ആൽമരത്തിൽ ചക്ക കായ്ച്ചു, കണ്ണിലുടക്കി അദ്ഭുത കാഴ്ച

ഈ 2025 ൻ്റെ അവസാസത്തിൽ ആൽമരത്തിൽ ചക്ക കായ്ച്ചുവെന്ന വാർത്ത അദ്ഭുതത്തോടെയാണ് പലരും കേട്ടത്. സംഭവം സത്യമാണോ എന്നറിയാൻ ചിലർ കോതമംഗലത്തേക്ക് വണ്ടി കയറിയിട്ടുണ്ട് എന്നാണ് കേട്ടത്. ആൽമരവും പ്ലാവും ചേർന്ന് സൃഷ്ടിച്ച പ്രകൃതിയുടെ കൗതുക കാഴ്ച ഒരുക്കിയിരിക്കുകയാണ് വടാട്ടുപാറ മീരാൻ സിറ്റിയിൽ. ആൽമരത്തിന്‍റെ മധ്യഭാഗത്തായി ചക്ക കായ്ച്ചു കിടക്കുന്ന കാഴ്ചയാണ് കാണാൻ ഇവിടെ വന്നാൽ കാണാൻ കഴിയുക.

നാട്ടുകാർ പറയുന്നത് ഇങ്ങനെ

മീരാൻസിറ്റിയിൽ വഴിയോരത്ത് തറ കെട്ടി സംരക്ഷിച്ചിരിക്കുന്ന, വളർന്ന് പന്തലിച്ച് ആൽമരത്തിലാണ് ചക്കകൾ വിരിഞ്ഞു തുടങ്ങിയത്. 50 വർഷങ്ങൾക്ക് മുമ്പ് ഇവിടെ ആലും, മാവും, പ്ലാവും നട്ടിരുന്നുവെന്നും മാവ് ഉണങ്ങിപ്പോയെന്നും, ആൽമരത്തിന്റെ വേരുകളും തണ്ടും വളർന്ന് പ്ലാവിനെ പൂർണ്ണമായി മറച്ചിരിക്കുകയാണെന്നുമാണ് നാട്ടുകാർ പറയുന്നത്. പക്ഷേ ഇപ്പോൾ എവിടെ നിന്ന് നോക്കിയാലും കൂറ്റൻ ആൽമരത്തിൽ ചക്ക വിരിഞ്ഞു നിൽക്കുന്നതാണ് കാണാനാകുക. ഈ അദ്ഭുത കാഴ്ച കാണാൻ നിരവധിയാളുകളാണ് ഇവിടേക്കെത്തുന്നത്.

English Summary : Discover the enchanting beauty of Vadatupara Meera City, where nature's wonders blend with the allure of the mysterious. Visit to experience the magic