Kerala Summer Rain 22/02/26 : ന്യൂനമർദ്ദം ശക്തിപ്പെട്ടു, ഇന്നും കേരളത്തിൽ മഴ സാധ്യത

കേരളത്തിൽ ഇന്നും മഴ സാധ്യത. ഇന്നലെ ലഭിച്ച പോലെ വൈകിട്ടോടെയാണ് മഴ ലഭിക്കുക. പത്തനംതിട്ട, കോട്ടയം, ആലപ്പുഴ ജില്ലകളിൽ ശക്തമായ മഴക്കുള്ള സാധ്യതയെ തുടർന്ന് കേന്ദ്ര കാലാവസ്ഥ വകുപ്പ് ഇന്ന് മഞ്ഞ അലർട്ട് പ്രഖ്യാപിച്ചു. കേരളത്തിലെ എല്ലാ ജില്ലകളിലും ഇന്ന് മഴ സാധ്യതയുണ്ടെന്നും കാലാവസ്ഥ വകുപ്പിന്റെ പ്രവചനത്തിൽ പറയുന്നു.

സ്വകാര്യ കാലാവസ്ഥ, ക്ലൈമറ്റ് റിസ്ക് സ്ഥാപനമായ Metbeat Weather ൻ്റെ നിരീക്ഷണ പ്രകാരം, കോട്ടയം മുതൽ മലപ്പുറം വരെയുള്ള ജില്ലകളിൽ ശക്തമായ മഴ സാധ്യത ഇന്നും നിലനിൽക്കുന്നു. മലപ്പുറം ജില്ലയുടെ കിഴക്കൻ പ്രദേശം, പാലക്കാട് ജില്ല, ഇടുക്കി, എറണാകുളം, കോട്ടയം, പത്തനംതിട്ട ജില്ലകളിലാണ് ഇന്ന് കൂടുതൽ മഴ പ്രതീക്ഷിക്കുന്നത്.

ഇപ്പോൾ കേരളത്തിൽ ലഭിക്കുന്ന മഴ വരും ദിവസങ്ങളിലും ഒറ്റപ്പെട്ട രീതിയിൽ തുടരുമെന്ന് Metbeat Weather സ്ഥാപകൻ weatherman kerala പറഞ്ഞു. ചൊവ്വാഴ്ചയും തെക്കൻ ജില്ലകളിൽ മഴ പ്രതീക്ഷിക്കാം. ഈ മാസം 27ന് ശേഷം വീണ്ടും വരണ്ട കാലാവസ്ഥയിലേക്ക് അന്തരീക്ഷ സ്ഥിതി മാറുമെന്നാണ് ഇപ്പോഴത്തെ നിരീക്ഷണം.

ബംഗാൾ ഉൾക്കടലിൽ രൂപപ്പെട്ട ന്യൂനമർദ്ദമാണ് കേരളത്തിൽ മഴയ്ക്ക് കാരണമാകുന്ന പ്രധാന അന്തരീക്ഷ ഘടകം. ഇന്നലെ രൂപപ്പെട്ട ന്യൂനമർദ്ദം ഇന്ന് വീണ്ടും ശക്തിപ്പെട്ട് ശക്തി കൂടിയ ന്യൂനമർദ്ദം (well marked low pressure - WML) ആയി മാറിയിട്ടുണ്ട്.

ഇത് കേരളത്തിന് പുറമേ തമിഴ്നാട്ടിലും മഴ നൽകും. ഇന്നലെ കേരളത്തിൽ വിവിധ പ്രദേശങ്ങളിൽ ശക്തമായ മഴ ലഭിച്ചിരുന്നു. കാലാവസ്ഥ വകുപ്പിന്റെ മാപിനികളിലെ ഡാറ്റ പ്രകാരം, ഏറ്റവും കൂടുതൽ മഴ ഇന്നലെ രേഖപ്പെടുത്തിയത് ചേർത്തലയിലാണ്. 90.8 എം.എം മഴയാണ് ചേർത്തലയിൽ രേഖപ്പെടുത്തിയത്.

കണ്ണൂർ മുതൽ തിരുവനന്തപുരം വരെയുള്ള ജില്ലകളിലാണ് ഇന്നലെ മഴ ലഭിച്ചത്. ആദ്യമഴ റിപ്പോർട്ട് ചെയ്തത് കോഴിക്കോട് ജില്ലയിലെ താമരശ്ശേരിക്ക് സമീപം വൈകിട്ട് മൂന്നരയോടെ പുല്ലാഞ്ഞിമേട്ടിലാണ്. തുടർന്ന് കോഴിക്കോട് ജില്ലയിലെ ബാലുശ്ശേരിയിലും അരമണിക്കൂർ നീണ്ട ശക്തമായ മഴ ലഭിച്ചു. പരിസരപ്രദേശങ്ങളായ കക്കോടി ഉൾപ്പെടെയുള്ള പ്രദേശങ്ങളിൽ രാത്രിയാണ് ലഭിച്ചത്.

മലപ്പുറം ജില്ലയിലും പിന്നീട് തെക്കൻ കേരളത്തിലെ വിവിധ ജില്ലകളിലും മഴ ലഭിച്ചു. തിരുവനന്തപുരം കൊല്ലം ജില്ലകളിൽ വൈകിട്ടോടെയാണ് മഴ ലഭിച്ചത്. രാത്രി വൈകി തൃശ്ശൂർ ജില്ലയിലും പാലക്കാട് ജില്ലയിലും മലപ്പുറം ജില്ലയുടെ തീരദേശങ്ങളിലും മഴ ലഭിച്ചു. മഴക്കൊപ്പം ശക്തമായ മിന്നലും പലയിടങ്ങളിലും ഉണ്ടായിരുന്നു. താനൂരിൽ മിന്നലേറ്റ് തെങ്ങിന് തീപിടിച്ചു. ആളപായമോ നാശനഷ്ടമോ റിപ്പോർട്ട് ചെയ്തിട്ടില്ല.

തൃശ്ശൂരിൽ ശക്തമായ മഴയാണ് രാത്രി കരുതുന്നത്. കൊടുങ്ങല്ലൂരിൽ 49.4 എം.എം മഴ ലഭിച്ചപ്പോൾ ചാലക്കുടി 80.6 m m മഴയുമായി തൃശ്ശൂർ ജില്ലയിൽ ഒന്നാമതെത്തി.

പാലക്കാട് ജില്ലയിൽ ആലത്തൂരിൽ ഏറ്റവും കൂടുതൽ മഴ രേഖപ്പെടുത്തി. 43 മില്ലിമീറ്റർ മഴയാണ് ആലത്തൂരിൽ ലഭിച്ചത്. പട്ടാമ്പിയിൽ 29.4 എം എം മഴ ലഭിച്ചു.

എറണാകുളം സൗത്തിൽ 68 mm ലഭിച്ചു. ആലപ്പുഴ ജില്ലയിൽ ചേർത്തല കഴിഞ്ഞാൽ കായംകുളത്താണ് കൂടുതൽ മഴ ലഭിച്ചത്. 72.2 എം എം മഴ ലഭിച്ചു.

കോട്ടയത്ത് കാഞ്ഞിരപ്പള്ളിയിൽ ആണ് ഏറ്റവും കൂടുതൽ മഴ റിപ്പോർട്ട് ചെയ്തത്. 79 m m. വൈക്കത്ത് 64 ഉം കുമരകത്ത് 52 ഉം എം.എം മഴ ലഭിച്ചു. കോട്ടയത്ത് 46 എം എം മഴയാണ് ലഭിച്ചത്.

ഇടുക്കിയിൽ മഴ ദുർബലമായിരുന്നു. വയനാട് പാറയിൽ അഞ്ച് എംഎം മഴ ലഭിച്ചു. ഇടുക്കിയിൽ 1.8 എം.എം മഴ രേഖപ്പെടുത്തി.

പത്തനംതിട്ടയിൽ കോന്നിയിലാണ് ശക്തമായ മഴ രേഖപ്പെടുത്തിയത്. 64 എം എം . കുരുട മണ്ണിൽ 26.6 എം എം മഴ രേഖപ്പെടുത്തി.

കൊല്ലത്ത് പുനലൂരിൽ പതിനെട്ടും ആര്യങ്കാവിൽ പതിനാറും എം എം മഴ രേഖപ്പെടുത്തി.

തിരുവനന്തപുരം ജില്ലയിൽ വിമാനത്താവളത്തിൽ 10.5 മില്ലിമീറ്ററും, നഗരത്തിൽ 2.1 എം.എം മഴ രേഖപ്പെടുത്തി.

തെക്ക് പടിഞ്ഞാറൻ ബംഗാൾ ഉൾക്കടലിന് മുകളിലായി ശക്തി കൂടിയ ന്യൂനമർദ്ദം (Well Marked Low Pressure Area) സ്ഥിതി ചെയ്യുന്നതാണ് ഇന്നും കേരളത്തിൽ മഴ ലഭിക്കുന്നതിന് കാരണം. WML അടുത്ത 48 മണിക്കൂറിനുള്ളിൽ ആദ്യം പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിക്കാനും, തുടർന്ന് ക്രമേണ വടക്കുകിഴക്ക് ദിശയിലേക്ക് തിരിഞ്ഞ് തെക്കുപടിഞ്ഞാറൻ ബംഗാൾ ഉൾക്കടലിന് മുകളിലൂടെ നീങ്ങാനും സാധ്യതയുണ്ട്.

English Summary : Kerala Rain Update Feb 22: Yellow Alert in 3 Districts as Low Pressure Intensifies; Full Details Here. Heavy summer rains continue to lash Kerala as a Well Marked Low Pressure system intensifies in the Bay of Bengal. The IMD has issued a Yellow Alert for Pathanamthitta, Kottayam, and Alappuzha today. Expect widespread evening showers across the state, with heavy rainfall predicted for central and southern districts until February 27.