കേരളം ഉരുകുന്നു, തൊഴിൽ സമയങ്ങൾ മാറുന്നു, മെയ് 20 വരെയാണ് ജോലി സമയങ്ങളിൽ മാറ്റം

സംസ്ഥാനത്ത് ചൂട് കൂടിയതോടെ ‍ചില കാര്യങ്ങളിൽ മാറ്റം വന്നുതുടങ്ങി. അതിൽ ഏറ്റവും പ്രധാനപ്പെട്ടതാണ് തൊഴിലാളികളുടെ ജോലി സമയം. ചൂടുകൂടിയതോടെ തൊഴിലാളികളുടെ ജോലി സമയം ക്രമീകരിച്ചിരിക്കുകയാണ്. സൂര്യാഘാതം അൾട്രാവയലറ്റ് രശ്‌മികൾ ഉൾപ്പെടെയുള്ള സാഹചര്യങ്ങൾ ചൂണ്ടിക്കാട്ടിയാണ് ഈ നടപടി. മെയ് 20 വരെയുള്ള ജോലി സമയമാണ് ക്രമീകരിച്ചിരിക്കുന്നത്.

ക്രമീകരിച്ച ജോലി സമയം ഇങ്ങനെ

പകൽ സമയം വെയിലിൽ ജോലി ചെയ്യുന്ന തൊഴിലാളികൾക്ക് ഉച്ചക്ക് 12.00 മുതൽ 3.00 മണി വരെ വിശ്രമ സമയമായി നിശ്ചയിച്ചിട്ടുണ്ട്. രാവിലെ 7 മുതൽ വൈകിട്ട് 7 മണി വരെയുള്ള സമയത്തിനുള്ളിൽ എട്ട് മണിക്കൂർ തൊഴിൽ സമയം അവസാനിക്കുന്ന തരത്തിലാണ് സമയ ക്രമീകരണം. ഷിഫ്റ്റുള്ളവർക്ക് രാവിലത്തെ ഷിഫ്റ്റ് ഉച്ചക്ക് 12 മണിക്ക് അവസാനിക്കുന്ന തരത്തിലും ഉച്ചക്ക് ശേഷമുള്ള ഷിഫ്റ്റ് വൈകുന്നേരം 3 മണിക്ക് ആരംഭിക്കുന്ന തരത്തിലാണ് ക്രമീകരിച്ചത്. അതേസമയം സൂര്യാഘാതമേൽക്കാൻ സാധ്യതയുള്ള മേഖലകളെയാണ് ഉത്തരവിൽ ഉൾപ്പെടുത്തിയത്.

ഇടനാട് മേഖലകളിൽ താപനില കൂടുതൽ

അന്തരീക്ഷ താപനില നിലവിൽ പലയിടങ്ങളിലും സാധാരണ നിലയിലാണെങ്കിലും ഇടനാട് മേഖലയിൽ താപനില അല്പം കൂടുതലാണ്. പൊതുവെ ചൂട് വർധിച്ചു വരുന്ന സാഹചര്യത്തിൽ
ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങി നിരവധി ഗുരുതരമായ ചൂട് ആരോഗ്യപ്രശ്നങ്ങൾക്ക് കാരണമാകും എന്നതിൽ സംശയം വേണ്ട. ആയതിനാൽ പൊതുജനങ്ങൾ ജാഗ്രത പാലിക്കേണ്ടതാണ്.

അൾട്രാവയലറ്റ് രശ്‌മികൾ

തുടർച്ചയായി കൂടുതൽ സമയം അൾട്രാവയലറ്റ് രശ്മികൾ (UV Index)ശരീരത്തിൽ ഏൽക്കുന്നത് സൂര്യാതപത്തിനും ത്വക്ക് രോഗങ്ങൾക്കും നേത്രരോഗങ്ങൾക്കും മറ്റ് ആരോഗ്യ പ്രശ്നങ്ങൾക്കും കാരണമായേക്കാമെന്ന് പ്രശസ്ത കാലാവസ്ഥാ നിരീക്ഷകൻ രാജീവൻ എരിക്കുളം ഫെയ്‌സ്ബുക്കിൽ പങ്കുവച്ചിരുന്നു. പൊതുജനങ്ങൾ സുരക്ഷാമുൻകരുതലുകൾ സ്വീകരിക്കണമെന്നും മുന്നറിപ്പ് നൽകുന്നുണ്ട്. പകൽ 10 മണി മുതൽ 3 മണി വരെയുള്ള സമയങ്ങളിലാണ് ഉയർന്ന അൾട്രാവയലറ്റ് സൂചിക രേഖപ്പെടുത്തപ്പെടുന്നത്. ആയതിനാൽ ആ സമയങ്ങളിൽ കൂടുതൽ നേരം ശരീരത്തിൽ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കുക.

അധികൃതരുടെ നിർദ്ദേശങ്ങൾ പാലിക്കാതെ മറ്റ് വഴികളില്ല

ഏതായാലും സംസ്ഥാനത്ത് പൊതുവെ ചൂട് വർധിച്ചു വരുന്ന സാഹചര്യത്തിൽ പൊതുജനങ്ങൾക്കായി സംസ്ഥാന ദുരന്ത നിവാരണ അതോറിറ്റി പുറപ്പെടുവിക്കുന്ന ജാഗ്രത നിർദേശങ്ങൾ പുറപ്പെടുപിച്ചിട്ടുണ്ട്.
പകൽ 11 am മുതല്‍ 3 pm വരെയുള്ള സമയത്ത് നേരിട്ട് ശരീരത്തിൽ കൂടുതൽ സമയം തുടർച്ചയായി സൂര്യപ്രകാശം ഏൽക്കുന്നത് ഒഴിവാക്കുക എന്നതാണ് ഒന്നാമത്തെ കാര്യം. നന്നായി വെള്ളം കുടിക്കുക, പുറത്തിറങ്ങുമ്പോൾ വേണ്ട മുൻകരുതലുകൾ സ്വീകരിക്കുക, കുട്ടികളെ പ്രത്യേകം ശ്രദ്ധിക്കുക തുടങ്ങി നിരവധി നിർദ്ദേശങ്ങളാണ് സംസ്ഥാന ദുരന്ത നിവാരണ അതോറിറ്റി പുറപ്പെടുവിച്ചിരിക്കുന്നത്. രണ്ട് മാസം വേനൽകാല അവസ്ഥകളിൽ നിന്ന് രക്ഷപ്പെടണമെങ്കിൽ നിർദ്ദേശങ്ങൾ പാലിച്ചേ പറ്റൂ.

English Summary : Due to rising temperatures and the increasing risk of heatstroke in Kerala, the state government has rescheduled outdoor working hours to protect laborers.