നേപ്പാൾ പ്രളയം: 17,000 കുട്ടികൾ മാനസികാഘാതത്തിൽ, സ്ഥിതി ഗുരുതരം

ഉറ്റവരേയും ഉടയവരേയും നഷ്ട്ടപ്പെട്ട നേപ്പാൾ പ്രളയം ഇന്നും കണ്ണീരോർമയാണ്. പിഞ്ചു കുട്ടികൾ പോലും ആ ഭയത്തെ ഇപ്പോഴും തരണം ചെയ്തു കൊണ്ടിരിക്കുകയാണ്. നേപ്പാളിലുണ്ടായ ആ മിന്നൽപ്രളയത്തിൽ 17,000-ത്തിലധികം കുട്ടികളാണ് മാനസികാഘാതത്തിൻ്റെ പിടിയിൽ പെട്ടിരിക്കുന്നത്. യുനിസെഫ് ആണ് ഇക്കാര്യം പുറത്തു വിട്ടത്. അവർ വീണ്ടും ജീവിതത്തിലേക്ക് കരകയറണമെങ്കിൽ കുട്ടികളുടെ അതിജീവനത്തിനും മാനസികാരോഗ്യ സംരക്ഷണത്തിനും അടിയന്തര പിന്തുണ ആവശ്യമാണെന്ന് യുനിസെഫ്( UNICEF) അറിയിച്ചു.

നിരവധി കാരണങ്ങളാണ് കുടികളുടെ മാനസിക ആഘാതത്തിന് കാരണമായിരിക്കുന്നത്.
പ്രിയപ്പെട്ടവരുടെ വേർപാട്, വീടുകളുടെയും സ്കൂളുകളുടെയും തകർച്ച, സ്വന്തം നാട്ടിലും ചുറ്റുപാടുകളിലും ഉണ്ടായ മാറ്റം, കാണാതായ ബന്ധുക്കളെക്കുറിച്ചുള്ള ആശങ്ക എന്നിവയാണ് കുട്ടികളിൽ കടുത്ത മാനസിക-വൈകാരിക ആഘാതത്തിന് കാരണമായതെന്ന് യുനിസെഫ് വ്യക്തമാക്കി.

കുട്ടികളുടെ സ്ഥിതി ഗുരുതരം

നിരവധി കുട്ടികളാണ് ഒറ്റപ്പെട്ടു പോയത്. സ്വന്തം മാതാപിതാക്കൾ ഉണ്ടോ എന്ന് പോലും അറിയാതെ 541 കുട്ടികളാണ് ഗുരുതര സ്ഥിതിയിലൂടെ കടന്നു പോകുന്നത്. അതേസമയം ഒറ്റപ്പെട്ടുപോയ 18 കുട്ടികളെ ഇതിനകം കുടുംബങ്ങളുമായി ഒന്നിപ്പിച്ചതായും യുനിസെഫ് അറിയിച്ചു. മാതാപിതാക്കളെ നഷ്ടപ്പെട്ട കുട്ടികൾക്കായി ബദൽ പരിചരണ സംവിധാനങ്ങൾ ഒരുക്കിവരികയാണ്.

Nepal Flash Flood Disaster: നേപ്പാളിലെ ദുരന്തത്തിന് മുൻപ് കൊടും ചൂട്; 55 വർഷത്തെ റെക്കോർഡ് ചൂടെന്ന് പഠനം, ദുരന്തത്തിന് കാരണം ഉരുകിയ മഞ്ഞോ ?
നേപ്പാൾ–ടിബറ്റ്(Nepal–Tibet) അതിർത്തിയിൽ ഉണ്ടായ വൻ പ്രളയത്തിൽ നിന്ന് ജനത ഇപ്പോഴും കരകയറിയിട്ടില്ല.
https://metbeatnews.com/55-year-heat-record-and-glacial-ice-melt-triggered-catastrophic-himalayan-landsl

ജീവിതത്തോട് പോരാടുന്നു

സ്കൂൾ സമയത്തായിരുന്നു പല പ്രദേശങ്ങളിലും പ്രളയമുണ്ടായത്. നിമിഷനേരം കൊണ്ട് ഭയാനകമായ സംഭവങ്ങൾക്ക് സാക്ഷികളായ നിരവധി കുട്ടികൾ ഇപ്പോൾ ഭയം, ഉത്കണ്ഠ, ദുഃഖം എന്നിവയുമായി പോരാടുകയാണ്. തങ്ങൾ അനുഭവിച്ചതിനെക്കുറിച്ച് സംസാരിക്കാൻ പോലും ചില കുട്ടികൾക്ക് കഴിയുന്നില്ലെന്ന് നേപ്പാളിലെ യുനിസെഫ് പ്രതിനിധി ആലീസ് അകുങ്ക പറഞ്ഞു.
പ്രളയത്തിന്റെ ദൃശ്യമായ നാശനഷ്ടങ്ങൾക്കപ്പുറം കുട്ടികളിലും കുടുംബങ്ങളിലും ആഴത്തിലുള്ള വൈകാരിക മുറിവുകളാണ് ദുരന്തം സൃഷ്ടിച്ചതെന്നും അകുങ്ക ചൂണ്ടിക്കാട്ടി.

വർഷങ്ങളായാലും ഭയം വിട്ടുമാറില്ല

ദുരന്തം കഴിഞ്ഞ് വർഷങ്ങളായാൽ പോലും കുട്ടികളിൽ ഭയം നിലനിൽക്കാൻ സാധ്യതയുണ്ടെന്ന് നുവാകോട്ടിലെ ത്രിശൂലി ആശുപത്രിയിലെ മെഡിക്കൽ ഓഫീസറും മുൻ യുനിസെഫ് യൂത്ത് അഡ്വക്കേറ്റുമായ ഡോ. ഷിതാൻഷു ധാക്കൽ പറഞ്ഞു. ദീർഘകാല മാനസിക പ്രത്യാഘാതങ്ങൾ ഒഴിവാക്കാൻ ഉടൻ തന്നെ മാനസിക പ്രഥമശുശ്രൂഷയും തുടർച്ചയായ പിന്തുണയും നൽകേണ്ടതുണ്ടെന്നും അദ്ദേഹം വ്യക്തമാക്കി.

കുടുംബങ്ങളെ കണ്ടെത്തുന്നതിനും കുട്ടികളെ അവരുമായി ഒന്നിപ്പിക്കുന്നതിനും സാമൂഹിക പിന്തുണ നൽകുന്നതിനുമായി സർക്കാർ അധികാരികളുമായും മറ്റ് സംഘടനകളുമായും ചേർന്ന് പ്രവർത്തിക്കുകയാണെന്ന് യുനിസെഫ് അറിയിച്ചു.

കുട്ടികൾക്കായി പ്രത്യേക നിരീക്ഷണം

അപകടസാധ്യതയുള്ള കുട്ടികളെ കണ്ടെത്തി അവർക്കാവശ്യമായ സേവനങ്ങൾ ലഭ്യമാക്കുന്നതിനും മനുഷ്യക്കടത്തും ചൂഷണവും തടയുന്നതിനുമായി പ്രത്യേക നിരീക്ഷണ സംവിധാനവും ഏർപ്പെടുത്തിയിട്ടുണ്ട്. യുനിസെഫിന്റെ പിന്തുണയോടെ പ്രവർത്തിക്കുന്ന 13 കേന്ദ്രങ്ങൾ ഉൾപ്പെടെ 18 ശിശുസൗഹൃദ കേന്ദ്രങ്ങൾ നിലവിൽ പ്രവർത്തിക്കുന്നുണ്ട്. സൈക്കോളജിസ്റ്റുകൾ, കൗൺസിലർമാർ, ഫ്രണ്ട്‌ലൈൻ പ്രവർത്തകർ എന്നിവരുടെ നേതൃത്വത്തിലാണ് കുട്ടികൾക്ക് പിന്തുണ നൽകുന്നത്.

സെപ്റ്റംബർ 15 രാത്രി ഏഴുമണി വരെയുള്ള കണക്കനുസരിച്ച് പ്രളയത്തിൽ 1,399 പേർ മരിക്കുകയും 5,179 പേരെ കാണാതാവുകയും ചെയ്തതായി നേപ്പാളിലെ നാഷണൽ ഡിസാസ്റ്റർ റിസ്ക് റിഡക്ഷൻ ആൻഡ് മാനേജ്മെന്റ് അതോറിറ്റി (NDRRMA) അറിയിച്ചു.

Nepal Flood : നേപ്പാൾ പ്രളയം: 5,000ലേറെ പേരെ ഇനിയും കണ്ടെത്താനായില്ല; തിരച്ചിൽ തുടരുന്നു
ലോകത്തെ ഞെട്ടിച്ച നേപ്പാൾ ദുരന്തത്തിൽ നിന്ന് ഇപ്പോഴും ജനതയ്ക്ക് കരകയറാൻ പറ്റിയിട്ടില്ല. നേപ്പാളിലെ പ്രളയദുരന്തം നടന്ന് ഉറ്റവരെ തേടിയുള്ള പലരുടേയും യാത
https://metbeatnews.com/over-5000-missing-as-desperate-tunnel-rescue-operations-continue

ചിറ്റ്വൻ, നവൽപരാസി ഈസ്റ്റ്, നവൽപരാസി വെസ്റ്റ്, നുവാകോട്ട്, രസുവ, ഗോർഖ, ധാഡിംഗ്, തനാഹുൻ തുടങ്ങിയ ജില്ലകളിലാണ് വ്യാപക നാശനഷ്ടങ്ങൾ റിപ്പോർട്ട് ചെയ്തിരിക്കുന്നത്. 13,742 പേരെ രക്ഷപ്പെടുത്തിയതായും 19 ആശുപത്രികളിലായി 343 പേർക്ക് ചികിത്സ നൽകിയതായും NDRRMA അറിയിച്ചു. ഇതിൽ 282 പേരെ ചികിത്സയ്ക്ക് ശേഷം ഡിസ്ചാർജ് ചെയ്തു. വിവിധ സുരക്ഷാ ഏജൻസികളുടെ നേതൃത്വത്തിൽ 9,496 പേർക്ക് ചികിത്സ ലഭ്യമാക്കിയതായും അധികൃതർ വ്യക്തമാക്കി.

ദുരന്തബാധിത മേഖലകളിൽ രക്ഷാപ്രവർത്തനത്തിനായി നേപ്പാൾ ആർമി 1,561 ഹെലികോപ്റ്റർ സർവീസുകളും, എ.പി.എഫ്-നേപ്പാൾ 320 ഹെലികോപ്റ്റർ സർവീസുകളും നടത്തിയതായും NDRRMA അറിയിച്ചു.

English Summary: devastating flash floods in Nepal have left more than 17,000 children suffering from severe trauma, anxiety, and distress. According to a release by UNICEF, these children urgently require mental health and psychosocial support following the loss of loved ones, destruction of homes and schools, and displacement.