മസ്‌കത്തിൽ താപനില കുറയുന്നു; ഡിസംബർ ആദ്യത്തോടെ 26 ഡിഗ്രിയിലെത്തും

ഒമാൻ തലസ്ഥാനമായ മസ്‌കത്തിൽ വരും ദിവസങ്ങളിൽ താപനില ക്രമേണ കുറയുമെന്ന് സിവിൽ ഏവിയേഷൻ അതോറിറ്റിയുടെ കാലാവസ്ഥാ റിപ്പോർട്ട്. തീരപ്രദേശങ്ങളിൽ ചൂട് കുറഞ്ഞതോടെ തണുത്ത കാറ്റും അനുഭവപ്പെടുന്നുണ്ട്. കഴിഞ്ഞ ദിവസം 31 ഡിഗ്രി സെൽഷ്യസായിരുന്ന ഉയർന്ന താപനില ഇന്നലെ 29 ഡിഗ്രിയായി കുറഞ്ഞു. രാത്രിയിലെ കുറഞ്ഞ താപനില 26 ഡിഗ്രിയായി തുടരുകയാണ്.

അടുത്ത ദിവസങ്ങളിലും പകൽ താപനില 29 ഡിഗ്രിയിൽ തുടരുമെന്നാണ് പ്രവചനം. അതേസമയം, രാത്രിയിലെ താപനില 25, 24 ഡിഗ്രികളിലേക്ക് ക്രമേണ താഴും. നവംബർ 16 ഓടെ പകൽ താപനില 28 ഡിഗ്രിയിലെത്താനും സാധ്യതയുണ്ട്. നവംബർ അവസാനത്തോടെ താപനിലയിൽ വീണ്ടും കുറവുണ്ടാകുമെന്നാണ് വിലയിരുത്തൽ.

വരും ദിവസങ്ങളിൽ മഴയ്ക്ക് സാധ്യതയില്ല

ഡിസംബർ ആദ്യത്തോടെ പകൽ സമയത്തെ ഉയർന്ന താപനില 26 ഡിഗ്രിയായും രാത്രിയിലെ കുറഞ്ഞ താപനില 18 ഡിഗ്രിയായും താഴുമെന്നാണ് പ്രവചനം. അതേസമയം, വരും ദിവസങ്ങളിൽ മഴയ്ക്ക് സാധ്യതയില്ല. വരണ്ട കാലാവസ്ഥയ്ക്കൊപ്പം മിതമായ കാറ്റും വിവിധ തോതിലുള്ള മേഘാവൃതവുമായിരിക്കും മസ്‌കത്തിൽ അനുഭവപ്പെടുകയെന്നും സിവിൽ ഏവിയേഷൻ അതോറിറ്റി അറിയിച്ചു.

English Summary : Temperatures in Muscat are gradually dropping as cooler weather sets in across Oman, according to the Civil Aviation Authority (CAA). Daytime highs have dipped to 29°C with refreshing coastal breezes, and are forecast to reach 28°C by November 16 before cooling further to 26°C—with nighttime lows of 18°C—by early December.