കേരള തീരങ്ങളിൽ കള്ളക്കടൽ ജാഗ്രത; കടലാക്രമണ സാധ്യത

കള്ളക്കടൽ പ്രതിഭാസത്തിന്റെ ഭാഗമായി കേരളത്തിലെ വിവിധ തീരപ്രദേശങ്ങളിൽ കടലാക്രമണ സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രമായ INCOIS മുന്നറിയിപ്പ് നൽകി. തിരുവനന്തപുരം, കൊല്ലം, ആലപ്പുഴ, കണ്ണൂർ-കാസർഗോഡ് ജില്ലകളിലെ തീരങ്ങളിൽ ഇന്ന് (മെയ് 26) മുതൽ നാളെ രാത്രി 11.30 വരെ 0.9 മുതൽ 1.4 മീറ്റർ വരെ ഉയരമുള്ള തിരമാലകൾക്ക് സാധ്യതയുണ്ടെന്നാണ് അറിയിപ്പ്.അതേസമയം കന്യാകുമാരി തീരത്ത് നാളെ ഉച്ചയ്ക്ക് 2.30 വരെ 1.3 മുതൽ 1.8 മീറ്റർ വരെ ഉയരമുള്ള തിരമാലകളും കടലാക്രമണ സാധ്യതയും നിലനിൽക്കും.

മത്സ്യത്തൊഴിലാളികളും തീരദേശവാസികളും അതീവ ജാഗ്രത പാലിക്കണമെന്ന് അധികൃതർ നിർദേശിച്ചു. ചെറിയ വള്ളങ്ങളും ബോട്ടുകളും കടലിലിറക്കരുതെന്നും ബീച്ചുകളിലെ വിനോദപ്രവർത്തനങ്ങൾ ഒഴിവാക്കണമെന്നും മുന്നറിയിപ്പിൽ പറയുന്നു. മത്സ്യബന്ധന യാനങ്ങൾ ഹാർബറുകളിൽ സുരക്ഷിതമായി കെട്ടിയിടാനും തീരശോഷണ സാധ്യത കണക്കിലെടുത്ത് അപകട മേഖലകളിൽ നിന്ന് മാറി താമസിക്കാനും നിർദേശം നൽകിയിട്ടുണ്ട്.

English Summary : The Indian National Centre for Ocean Information Services (INCOIS) has issued an urgent warning for severe "Kallakkadal" (sudden swell waves) and potential sea surges along the Kerala coast. High waves ranging from 0.9 to 1.4 meters are expected to hit key coastal districts, including Thiruvananthapuram, Kollam, Alappuzha, Kannur, and Kasaragod, from today (May 26) until tomorrow night.