മഴമാറി കേരളത്തിൽ ശക്തമായ തണുപ്പ് തുടങ്ങി, മിനി കോൾഡ് വേവിന് സാധ്യത

മഴ മാറി നില്‍ക്കാന്‍ തുടങ്ങിയതോടെ അതി രാവിലെയുള്ള തണുപ്പാണ് ഇപ്പോൾ തിരിച്ചുവരുന്നത്. അതുകൊണ്ട് തന്നെ സംസ്ഥാനത്ത് വീണ്ടും താപനില കുറഞ്ഞിരിക്കുകയാണ്. സംസ്ഥാനത്തു പൊതുവെ കുറഞ്ഞ താപനില 8 ഡിഗ്രി സെല്‍ഷ്യസിനും 25 ഡിഗ്രി സെല്‍ഷ്യസിനും ഇടയിലാണ്. പകല്‍ ചൂട് 30 നും 35 ഡിഗ്രി സെല്‍ഷ്യസിനും ഇടയിലാണെന്നും കാലാവസ്ഥ വകുപ്പിന്റെ കണക്കുകള്‍ പറയുന്നു.

മൂന്നാറിൽ കഠിനമായ തണുപ്പ്

ഇന്ന് മൂന്നാറില്‍ കനത്ത തണുപ്പ് അനുഭവപ്പെട്ടത്. താപനില വീണ്ടും പത്തില്‍ താഴെ രേഖപ്പെടുത്തി. 9.4 ഡിഗ്രി സെല്‍ഷ്യസ് ആണ് മൂന്നാറില്‍ രേഖപ്പെടുത്തിയ ഏറ്റവും കുറഞ്ഞ താപനില. നേരത്തെ നവംബര്‍ ഏഴിനായിരുന്നു അവസാനമായി പത്തില്‍ താഴെ രേഖപ്പെടുത്തിയത്. മൂന്നാറില്‍ പകല്‍ കൂടിയ ചൂട് 25.8 ഡിഗ്രി സെല്‍ഷ്യസ് ആണെന്നും കാലാവസ്ഥ വകുപ്പ് വ്യക്തമാക്കുന്നു.

ഓരോ സ്ഥലങ്ങളിലും രേഖപ്പെടുത്തിയ താപനില വിവരങ്ങൾ ഇങ്ങനെയാണ്

ഏറ്റവും കുറഞ്ഞ താപനില രേഖപ്പെടുത്തിയത് കുണ്ടലഡാമിൽ 7.5 ഡിഗ്രി സെല്‍ഷ്യസ്.

വട്ടവടയില്‍ രേഖപ്പെടുത്തിയ ഏറ്റവും കുറഞ്ഞ താപനില 9.7 ഡിഗ്രി സെല്‍ഷ്യസ്.

വയനാട് ജില്ലയില്‍ കുറഞ്ഞ താപനില രേഖപ്പെടുത്തിയത് കബനിഗിരി ( 12.9) കരാപ്പുഴ ( 13.5) എന്നിവിടങ്ങളിലാണ്

കണ്ണൂര്‍- പെരിങ്ങോ (16.5)

പത്തനംതിട്ട- കല്ലുങ്കല്‍ (17.6)

പാലക്കാട്- പറമ്പിക്കുളം (17.9)

കാസര്‍കോട്- പടന്നക്കാട് (18.4)

തൃശൂര്‍- ഷോളയാര്‍ (18.6)

തിരുവനന്തപുരം- പൊന്മുടി,
പാലോട് (18.8, 18.9)

കൊല്ലം- പുനലൂര്‍ (19.5)

നിലമ്പൂര്‍ (20)
എന്നിങ്ങനെയാണ് മറ്റു സ്ഥലങ്ങളില്‍ ഇന്ന് രേഖപ്പെടുത്തിയ കുറഞ്ഞ താപനില.

ഉത്തരേന്ത്യയിൽ അതിശൈത്യം

ഡൽഹി ഉൾപ്പെടെയുള്ള ഉത്തരേന്ത്യൻ സംസ്ഥാനങ്ങളിൽ അതിശൈത്യമാണ്. ഇന്ന് ഡൽഹിയിലെ വായു ഗുണനിലവാരത്തിൽ നേരിയ പുരോഗതി രേഖപ്പെടുത്തി. 'വളരെ മോശം' എന്ന വിഭാഗത്തിൽ നിന്ന് 'മോശം' എന്ന നിലയിലേക്ക് വായു ഗുണനിലവാരം എത്തി. മൂടൽമഞ്ഞും തണുപ്പും നിറഞ്ഞ അന്തരീക്ഷമായിരുന്നു രാവിലെ ഡൽഹിയിൽ അനുഭവപ്പെട്ടത്. വരും ദിവസങ്ങളിൽ ഉത്തരേന്ത്യയിലും മധ്യേന്ത്യയിലും ശൈത്യം കൂടുതൽ കടുക്കുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി.

അതേ സമയം കർണാടകയിലെ വിവിധ ജില്ലകളിൽ താപനില ഗണ്യമായി കുറയുമെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. തീരദേശ ജില്ലകളിൽ നേരിയതോ മിതമായതോ ആയ മഴ ലഭിക്കുമെന്നും ഉൾപ്രദേശങ്ങളിൽ രാത്രികളിൽ ഉയര്‍ന്ന തണുപ്പിന് സാധ്യതയുണ്ടെന്നും അറിയിച്ചിട്ടുണ്ട്. ബെലഗവി, ബിദാർ, വിജയപുര, ബെംഗളൂരു അർബൻ, ബെംഗളൂരു റൂറൽ, മാണ്ഡ്യ, മൈസൂരു, ചിക്കമംഗളൂരു, ശിവമോഗ തുടങ്ങിയ ജില്ലകളിൽ താപനിലയിൽ ഗണ്യമായ കുറവ് പ്രതീക്ഷിക്കുന്നു. ഈ പ്രദേശങ്ങളിൽ രാത്രികാലങ്ങളിൽ താപനില ഗണ്യമായി കുറയാൻ സാധ്യതയുണ്ട്. ബെംഗളൂരുവിൽ പകൽ സമയത്തെ ഉയർന്ന താപനില ഏകദേശം 28°C ആയിരിക്കും. ഏറ്റവും കുറഞ്ഞ താപനില 17°C ആയിരിക്കും. മൂടൽമഞ്ഞും തണുത്ത കാറ്റും കാരണം പുലർച്ചെ യാത്ര ചെയ്യുന്നവർക്ക് പ്രയാസം അനുഭവപ്പെട്ടേക്കാം.

മഴയ്ക്കും ഇടിമിന്നലിനും സാധ്യത

അയൽ സംസ്ഥാനങ്ങളായ മഹാരാഷ്ട്ര, തമിഴ്നാട്, തെലങ്കാന എന്നിവിടങ്ങളിലും അടുത്ത ദിവസങ്ങളിൽ സമാനമായ തണുപ്പ് അനുഭവപ്പെടാൻ സാധ്യതയുണ്ട്. കർണാടകത്തിൽ ഡിസംബർ 13 വരെ മഴയ്ക്കും ഇടിമിന്നലിനും സാധ്യതയുണ്ട്.

ഡിറ്റ്‌വ ചക്രവാതത്തിന്റെ സ്വാധീനത്തിൽ തമിഴ്നാട്ടിൽ ശക്തമായ മഴ തുടരുകയാണ്. ബെംഗളൂരു ഉൾപ്പെടെ രാജ്യത്തിന്റെ പല ഭാഗങ്ങളിലും ഡിസംബർ മാസത്തിൽ മഴ പ്രതീക്ഷിക്കുന്നു.

മിനി കോൾഡ് വേവിന് സാധ്യത

തമിഴ്‌നാട്ടിൽ അപ്രതീക്ഷിതമായ തോതിലുള്ള തണുപ്പാണ് അനുഭവപ്പെട്ടു പോന്നിരുന്നത്. ഇപ്പോൾ കാലാവസ്ഥാ പ്രവചനങ്ങൾ പറയുന്നത് താപനില ഗണ്യമായി കുറയുമെന്നാണ്. അതെസമയം ഡിസംബർ 12 മുതൽ വടക്കൻ, മധ്യ തമിഴ്‌നാട്ടിൽ 'മിനി കോൾഡ് വേവ്' ഉണ്ടാകുമെന്നും പ്രവചനമുണ്ട്.

English Summary : Discover Bengaluru's daytime temperatures averaging 28°C and lows of 17°C. Be prepared for fog and chilly winds affecting early morning travel.