ആ വീണ്ടും ആക്രമണം: ഇറാനും യു.എസും ആയുധമെടുക്കുന്നു, ബഹ്‌റൈനില്‍ ആക്രമണം

ഇറാനും യു.എസും തമ്മിലുള്ള യുദ്ധം പൂര്‍ണമായി അവസാനിപ്പിക്കാന്‍ ഇരു രാജ്യങ്ങളും തമ്മില്‍ ധാരണാപത്രം ഒപ്പുവയ്ക്കുകയും അന്തിമ കരാറിനുള്ള ചര്‍ച്ചകളും നടക്കുന്നതിനിടെ വീണ്ടും പശ്ചിമേഷ്യയില്‍ യുദ്ധഭീതി. വ്യാഴാഴ്ച ഹോര്‍മുസ് കടലിടുക്കില്‍ വാണിജ്യ കപ്പലിനു നേരെ ഇറാന്‍ ആക്രമണം നടത്തിയെന്നാരോപിച്ച് യു.എസ് ഇന്ന് ഇറാനില്‍ ആക്രമണം നടത്തി.

ആക്രമണത്തിന് തിരിച്ചടി നല്‍കുമെന്ന് ഇറാന്‍ അറിയിച്ചിരുന്നു. ഇതിനു പിന്നാലെ ബഹ്‌റൈനിലെ യു.എസ് കേന്ദ്രങ്ങളില്‍ ഡ്രോണ്‍ ആക്രമണം നടത്തിയതായി ഇറാന്‍ റവല്യൂഷണറി ഗാര്‍ഡ് വ്യക്തമാക്കി. ബഹ്‌റൈനില്‍ ഇറാന്‍ നടത്തിയ ആക്രമണത്തെ വിവിധ അറബ് രാജ്യങ്ങള്‍ അപലപിച്ചു.

സൗദി അറേബ്യ, യു.എ.ഇ, കുവൈത്ത്, ഖത്തര്‍, ജോര്‍ദാന്‍, സിറിയ എന്നീ അറബ് രാജ്യങ്ങളും ഗള്‍ഫ് സഹകരണ കൗണ്‍സിലും (GCC) ആണ് ആക്രമണത്തെ അപലപിച്ചത്.

ഇറാനിൽ us നടത്തിയ ആക്രമണത്തിൻ്റെ ദൃശ്യം Photo : US Central Command

ഈ ആക്രമണം ബഹ്‌റൈന്റെ പരമാധികാരത്തിന്മേലുള്ള കടന്നുകയറ്റമാണെന്നും മേഖലയില്‍ സമാധാനം പുനഃസ്ഥാപിക്കാനുള്ള ശ്രമങ്ങള്‍ക്ക് കനത്ത തിരിച്ചടിയാണെന്നും ശനിയാഴ്ച പുറത്തിറക്കിയ പ്രത്യേക പ്രസ്താവനകളില്‍ വിവിധ വിദേശകാര്യ മന്ത്രാലയങ്ങള്‍ ചൂണ്ടിക്കാട്ടിയിരുന്നു.

ജൂണ്‍ 18ന് അമേരിക്കയും ഇറാനും തമ്മില്‍ ഒപ്പുവെച്ച ധാരണാപത്രത്തിന് ശേഷം ഇതാദ്യമായാണ് ബഹ്‌റൈന് നേരെ ഇറാന്റെ ഭാഗത്തുനിന്ന് ഇത്തരമൊരു ആക്രമണമുണ്ടാകുന്നത്. തങ്ങള്‍ക്ക് നേരെയുണ്ടായ യു.എസ് ആക്രമണത്തിന് മറുപടിയായി മേഖലയിലെ യു.എസ് താവളങ്ങളെയാണ് ലക്ഷ്യമിട്ടതെന്ന് ശനിയാഴ്ച പുലര്‍ച്ചെ ഇറാന്റെ ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സ് (IRGC) അറിയിച്ചു.

വിവിധ രാജ്യങ്ങളുടെയും സംഘടനകളുടെയും പ്രതികരണങ്ങള്‍

സൗദി അറേബ്യ

അന്താരാഷ്ട്ര നിയമങ്ങളുടെയും യു.എന്‍ ചാര്‍ട്ടറിന്റെയും നഗ്‌നമായ ലംഘനമാണിതെന്ന് സൗദി വിദേശകാര്യ മന്ത്രാലയം കുറ്റപ്പെടുത്തി. മേഖലയുടെ സുരക്ഷ ഉറപ്പാക്കാനുള്ള അന്താരാഷ്ട്ര ശ്രമങ്ങളെ അട്ടിമറിക്കുന്നതാണ് ഇറാന്റെ നീക്കമെന്നും ബഹ്‌റൈന് പൂര്‍ണ്ണ പിന്തുണ പ്രഖ്യാപിക്കുന്നതായും സൗദി അറിയിച്ചു.

യു.എ.ഇ

ഇറാന്റെ ഭാഗത്തുനിന്നുണ്ടായത് ആക്രമണാത്മകമായ നീക്കമാണെന്നും ഇത് ബഹ്‌റൈന്റെ സ്ഥിരതയ്ക്ക് ഭീഷണിയാണെന്നും യു.എ.ഇ വ്യക്തമാക്കി. സ്വന്തം സുരക്ഷ ഉറപ്പാക്കാന്‍ ബഹ്‌റൈന്‍ സ്വീകരിക്കുന്ന എല്ലാ നടപടികള്‍ക്കും യു.എ.ഇ പിന്തുണ നല്‍കും.

കുവൈത്ത്

ഇതിനെ ഒരു 'ക്രിമിനല്‍ ആക്രമണം' എന്ന് വിശേഷിപ്പിച്ച കുവൈത്ത്, സമാധാന ചര്‍ച്ചകള്‍ പുരോഗമിക്കുന്നതിനിടയിലെ ഇത്തരം നീക്കങ്ങള്‍ അന്താരാഷ്ട്ര സുരക്ഷയെ അപകടത്തിലാക്കുമെന്ന് മുന്നറിയിപ്പ് നല്‍കി.

ജോര്‍ദാന്‍

ഇറാന്റെ ക്രൂരമായ ആക്രമണം വന്‍ പ്രത്യാഘാതങ്ങള്‍ ഉണ്ടാക്കുന്ന ഒന്നാണെന്നും അന്താരാഷ്ട്ര നിയമങ്ങളുടെ ലംഘനമാണെന്നും ജോര്‍ദാന്‍ വിദേശകാര്യ മന്ത്രാലയം വ്യക്തമാക്കി.

ഖത്തര്‍

ചര്‍ച്ചകളിലൂടെയും നയതന്ത്രത്തിലൂടെയും പ്രശ്‌നങ്ങള്‍ പരിഹരിക്കണമെന്നും യു.എസ്ഇറാന്‍ ധാരണാപത്രത്തിന്റെ പുരോഗതി നിലനിര്‍ത്തണമെന്നും ഖത്തര്‍ ആവശ്യപ്പെട്ടു. ബഹ്‌റൈന്റെ സുരക്ഷയ്‌ക്കൊപ്പം നില്‍ക്കുമെന്നും ഖത്തര്‍ കൂട്ടിച്ചേര്‍ത്തു.

സിറിയ

ബഹ്‌റൈന്റെ പരമാധികാരത്തിന്മേലുള്ള കടന്നുകയറ്റത്തെ കടുത്ത ഭാഷയിലാണ് സിറിയന്‍ വിദേശകാര്യ മന്ത്രാലയവും അപലപിച്ചത്.

ജി.സി.സി (GCC)

പ്രതിസന്ധികള്‍ പരിഹരിക്കാനും മേഖലയില്‍ സ്ഥിരത കൈവരിക്കാനുമുള്ള ശ്രമങ്ങളെ തകര്‍ക്കാനാണ് ടെഹ്‌റാന്‍ ശ്രമിക്കുന്നതെന്ന് ജി.സി.സി ജനറല്‍ സെക്രട്ടറി ജാസെം മുഹമ്മദ് അല്‍ബുദൈവി പറഞ്ഞു.

ഹോര്‍മുസ് വഴി കടന്നു പോകുന്ന കപ്പലുകള്‍ മുന്‍കൂര്‍ അനുമതി വാങ്ങണമെന്ന് ഇറാന്‍ ആവശ്യപ്പെട്ടിരുന്നു. ഇതു ലംഘിച്ചതിനാണ് ആക്രമണമെന്നാണ് സൂചന.

ഇന്നലെ ഇറാനിലെ തീരദേശത്തെ മിസൈല്‍, ഡ്രോണ്‍ കേന്ദ്രങ്ങളില്‍ ആക്രമണം നടന്നുവെന്ന് യു.എസ് സെന്‍ട്രല്‍ കമാന്‍ഡ് അറിയിച്ചു. ആക്രമണത്തിന്റെ വിഡിയോയും പുറത്തുവിട്ടിരുന്നു. എന്നാല്‍ ഇറാന്റെ കമ്മ്യൂണിക്കേഷന്‍ ടവറാണ് അമേരിക്ക ആക്രമിച്ചതെന്ന് പിന്നീട് പുറത്തു വന്ന വാര്‍ത്തകളില്‍ പറയുന്നു.

English Summary : Escalation in the Middle East: Iran and U.S. Resume Hostilities; Drone Strikes Hit Bahrain. Despite recent efforts to end conflicts through a Memorandum of Understanding (MoU) signed on June 18, tensions have flared up again in the Middle East between Iran and the United States.