weather ) തിരികെ വരികയും ചെയ്യും.

ഉത്തരേന്ത്യ വേനലിലേക്ക്

ഇന്നലെയോടെ ഉത്തരേന്ത്യയിൽ ചൂടുകാലം (Summer) തുടങ്ങുന്നതിന്റെ സൂചനകൾ ദൃശ്യമായിട്ടുണ്ട്. നിലവിൽ ശൈത്യകാലമായതിനാൽ കേരളത്തിലായിരുന്നു ഇന്ത്യയിൽ ഏറ്റവും കൂടുതൽ ചൂട് രേഖപ്പെടുത്തിയിരുന്നത്. എന്നാൽ ഇനി വടക്കൻ മേഖലകളിൽ ചൂട് രേഖപ്പെടുത്താൻ തുടങ്ങും. സാധാരണ മാർച്ചിനു ശേഷമാണ് ഉത്തരേന്ത്യയിൽ ചൂട് തുടങ്ങുന്നത്. എന്നാൽ ഇത്തവണ നേരത്തെ ചൂട് കൂടുകയാണ്.

വടക്ക് പടിഞ്ഞാറ് ഇന്ത്യയിലെ (North West India) രാജസ്ഥാനിൽ കഴിഞ്ഞദിവസം താപനില 35 ഡിഗ്രി രേഖപ്പെടുത്തി. ഈ സീസണിൽ ലഭിക്കേണ്ട താപനിലയെക്കാൾ നാല് ഡിഗ്രി കൂടുതലാണിത്. രാജസ്ഥാനിൽ നിന്ന് തണുപ്പ് നീങ്ങി തുടങ്ങുന്നു എന്നാണ് ഇതിൻ്റെ അർത്ഥം.

കേരളത്തിലെ യഥാർത്ഥ വേനൽ വരുന്നു

ഡൽഹിയിലും തണുപ്പ് കുറയുകയാണ്. വരുംദിവസങ്ങളിൽ ചൂട് കൂടി തുടങ്ങും. ഉത്തരേന്ത്യ ചൂട് പിടിക്കുന്നതോടെ കേരളത്തിൽ യഥാർത്ഥ വേനൽ തുടങ്ങും. ഉത്തരേന്ത്യയിലെ വരണ്ട ചൂടുള്ള കാറ്റ് കേരളത്തിലേക്ക് വീശി തുടങ്ങുമ്പോഴാണ് നമ്മൾ വേനൽ കാലത്തിൻ്റെ മൂർദ്ധന്യാവസ്ഥയിൽ (Peak Summer Season) എത്തുന്നത്.
ഫെബ്രുവരിയിൽ കേരളത്തിൽ ചൂട് കൂടാറുണ്ടെങ്കിലും ഇത്തവണ ലഭിച്ച ഒറ്റപ്പെട്ട മഴ ചൂടിന് കുറവ് വരുത്തി. കഴിഞ്ഞ വർഷങ്ങളിൽ ഫെബ്രുവരിയിൽ 40 ഡിഗ്രി താപനില രേഖപ്പെടുത്തിയിരുന്നു.

ശീതകാല മഴയിൽ വർദ്ധനവ്

കഴിഞ്ഞ ദിവസം ലഭിച്ച മഴ ശീതകാല മഴയുടെ (Winter Rain) കണക്കിലാണ് ഉൾപ്പെടുത്തുക. ജനുവരി 1 മുതൽ ഫെബ്രുവരി 28 വരെ ലഭിക്കുന്ന മഴയാണ് ശീതകാല മഴയുടെ കണക്കിൽ ഉൾപ്പെടുത്തുക. കഴിഞ്ഞദിവസം മഴ തുടങ്ങുന്നത് വരെ ശീതകാല മഴയുടെ അളവിൽ 9% കുറവായിരുന്നു കേരളത്തിൽ ലഭിച്ചത്.

എന്നാൽ രണ്ടുദിവസം മഴ ലഭിച്ചതോടെ 80 ശതമാനം വർദ്ധനവിൽ എത്തി. വരും ദിവസങ്ങളിലും മഴ ലഭിക്കുന്നതോടെ, ശീതകാല മഴയുടെ കണക്കിൽ ഗണ്യമായ വർധനവ് ഉണ്ടാകും. ഫെബ്രുവരി, ജനുവരി മാസങ്ങളിലാണ് കേരളത്തിൽ ഏറ്റവും കുറവ് മഴ രേഖപ്പെടുത്തുന്ന മാസങ്ങൾ.

ഇടിമിന്നൽ ജാഗ്രത പാലിക്കുക. മിന്നൽ തൽസമയം ട്രാക്ക് ചെയ്യാൻ ഞങ്ങളുടെ വെബ്സൈറ്റിലെ താഴെ കാണുന്ന ലിങ്ക് ഉപയോഗിക്കാം.

English Summary: Kerala’s recent rainfall, originally expected to subside by February 26, is now predicted to persist until March 2, 2026. While the intensity may shift from widespread heavy rain to isolated showers, Central and Southern Kerala remain high-alert zones for evening thunderstorms.

lightning-strike-map
See lightning strikes in realtime nearby your area. Get free online access. This helps you to track the direction of thunderstorms.
https://metbeatnews.com/page/lightning-strike-map