കോടികളുടെ വിദേശനാണ്യം കേരളത്തിന് ലഭിക്കാൻ പോകുന്നു.എങ്ങനെയാണെന്നല്ലേ
സുപരിചതമായ തിലതാര എള്ളെണ്ണ വിദേശ രാജ്യങ്ങളിലേക്കു കയറ്റുമതി ചെയ്യാൻ ധാരണയായതിനെ തുടർന്ന് വരുന്ന സീസണിൽ എള്ളുകൃഷി 500 ഹെക്ടറിലേക്ക് വ്യാപിപ്പിക്കാനുള്ള ഒരുക്കത്തിലാണ് ഓണാട്ടുകരയിലെ കർഷകർ.പ്രതിവർഷം 24,000 ലീറ്റർ വീതം തിലതാര എള്ളെണ്ണ കയറ്റുമതി ചെയ്യാനാണു കൊച്ചിയിലെ സ്ഥാപനവുമായി ധാരണയായിരിക്കുന്നത്.ഇതോടെ കോടികളുടെ വിദേശനാണ്യമാണ് കേരളത്തിന് ലഭിക്കാൻ പോകുന്നത്.ഈ സന്തോഷം ആഘോഷിക്കുകയാണ് ഓണാട്ടുകരയിലെ കർഷകർ.

അതേസമയം ഓണാട്ടുകരയുടെ തനത് എള്ള് കൃത്യമായ പരിപാലനത്തോടെ കൃഷി ചെയ്താൽ ഹെക്ടറിൽ നിന്ന് 400 കിലോ കിട്ടും.അതിനു കൃഷി 500 ഹെക്ടറിലേക്ക് വ്യാപിപ്പിക്കണം.ഇതിന്റെ ഭാഗമായി ഓണാട്ടുകര മേഖലയിലെ 39 പഞ്ചായത്തുകൾ, 5 നഗരസഭകൾ എന്നിവിടങ്ങളിലേക്ക് ആവശ്യമായ എള്ള് വിതരണം ചെയ്തിരിക്കുകയാണ്.ഓരോ മേഖലയിലെയും കൃഷി അസി.ഡയറക്ടർ ഓഫിസുകളിൽ എള്ളെത്തിച്ചു കഴിഞ്ഞു.ഇവ കൃഷിഭവനുകൾ വഴി കർഷകർക്കു നൽകും. കൊച്ചിയിൽ നിന്നെത്തിയ പ്രതിനിധികൾ എണ്ണയുടെ നിലവാരം ഉറപ്പാക്കി ഇതുവരെ 2000 കിലോ എള്ളുവിതരണം പൂർത്തിയാക്കിയിട്ടുണ്ട്.കൊച്ചിയിലെ കയറ്റുമതി സ്ഥാപനത്തിന്റെ പ്രതിനിധികൾ ഏജൻസിയുടെ മാവേലിക്കര കല്ലിമേൽ ജില്ലാ കൃഷിത്തോട്ടത്തിലെ മൂല്യവർധിത ഉൽപാദന യൂണിറ്റ് സന്ദർശിച്ച് എണ്ണയുടെ സാംപിൾ പരിശോധിച്ച് നിലവാരം ഉറപ്പാക്കിയിട്ടുണ്ട്.ധാരണാപത്രം ഒപ്പിടുമ്പോൾ വില തീരുമാനിക്കുമെന്നാണ് റിപ്പോർട്ട്.

ഓണാട്ടുകരയിലൂടെ സഞ്ചരിച്ചാൽ എള്ളിൻപൂവിന്റെ മണം ആസ്വദിക്കാം

എള്ളിൻ തണ്ടു മണക്കും വയലുകൾ’ എന്ന കവിയുടെ വരികൾ ഓണാട്ടുകരയുടെ കാർഷിക സംസ്കൃതിയെ കുറിച്ചുള്ളതാണ്.മകരം കുംഭം മാസങ്ങളിൽ ഓണാട്ടുകരയിലൂടെ സഞ്ചരിച്ചാൽ എള്ളിൻപൂവിന്റെ തനിമയാർന്ന ഗന്ധം ആസ്വദിക്കാം.കാർഷികപ്പെരുമ നിലനിന്നിരുന്ന ഓണാട്ടുകരയുടെ മുഖമുദ്രയായിരുന്നു എള്ളു കൃഷി.ഫലഭൂയിഷ്ഠമായ മണ്ണ്, അനുകൂലമായ കാലാവസ്ഥ,രാപ്പകൽ അദ്ധ്വാനിക്കുന്ന കർഷകരും തൊഴിലാളികളും എന്നിവയാൽ സമ്പന്നമായിരുന്ന ഓണാട്ടുകരയിൽ പുരാതനായ ഒരു എണ്ണക്കുരുവായി എള്ളു കൃഷി ചെയ്തിരുന്നു.

ഏറ്റവും കൂടുതൽ എള്ള് ഉൽപാദിപ്പിക്കുന്നത് ഇന്ത്യയിൽ

ലോകത്ത് ഏറ്റവും കൂടുതൽ സ്ഥലത്ത് എള്ളു കൃഷി ചെയ്യുന്നതും ഏറ്റവും കൂടുതൽ എള്ള് ഉൽപാദിപ്പിക്കുന്നതും ഇന്ത്യയിലാണ്.ഇന്ത്യയിൽ പ്രധാന എള്ളുൽപാദന കേന്ദ്രങ്ങൾ ഗുജറാത്ത്, ബംഗാൾ,കർണാടക, മധ്യപ്രദേശ്, രാജസ്ഥാൻ, തമിഴ്നാട്, ആന്ധ്രപ്രദേശ്, മഹാരാഷ്ട്ര എന്നിവയാണ്.അളവിൽ കുറവിലാണെങ്കിലും നമ്മുടെ സംസ്ഥാനത്തും എള്ളു കൃഷിയുണ്ട്.കേരളത്തിൽ ഏറ്റവും കൂടുതൽ എള്ളു കൃഷി ചെയ്യുന്ന സ്ഥലങ്ങൾ ആലപ്പുഴ, കൊല്ലം ജില്ലകളിൽ വ്യാപിച്ചുകിടക്കുന്ന മണൽനിലങ്ങളാണ്.