ഓണത്തിന് ഒരു കുട്ട പൂ; സ്കൂൾമുറ്റത്ത് ചെണ്ടുമല്ലി കൃഷി വിളവെടുത്ത് വിദ്യാർത്ഥികൾ

സ്വന്തമായി കൃഷി ചെയ്ത പൂക്കൾ കാണാൻ എന്തൊരു ഭംഗിയാണ്. ഓണക്കാലം കൂടിയാവുമ്പോൾ ആ പൂക്കൾക്ക് ഏഴഴകാകും. സ്കൂൾമുറ്റത്ത് മനോഹരമായ പൂന്തോട്ടം കൃഷിചെയ്ത് ഓണത്തിന് ഒരു കുട്ടനിറയെ പൂവ് വിളവെടുത്തിരിക്കുകയാണ് കോഴിക്കോട് കക്കോടിയിലെ മാതൃബന്ധു എയുപി സ്‌കൂളിലെ വിദ്യാർത്ഥികളും അധ്യാപകരും. 1000 ചെണ്ടുമല്ലി(marigold) പൂക്കളാണ് അധ്യാപകരും വിദ്യാർത്ഥികളും നട്ടുവളർത്തിയത്. നാളെ നടക്കുന്ന ഓണപ്പരിപാടിയിൽ ഈ 1000 ചെണ്ടുമല്ലികൾ കൊണ്ട് ഓരോ ക്ലാസ്സിലും പൂക്കളം തീർക്കും.

പരിസ്ഥിതി ദിനത്തിൽ തുടങ്ങിയ പൂകൃഷി

ജൂൺ 5 പരിസ്ഥിതി ദിനത്തിൽ ആണ് ഓണത്തിന് ഒരു കുട്ടപൂ എന്ന ആശയം അധ്യാപകർ വിദ്യാർത്ഥികൾക്ക് മുൻപിൽ വച്ചത്. ആവശ്യം ഉന്നയിച്ച് കൃഷിഭവനുമായി സ്കൂൾ അധികൃതർ ബന്ധപ്പെട്ടപ്പോൾ പൂകൃഷിക്കുവേണ്ട 1000 തൈകൾ നൽകി എല്ലാ സഹകരണത്തോടെയും കൃഷിഭവനും ഒപ്പം നിന്നു. ഒപ്പം പിടിഎയും കൃഷിയോട് താൽപര്യമുള്ള കുട്ടികളും ഏറെ സന്തോഷത്തോടെ ഈ ആശയം ഇരുകൈയ്യും നീട്ടി സ്വീകരിച്ചു. പുതുതലമുറയിലെ കുട്ടികളിൽ പരിസ്ഥിതി പ്രവർത്തനങ്ങളോടും കൃഷിയോടും താൽപ്പര്യം ജനിപ്പിക്കുക എന്ന ഉദേശത്തോടെയാണ് ചെണ്ടുമല്ലി കൃഷി ആരംഭിച്ചത്.

പൂകൃഷിയെ പരിപാലിച്ച് കുട്ടികൾ

പൂകൃഷി പദ്ധതി ആരംഭിച്ചതുമുതൽ അവ വിളവെടുക്കാൻ പാകത്തിനെത്തുന്നതു വരെ കുട്ടികൾ ചെണ്ടുമല്ലി കൃഷിയെ പൊന്നു പോലെ നോക്കി. അവർ തങ്ങളുടെ പൂകൃഷി പരിപാലിക്കാൻ നേരത്തെ സ്‌കൂളിലെത്തും. പഠനം കഴിഞ്ഞ് വൈകീട്ടും പൂകൃഷി പരിപാലിച്ച് അവർ വീട്ടിലേക്ക് മടങ്ങും. കഴിഞ്ഞ വർഷത്തെ പച്ചക്കറി കൃഷിയും ഇതുപോലെ വൻ വിജയമായിരുന്നുവെന്ന് സ്‌കൂൾ ഹെഡ്മാസ്റ്റർ ഷിബു പി.കെ പറഞ്ഞു. പാഠപുസ്തകങ്ങൾക്കപ്പുറം കുട്ടികൾക്ക് കൃഷിയോടുള്ള താല്പര്യം കൂടി ജനിപ്പിക്കുക എന്ന ആശയവും ഈ പദ്ധതി മുന്നോട്ടു വക്കുന്നുണ്ട്.

Representative image

പരിമിതമായ സ്ഥലത്ത് പൂത്ത് നിന്ന് ചെണ്ടുമല്ലികൾ

പൂകൃഷിക്ക് സ്‌കൂളിലെ പരിമിതമായ സ്ഥലം ഒരു വലിയ വെല്ലുവിളിതന്നെയായിരുന്നു. എന്നാൽ പൂകൃഷി ആശയം കൗതുകമായി തോന്നിയ സ്വകാര്യ വൃക്തി സ്‌കൂളിന് മുൻപിലെ തൻ്റെ സ്ഥലം പൂകൃഷിക്കായി സ്വമേധയാ വിട്ടുനൽകുകയായിരുന്നു.

വരുംതലമുറ മൊബൈൽ ഫോണുകളിൽ മാത്രം ഒതുങ്ങിപോവുമ്പോൾ പെടയുന്ന രക്ഷിതാക്കളാണ് നമുക്ക് ചുറ്റും. എന്നാൽ ഈ അധ്യാപകർ കുട്ടികൾക്കായി കരുതിയത് ഒരു പൂക്കാലത്തിൻ്റെ സുഗന്ധമുള്ള ഭാവി സ്വപ്‌നമാണ്. ഇത്തരം നല്ല കാര്യങ്ങൾ ഓരോ സ്കൂളിൽ നിന്നും തുടങ്ങുമ്പോൾ കേരളം തന്നെ മാറുമെന്നതിൽ സംശയം വേണ്ട.

English Summary : Students and teachers of Mathrubandhu AUP School in Kakkodi, Kozhikode, successfully harvested a massive yield of 1,000 marigold flowers just in time for their Onam celebrations. Launched on World Environment Day (June 5) under the initiative "Onathinu Oru Kutta Poo" (A Basket of Flowers for Onam), the project aimed to foster environmental awareness and agricultural interest among the youth.