സൗദിയിലേക്കുള്ള സർവീസുകൾ വീണ്ടും റദ്ദാക്കി ഇൻഡിഗോ

സുരക്ഷാ സാഹചര്യങ്ങൾ മുൻ നിർത്തി സൗദി അറേബ്യയിലേക്കുള്ള വിമാന സർവീസുകൾ റദ്ദാക്കുന്നത് വീണ്ടും നീട്ടിയിരിക്കുകയാണ് ഇൻഡിഗോ എയർലൈൻസ്. ജിദ്ദ, മദീന എന്നിവിടങ്ങളിലേക്കുള്ള സർവീസുകൾ നവംബർ 21 വരെയും റിയാദ്, ദമ്മാം സർവീസുകൾ നവംബർ 30 വരെയുമാണ് റദ്ദാക്കിയത്. യാത്രക്കാരുടെയും ജീവനക്കാരുടെയും സുരക്ഷ മുൻനിർത്തിയാണ് തീരുമാനമെന്ന് വിമാനക്കമ്പനി അറിയിച്ചു.

ടിക്കറ്റ് തുക തിരികെ നൽകും

സർവീസുകൾ റദ്ദാക്കിയതിനെത്തുടർന്ന് യാത്ര മുടങ്ങിയവർക്ക് ടിക്കറ്റ് തുക തിരികെ നൽകുന്നതിനും യാത്രാ തീയതി മാറ്റുന്നതിനും മറ്റ് യാത്രാ ക്രമീകരണങ്ങൾ ഒരുക്കുന്നതിനുമുള്ള നടപടികൾ പുരോഗമിക്കുകയാണ്. ബുക്കിങ് സമയത്ത് നൽകിയ കോൺടാക്ട് നമ്പറുകൾ വഴി ബാധിതരായ യാത്രക്കാർക്ക് വിവരങ്ങൾ കൈമാറുന്നുണ്ടെന്നും ആവശ്യമായ സഹായങ്ങൾ നൽകുമെന്നും ഇൻഡിഗോ വ്യക്തമാക്കി. മേഖലയിലെ സാഹചര്യം സൂക്ഷ്മമായി നിരീക്ഷിച്ചുവരികയാണെന്നും കമ്പനി അറിയിച്ചു.

സൗദി അറേബ്യയിലെ എണ്ണ പ്ലാന്റുകൾക്കും റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിനും നേരെ മിസൈൽ, ഡ്രോൺ ആക്രമണങ്ങൾ നടത്തിയതായി ഹൂതി വക്താവ് യഹ്യ സരി അവകാശപ്പെട്ടിരുന്നു. യമനിലെ ആക്രമണങ്ങൾക്ക് തിരിച്ചടിയായാണ് നടപടിയെന്നും അദ്ദേഹം വ്യക്തമാക്കിയിരുന്നു.

റിയാദിലെ കിങ് ഖാലിദ് അന്താരാഷ്ട്ര വിമാനത്താവളം, എണ്ണ സംഭരണ ടാങ്കുകൾ, അരാംകോയുടെ ഡിസിലേഷൻ ടവർ എന്നിവയായിരുന്നു ആദ്യ ആക്രമണത്തിന്റെ ലക്ഷ്യങ്ങളെന്നാണ് ഹൂതികളുടെ അവകാശവാദം.
നജ്‌റാനിലെ നാഷണൽ ഗാർഡ് ക്യാമ്പിലെ സൗദി സൈനിക കേന്ദ്രങ്ങൾ, അൽ ജൗഫ് ഗവർണറേറ്റിന് കിഴക്കുള്ള സൈനിക താവളങ്ങൾ എന്നിവയ്ക്കു നേരെയും ആക്രമണം നടത്തിയതായി ഹൂതി വക്താവ് അവകാശപ്പെട്ടു. മേഖലയിലെ സുരക്ഷാ സാഹചര്യങ്ങൾ നിലനിൽക്കുന്ന പശ്ചാത്തലത്തിലാണ് സൗദിയിലേക്കുള്ള സർവീസുകൾ റദ്ദാക്കാനുള്ള തീരുമാനം ഇൻഡിഗോ വീണ്ടും നീട്ടിയത്.

English Summary : IndyGo Airlines has extended the cancellation of its flight operations to Saudi Arabia, citing ongoing safety and security risks in the region.