മഴ മാറി പെട്ടെന്ന് ചൂടുള്ള അന്തരീക്ഷം വന്നതോടെ പനിയും ജലദോഷവും സംസ്ഥാനത്ത് തുടരുന്നു. പെട്ടെന്ന് വന്നു പോകുമായിരുന്ന പനിയും അനുബന്ധ ലക്ഷണങ്ങളും ആഴ്ചകളോളം നീളുന്ന സാഹചര്യമാണുള്ളത്.

പനിബാധിതർ ചുമയും തലവേദനയും തൊണ്ടവേദനയും രുചിയില്ലായ്‌മയും ഓക്കാനവുമായി ബുദ്ധിമുട്ടുകയാണ്. പലർക്കും പനി മാറുന്നുണ്ടെങ്കിലും അനുബന്ധ ലക്ഷണങ്ങൾ നീണ്ടുനിൽക്കുന്നുണ്ട്. താപനിലയിൽ ഉണ്ടായ പെട്ടെന്നുള്ള മാറ്റമാണ് ശരീരത്തിൻ്റെ പ്രതിരോധശേഷിയെ തകരാറിലാക്കുന്നത്.

കഴിഞ്ഞ രണ്ടാഴ്ചയ്ക്കിടെ 10000 ത്തിലധികം പേരാണ് പനി ബാധിതരായി സർക്കാർ ആശുപത്രികളിൽ ഒ.പി കളിൽ ചികിത്സതേടിയെത്തിയത്. സ്വകാര്യ ആശുപത്രിയിൽ ചികിത്സ തേടിയവർ ഇതിന്റെ ഇരട്ടി വരും. ക്ലിനിക്കുകളിലും മറ്റുമായി കണക്കിൽ പെടാതെ എത്തുന്ന പനി ബാധിതരും ഉണ്ട്.

കാലാവസ്ഥ മാറിമറിഞ്ഞ് ചൂടും മഴയുമെല്ലാം ഇടവിട്ടു വന്നതും ആഘോഷകാലത്തെ കൂടിച്ചേരലുകളുമെല്ലാമാണ് പനിയും പകർച്ചവ്യാധികളും വ്യാപിക്കാൻ ഇടയാക്കിയത്. കൂടാതെ കൊതുക് വളരുന്ന സാഹചര്യവും ഉണ്ടായി. കിടക്കുന്ന വെള്ളത്തിൽ കൊതുകുകൾ മുട്ടയിട്ട് വളരുകയാണ്.

ഇടക്ക് പെയ്യുന്ന മഴ പറമ്പിലും മറ്റും കൊതുകുകൾക്ക് വളരാൻ അനുകൂലമായ സാഹചര്യം ഉണ്ടാക്കുന്നു.

ഇൻഫ്ലുവൻസയാണ് കൂടുതൽ പേരിലും കാണുന്ന അസുഖം. ശ്വാസകോശ അണുബാധയ്ക്ക് കാരണമാകുന്നതിനാലാണ് പലർക്കും ചുമയും തൊണ്ടവേദനയുമുൾപ്പെടെയുള്ളവ പനി കഴിഞ്ഞും മാറാതെ നിൽക്കുന്നത്.

ഇതുകൂടാതെ, വൈറൽപ്പനി, ഡെങ്കിപ്പനി, എലിപ്പനി, മലമ്പനി, കോവിഡ് തുടങ്ങിയവയും റിപ്പോർട്ട് ചെയ്യപ്പെടുന്നുണ്ട്. ഇവയിൽ പല രോഗങ്ങൾക്കും സമാനലക്ഷണമായതിനാൽ ഒറ്റയടിക്ക് രോഗം തിരിച്ചറിയാനാകില്ലെന്നതാണ് ആശുപത്രിയിലെത്തുമ്പോഴുള്ള വെല്ലുവിളി. ലാബ് പരിശോധനയിലൂടെ മാത്രമേ രോഗം സ്ഥിരീകരിക്കാനാകുന്നുള്ളൂ.

അസുഖമുള്ളവർ ചികിത്സക്ക് വിധേയമായും ഐസൊലേഷൻ നടത്തിയും റസ്റ്റ് എടുത്തും പൂർണ്ണമായി അസുഖം മാറിയശേഷം സ്കൂളിലും ജോലി സ്ഥലത്തും പോകണം. പകൽ ചൂട് ഗണ്യമായി വർദ്ധിച്ചിട്ടുണ്ട്. രാത്രി താപനിലയിലും മാറ്റം വന്നു.

റോഡുകളിലും മറ്റും പൊടിപടലങ്ങളും രൂക്ഷമായി. പലയിടത്തും റോഡുകൾ തകർന്ന അവസ്ഥയാണ്. ചിലയിടങ്ങളിൽ റോഡ് നിർമ്മാണ പ്രവർത്തനങ്ങൾ നടക്കുന്നു. ഇവിടങ്ങളിൽ നിന്നുണ്ടാകുന്ന പൊടിയും മറ്റും അലർജി ഉൾപ്പെടെയുള്ള അസുഖം ഉള്ളവർക്ക് വിനയാകുന്നുണ്ട്.

ഇത്തരം സാഹചര്യങ്ങൾ മനസ്സിലാക്കി പ്രവർത്തിക്കുകയാണ് രോഗപ്രതിരോധത്തിന് അത്യാവശ്യം.

English Summary: kerala fever spread after sudden climate change