തുലാവർഷമെത്തുന്നു; കാലവർഷം വിടവാങ്ങലിനും തുലാവർഷമെത്തുന്നതിലും എന്തൊക്കെ മാനദണ്ഡങ്ങൾ?

കേരളം നിർണായകമായൊരു ഘട്ടത്തിലേക്ക് കടക്കുകയാണ്. തെക്കുപടിഞ്ഞാറൻ കാലവർഷം (Southwest Monsoon) വിടവാങ്ങുകയും വടക്കുകിഴക്കൻ കാലവർഷമായ തുലാവർഷം (Northeast Monsoon) സജീവമാകുകയും ചെയ്യുന്ന സമയമാണിത്. എന്നാൽ കലണ്ടറിൽ മാസങ്ങൾ മാറുന്നതുകൊണ്ടുമാത്രം കാലവർഷം അവസാനിക്കുകയോ തുലാവർഷം ആരംഭിക്കുകയോ ചെയ്യില്ല. ഇതിനായി ഇന്ത്യയുടെ കാലാവസ്ഥാ വകുപ്പ് (IMD) നിശ്ചയിച്ചിട്ടുള്ള പ്രത്യേക മാനദണ്ഡങ്ങളുണ്ട്.

Kerala Monsoon : കാലവർഷം വിടവാങ്ങുന്നു; അടുത്ത 2–3 ദിവസത്തിനുള്ളിൽ തുലാവർഷം എത്തിയേക്കും, കേരളത്തിലും പ്രതീക്ഷ
തെക്കുപടിഞ്ഞാറൻ കാലവർഷത്തിന്റെ പിന്മാറ്റം രാജ്യത്ത് പുരോഗമിക്കുകയാണ്.
https://metbeatnews.com/southwest-monsoon-retreats-as-imd-predicts-northeast-monsoon-arrival-in-2-3-days

കേരളത്തിൽ കാലവർഷത്തിന്റെ ഔദ്യോഗിക വിടവാങ്ങൽ പ്രഖ്യാപനം എപ്പോൾ ഉണ്ടാകും? തുലാവർഷത്തിന്റെ തുടക്കം എങ്ങനെ സ്ഥിരീകരിക്കും? രണ്ട് കാലവർഷങ്ങളുടെയും മാനദണ്ഡങ്ങൾ എന്തൊക്കെയാണ് എന്നൊക്കെ നോക്കാം

കാലവർഷത്തിന്റെ വിടവാങ്ങൽ: മൂന്ന് പ്രധാന മാനദണ്ഡങ്ങൾ

ഇന്ത്യൻ കാലാവസ്ഥാ വകുപ്പിന്റെ (IMD) ഔദ്യോഗിക മാനദണ്ഡങ്ങൾ പ്രകാരം കാലവർഷത്തിന്റെ വിടവാങ്ങൽ തീരുമാനിക്കുന്നത് മഴയുടെ കുറവ് മാത്രം കണക്കിലെടുത്തല്ല. അന്തരീക്ഷത്തിലെ കാറ്റിന്റെ ദിശ, ഈർപ്പത്തിന്റെ അളവ്, മഴയുടെ തുടർച്ചയായ അഭാവം എന്നിവയും പരിശോധിക്കും.

1 . തുടർച്ചയായ അഞ്ച് ദിവസം മഴയില്ലാതിരിക്കുക: കാലവർഷം പിൻവാങ്ങുന്ന മേഖലയിലെ മഴ സജീവത തുടർച്ചയായി അഞ്ച് ദിവസം നിലയ്ക്കണം.

2. ഉപരിതല അന്തരീക്ഷത്തിലെ ഉയർന്ന മർദ മേഖല: 850 ഹെക്ടോപാസ്കൽ (hPa) വരെയുള്ള താഴ്ന്ന അന്തരീക്ഷതലങ്ങളിൽ ആന്റിസൈക്ലോൺ (Anticyclone) രൂപപ്പെടണം.

3. അന്തരീക്ഷ ഈർപ്പം കുറയുക: ഉപഗ്രഹങ്ങളിൽ നിന്നുള്ള ജലബാഷ്പ ചിത്രങ്ങളും അന്തരീക്ഷ നിരീക്ഷണങ്ങളും വഴി ഈർപ്പത്തിന്റെ അളവിൽ ഗണ്യമായ കുറവ് സ്ഥിരീകരിക്കണം.

വടക്കുപടിഞ്ഞാറൻ ഇന്ത്യയിൽ നിന്നാണ് സാധാരണയായി കാലവർഷത്തിന്റെ പിൻവാങ്ങൽ ആരംഭിക്കുന്നത്. തുടർന്ന് മേഖലകളുടെ തുടർച്ച, വരണ്ട കാലാവസ്ഥ, ഈർപ്പത്തിലെ കുറവ് എന്നിവ വിലയിരുത്തിയാണ് പിൻവാങ്ങൽ പ്രഖ്യാപനം മുന്നോട്ടുകൊണ്ടുപോകുന്നത്. ദക്ഷിണേന്ത്യയിൽനിന്നും രാജ്യത്തുനിന്നാകെയും കാലവർഷം പിൻവാങ്ങുന്നതിന് ഒക്ടോബർ ഒന്നിനുശേഷമുള്ള കാറ്റിന്റെ ദിശാമാറ്റവും നിർണായകമാണ്.

തുലാവർഷത്തിന്റെ തുടക്കം എങ്ങനെ തിരിച്ചറിയും?

തുലാവർഷം (Northeast Monsoon) ആരംഭിക്കുന്നതിന്റെ പ്രധാന സൂചന തെക്കുപടിഞ്ഞാറൻ കാറ്റിന് പകരം കിഴക്കൻ, വടക്കുകിഴക്കൻ കാറ്റുകൾ സ്ഥാപിതമാകുന്നതാണ്. ദക്ഷിണേന്ത്യയിലെ കാലാവസ്ഥാ സംവിധാനങ്ങളിൽ ഈ മാറ്റം വ്യക്തമായി പ്രകടമാകുകയും തെക്കുകിഴക്കൻ ഉപദ്വീപിൽ തുലാവർഷ മഴ സജീവമാകാൻ അനുകൂല സാഹചര്യം രൂപപ്പെടുകയും വേണം.

1 കാറ്റിന്റെ ദിശാമാറ്റം: കിഴക്കൻ, വടക്കുകിഴക്കൻ കാറ്റുകൾ ദക്ഷിണേന്ത്യയിൽ സ്ഥാപിതമാകണം.

2 കാലവർഷത്തിന്റെ പിൻവാങ്ങൽ: തെക്കുപടിഞ്ഞാറൻ കാലവർഷം പിൻവാങ്ങുന്ന ഘട്ടം വിലയിരുത്തണം.

3 മഴയുടെ സ്വഭാവം: തെക്കുകിഴക്കൻ ഉപദ്വീപിൽ തുലാവർഷവുമായി ബന്ധപ്പെട്ട മഴ സജീവമാകുന്നതിന്റെ സൂചനകൾ പരിശോധിക്കണം.

ഒക്ടോബർ മുതൽ ഡിസംബർ വരെയാണ് തുലാവർഷത്തിന്റെ പ്രധാന കാലയളവ്. തമിഴ്നാട്, പുതുച്ചേരി, കേരളം ഉൾപ്പെടെയുള്ള ദക്ഷിണേന്ത്യൻ മേഖലകളിൽ ഈ കാലയളവിലെ മഴ കാർഷിക മേഖലയ്ക്കും ജലലഭ്യതയ്ക്കും പ്രധാനമാണ്. എന്നാൽ തുലാവർഷത്തിന്റെ ഔദ്യോഗിക തുടക്കം സ്ഥിരീകരിക്കാൻ കാലാവസ്ഥാ വകുപ്പിന്റെ നിരീക്ഷണവും പ്രഖ്യാപനവും ആവശ്യമാണ്.

കേരളത്തിൽ ശ്രദ്ധിക്കേണ്ടത്

കലണ്ടറിൽ ഒക്ടോബർ എത്തിയെന്നതുകൊണ്ടോ കേരളത്തിൽ ഇടിമിന്നലോടെയുള്ള മഴ ലഭിക്കുന്നതുകൊണ്ടോ കാലവർഷം ഔദ്യോഗികമായി വിടവാങ്ങിയെന്ന് ഉറപ്പിക്കാനാവില്ല. അതുപോലെ, കിഴക്കൻ കാറ്റ് വീശിത്തുടങ്ങുന്നതുകൊണ്ടുമാത്രം തുലാവർഷം ആരംഭിച്ചതായും പ്രഖ്യാപിക്കാനാവില്ല.

English Summary : Kerala is on the brink of a major seasonal transition as the Southwest Monsoon withdraws and the Northeast Monsoon (Thulavarsham) sets in.