എയിംസ് 2.0 പോർട്ടലിലേക്ക് സംസ്ഥാന വിള ഇൻഷുറൻസ് സേവനങ്ങൾ മാറി

സംസ്ഥാനത്തെ കാർഷിക സേവനങ്ങൾ കൂടുതൽ സുതാര്യവും കാര്യക്ഷമവുമായി നടത്തുന്നതിനായി സംസ്ഥാന വിള ഇൻഷുറൻസ് സേവനങ്ങൾ നവീകരിച്ച എയിംസ് 2.0 പോർട്ടലിലേക്ക് (aimsnew.kerala.gov.in) മാറ്റി. 2026 മാർച്ച് 15 മുതൽ പുതിയ പോർട്ടൽ വഴിയാണ് എല്ലാ പുതിയ ഇൻഷുറൻസ് അപേക്ഷകളും സ്വീകരിക്കുക.

പ്രകൃതിക്ഷോഭം മൂലമുള്ള വിളനാശ ധനസഹായത്തിനുള്ള Natural Calamity Service ഇതിനകം തന്നെ 2025 ജൂലൈ 15 മുതൽ പുതിയ പോർട്ടലിലേക്ക് മാറ്റിയിരുന്നു.

പ്രധാന മാറ്റങ്ങൾ

1. നോമിനി വിവരങ്ങൾ നിർബന്ധം

ഇനിമുതൽ ഇൻഷുറൻസ് അപേക്ഷ നൽകുന്നതിന് മുമ്പ് കർഷകർ നോമിനിയുടെ പേര്, ബന്ധം, ഐഡി രേഖകൾ എന്നിവ പോർട്ടലിൽ രേഖപ്പെടുത്തണം. ഇത് ഒരുതവണ മാത്രം ചെയ്യേണ്ട നടപടിയാണ്.

നോമിനി രജിസ്ട്രേഷൻ : https://keralaagriculture.gov.in/wp-content/uploads/2026/03/Nominee-Registration.pdf

2. കൃഷി ഓഫീസറുടെ അംഗീകാരം ആവശ്യമാണ്

കർഷകർ നൽകുന്ന നോമിനി വിവരങ്ങൾ അതാത് കൃഷി ഓഫീസർമാർ (AO) ഓൺലൈനായി പരിശോധിച്ച് അംഗീകരിച്ചാൽ മാത്രമേ ഇൻഷുറൻസ് അപേക്ഷാ നടപടികൾ പൂർത്തിയാക്കാൻ സാധിക്കൂ.

3. അപേക്ഷ സമർപ്പിക്കൽ ക്രമം

2026 മാർച്ച് 14 വരെ എയിംസ് 1.0 പോർട്ടലിൽ സമർപ്പിച്ച എല്ലാ ഇൻഷുറൻസ് അപേക്ഷകളും അതേ പോർട്ടലിൽ തന്നെ പരിശോധന നടത്തി തീർക്കും.

എയിംസ് 1.0 വഴി ഇതിനകം പോളിസി എടുത്തിട്ടുള്ള കർഷകർക്ക് മാർച്ച് 15 ന് ശേഷം സംഭവിക്കുന്ന വിളനാശങ്ങൾക്ക് നഷ്ടപരിഹാര അപേക്ഷകൾ എയിംസ് 2.0 പോർട്ടൽ വഴി സമർപ്പിക്കാം.

മാറ്റമില്ലാത്ത കാര്യങ്ങൾ

ഇൻഷുറൻസ് പ്രീമിയം നിരക്കുകൾ, അപേക്ഷ സമർപ്പിക്കേണ്ട സമയപരിധി തുടങ്ങിയവയിൽ എയിംസ് 1.0 ൽ ഉണ്ടായിരുന്ന അതേ മാനദണ്ഡങ്ങൾ തന്നെ തുടരും.

ഇൻഷുറൻസ് പരിരക്ഷ തടസ്സമില്ലാതെ ലഭിക്കുന്നതിനായി എല്ലാ കർഷകരും പുതിയ പോർട്ടലിൽ ലോഗിൻ ചെയ്ത് നോമിനി വിവരങ്ങൾ അപ്‌ഡേറ്റ് ചെയ്യണമെന്ന് അധികൃതർ അഭ്യർത്ഥിച്ചു.

കൂടുതൽ വിവരങ്ങൾക്ക് സമീപത്തെ കൃഷിഭവനുമായി ബന്ധപ്പെടാം.

English Summary : The Kerala Agricultural Department has officially transitioned its State Crop Insurance services to the upgraded AIMS 2.0 portal (aimsnew.kerala.gov.in) effective from March 15, 2026. This move follows the successful migration of Natural Calamity Service (disaster relief) to the platform earlier in 2025.